Read turkana Neemia 11 Bible Online

Neemia 11 - turkana bible

Neemia 11

¹Apot ngikarikok toloma Yerusalem sodi apot ngitunga luche daang tarama ekura toseuneta awi apei anawiyei a ngatomon, na elosi tolom Yerusalem lore a Akuj. Toloma ngawiyei nache lorerea luche.

²Apot ngitunga kipuruut ngitunga luche cha daang lu alemunosi akilom Yerusalem.

³ Alorerea aluche, apot Ngisirael ka ngimurok, ka Ngilawi, ka ngikasubak etich alokai a Akuj ta ngalesea a ngikasubak etich a Solomon, apot daang toloma lorerea kech, itwaan daang lowae keng. Ngikarikok a akwap a Yuda lu alomito Yerusalem kesi lugu.

⁴Lua ekitela a Yuda kesi lugu, Ataya lokookeng a Usia tarai etatait a Sekaria. Taapaakeng luche kesi Amaria, ka Chepatia ta Maalalel lu araakasi ngalesea a Peres, alo arai lokookeng a Yuda.

⁵Maaseya lokookeng a Baruk, alo arai lokookeng a Kolose. Taapaakeng luche kesi Asaya, ka Adaya, ka Yoyarib, ta Sekaria lu araakasi ngalesea a Chela alo arai lokookeng a Yuda.

⁶Ngitunga a ngalesea a Peres lu alomito Yerusalem, araakasi 468.

⁷Lua ekitela a Benjamen kesi lugu, Salu lokookeng a Mechulam, tarai etatait a Yoed. Taapaakech luche kesi Pedaya, ka Kolaya, ka Maaseya, ka Isiel ta Yechaya,

⁸ka Gabai ka Salai lu araakasi ngiyenet[10] a Salu. Araakasi ngitunga a ekitela a Benjamen daang lu alomito Yerusalem 928.

⁹Yoel lokookeng a Sikiri ngesi arai ekarikon kech. Yuda lokookeng a Asenua ngesi arai ekapolon loochi alore.

¹⁰Ngimurok lu alomito Yerusalem kesi Yedaya lokookeng a Yoyarib, ka Yakin,

¹¹ka Seraya lokookeng a Ilikia, tarai etatait a Mechulam. Taapaakeng luche kesi Sadok, ka Merayos, ka Aitub lo arai emuron loapolon a Akuj.

¹²Ngitunga a emachar kalo 822 kesi asubete etich alokai a Akuj. Ayei tani Adaya lokookeng a Yeroam tarai etatait a Pelalia. Taapaakeng luche kesi Amusi, ka Sekaria, ka Pachur ta Malikija.

¹³Ngitunga a emachar kalo 242 kesi araakasi ngikapolok a ngawiyei. Ayei tani Amachisai lokookeng a Asarel tarai etatait a Asai. Taapaakeng luche kesi Mechilemos, ka Imer.

¹⁴Ngitunga a emachar kalo 128 kesi araakasi ngasigerea nakajwok. Sabudiel lokookeng a Agedolim[11] ngesi arai ekarikon kech.

¹⁵Ngilawi kesi Chemaya lokookeng a Achub tarai etatait a Asirikam. Taapaakeng luche kesi Achabia, ka Buni.

¹⁶Chabesai ka Yosabad lu araakasi Ngilawi luyenat lu aweikinito etich lo asubio anikalapatan akai a Akuj.

¹⁷Matania lokookeng a Mika tarai etatait a Sabudi alo arai alesit a Asap. Ngesi arikit ngikaeok a akai a Akuj aloeos alo abuanakinere Akuj alakara. Bakibukia arai ekengarakinan a Matania. Abuda lokookeng a Chamua tarai etatait a Galal alo arai alesit a Yedusun.

¹⁸Ngilawi 284 kesi alomito Yerusalem lo arai ere a Akuj.

¹⁹Ngasigerea a akai a Akuj na alomito Yerusalem kesi Akub, ka Talimon ta ngiyenet kech. Araakasi daang 172.

²⁰Ngisirael luche daang, ka ngimurok lu edongito ta Ngilawi, apot toloma lorerea luche a Yuda, itwaan daang lowae keng.

²¹Apot ngitunga lu asubete etich alokai a Akuj toloma lowae a Yerusalem lo enyaritae Opel. Sia ka Gichipa kesi aweikinito kesi alotich.

²²Itwaan ni aweikinit Ngilawi lu alomito Yerusalem ngesi Usi lokookeng a Bani tarai etatait a Achabia. Taapaakeng luche kesi Matania, ka Mika. Arai Usi eka emachar a Asap. Ngitunga a emachar kangolo kesi araakasi ngikaeok alokai a Akuj.

²³Ayakasi ngitalio a ekapolon lu edodiunito eger lo eeotor ngikaeok alokai a Akuj akolongit daang.

²⁴Pesaya lokookeng a Mechesabel, lo a emachar a Sera tarai eka ekitela a Yuda, ngesi aweikinit Ngisirael anitubet ekies alo Persia.

²⁵Alomito ngitunga nikaalan lorerea lu ayakasi diyete ngamanat kech. Lua ekitela a Yuda, alomito lorerea a Kirias Ariba, ka Dibon, ka Yekabseel ta ngadakarin na edunyatar.

²⁶Alomito kesi tani lorerea a Yechua, ka Molada, ka Besipelet,

²⁷ta Asarchual. Toloma tani Beer-cheba ka ngadakarin na edunyatar.

²⁸Alomito kesi lore a Sikilag, ka Mekona ka ngadakarin keng,

²⁹ka Enirimon, ka Sora, ka Yarimus,

³⁰ka Sanoa, ka Adulam ta ngadakarin na edunyatar ngirerea ngulu. Alomito kesi Lakich, ka namanat na ayakasi diyete neni, ka Aseka ka ngadakarin keng. Ngesi atamar, alomito ngitunga a Yuda nakwap na eyei kiding Beer-cheba alokuju ka adipo a Inom alokwap.

³¹Alomito ngitunga a ekitela a Benjamen lorerea a Geba, ka Mikimach, ka Ai, ka Besel ta ngadakarin na edunyatar.

³²Alomito ngiche Anasos, ka Nob, ka Anania,

³³ka Asor, ka Rama, ka Gitaim,

³⁴ka Adid, ka Seboim, ka Nebalat,

³⁵ka Lod, ka Ono, ta adipo a ngikechiak ngiboro.

³⁶Ngilawi ngiche lusek alomito nakwap a Yuda, apon totiakakinae akilom ka ngitunga a Benjamen wapei.