Read turkana Neemia 12 Bible Online

Neemia 12 - turkana bible

Neemia 12

¹Lugu kesi ngimurok ka Ngilawi lukolong abongunete anarikonot erukito ka Serubabel lokookeng a Chealitiel, erukito nabo ka Yochua lo arai emuron loapolon.

²Ngimurok kesi Seraya, ka Yeremia, ka Esira, ka Amaria, ka Maluk, ka Atuch,

³ka Chekania, ka Reum, ka Meremos,

⁴ka Ido, ka Ginesoi, ka Abija,

⁵ka Mijamin, ka Maadia, ka Biliga,

⁶ka Chemaya, ka Yoyarib, ka Yedaya,

⁷ka Salu, ka Amok, ka Ilikia ta Yedaya. Araakasi ngulu ngikarikok a ngimurok aluche kadaang ngirwa lua Yochua.

⁸Ngilawi lugu kesi aweikinito ngieosio lu ebuanakinere Akuj alakara. Yechua, ka Binui, ka Kadimiel, ka Cherebia, ka Yuda ta Matania.

⁹Lugu kesi araakasi ngikekamanarak ngieosio. Bakibukia, ka Uno ta Ngilawi lurukitos kech.

¹⁰Auriuni Yochua Yoyakim, touriu Yoyakim Eliachib, touriu Eliachib Yoyada,

¹¹touriu Yoyada Yonasan, touriu Yonasan Yadua.

¹²Ngirwa lu araakar Yoyakim emuron loapolon, lugu kesi araakasi ngikapolok a ngimacharin a ngimurok. Meraya apolokinit emachar a Seraya, topolok Anani emachar a Yeremia,

¹³topolok Mechulam emachar a Esira, topolok Yewanan emachar a Amaria,

¹⁴topolok Yonasan emachar a Maluk, topolok Yosep emachar a Chebania,

¹⁵topolok Adina emachar a Arim, topolok Elikai emachar a Merayos,

¹⁶topolok Sekaria emachar a Ido, topolok Mechulam emachar a Gineson,

¹⁷topolok Sikiri emachar a Abija, emachar a Miniamin,[12] topolok Pilitai emachar a Moadia,

¹⁸topolok Chamua emachar a Biliga, topolok Yeonasan emachar a Chemaya,

¹⁹topolok Matenai emachar a Yoyarib, topolok Usi emachar a Yedaya,

²⁰topolok Kalai emachar a Salai, topolok Eber emachar a Amok,

²¹topolok Achabia emachar a Ilikia, topolok Nesanel emachar a Yedaya.

²²Egiritae ekimar a ngikapolok a ngawiyei a Ngilawi ka ngimurok, ngirwa lu araakatar ngitunga lugu ngimurok luapolok. Eliachib, ka Yoyada, ka Yonasan ta Yadua. Tasalu ekimar ngolo ngirwa lu araakar Dario ekapolon a Persia.

²³Kaneni dang, ngikapolok a ngawiyei a Ngilawi, egirio lokimar lopalem a arieng tanang ngirwa lua Yonasan alo arai etatait a Eliachib.

²⁴Totiakae Ngilawi a ngalooso, eweikinito Achabia, ka Cherebia, ka Yechua, ka Binui ta Kadimiel. Apot kesi kipuruut Akuj a ngalooso a ngaarei-rei, ikamanarete ka abuanakin Akuj alakara, itemem ka ngakichikichiket a ekapolon Daudi alo arai itwaan a Akuj.

²⁵Ngasigerea a akai a Akuj na eyokiyete ngikerui lu ayakasi lodorin kesi lugu, Matania, ka Bakibukia, ka Obadia, ka Mechulam, ka Talimon ta Akub.

²⁶Ayakasi ngitunga ngulu ngirwa lukolong a Yoyakim lokookeng a Yochua tarai etatait a Yeosadak, ka ngirwa lua Neemia alo arai ekapolon, ka ngirwa lua Esira alo arai emuron a Akuj lo ayeni etal.

²⁷Na etaleunere awas a ere a Yerusalem, apon tasakunae Ngilawi anicha alomito kadaang pot losukukuu lokitaleunet awas toeokis ngieosio lu ebuakinere Akuj alakara, toeokis ituruyete ngasua tokusete ngibunei.

²⁸Apot ngitunga a Ngilawi alukaeok tochunun alowaitin alu alomito kesi alu eriamito Yerusalem, ka lu eriamito Netopa.

²⁹Tochunun tani alo Bes-giligal, ka Geba ta Asimapes.

³⁰Apot ngimurok ka Ngilawi kitaleunos kesi, kitaleut ngitunga, ka ngidorin ta awas a ere.

³¹Atochunak ayong ngikarikok a Yuda kidiama awas, ewaak toweikis ngalooso naapolok ngaarei, kirimokis ere ebuakinito Akuj alakara. Tolot atiaket na ekingaren lowae lo aloteten alokidiama awas, toloto lowae lo ekidor a Asakatan.

³²Ewapit Ochaya ngikaeok, kiwapito ngesi epewae a ngikarikok a Yuda.

³³Ngimurok lu erukorete ka ngesi kesi Asaria, ka Esira, ka Mechulam,

³⁴ka Yuda, ka Benjamen, ka Chemaya ta Yeremia.

³⁵Talokookeng a ngimurok lu akusete ngaburucho kesi Sekaria lokookeng a Yonasan tarai etatait a Chemaya. Taapaakeng luche kesi Matania, ka Mikaya ta Sakur lo emachar a Asap.

³⁶Apot kirukosi ka ngitunga luche a emachar keng lu anyaritae Chemaya, ka Asarel, ka Milalai, ka Gilalai, ka Maai, ka Nesanel, ka Yuda ta Anani. Atingito ngulu daang ngiboro lu eeore lu ikote lukolong aeor ekapolon Daudi, lo arai itwaan a Akuj. Esira lo ayeni etal ngesi arikit atiaket ngina analotoru.

³⁷Alokidor a Eitanit, tananga nadoket na eloose lore a Daudi, kiporosi akai a Daudi, sodi tobongut nawas alokidor a Ngakipi, alowae alo alo kide ere.

³⁸Atiaket nache a ngitunga alu abuanakinete Akuj alakara, apot toloto kedieny alokidiama awas, sodi ewapakisi ayong ka ngitunga epewae. Atoloto eporosi epem lo a a ngikenoi alu kimaet akimuj atananga nawas nabalany.

³⁹Ani kinyouni kaneni, atoloto eporosi ekidor a Epiraim, ka ekidor a Yechana, ka ekidor a Ekolia, ka epem a Ananel, ka epem a Amiat atananga lokidor a Amesek. Atorumosi alotoru kosi alo diyete ekidor lo elosi kai a Akuj.

⁴⁰Apot ngalooso naarei nguna na abuanakinete Akuj alakara tananga lowae lo a akai a Akuj. Kirukit ayong ka ngikarikok epewae.

⁴¹Lu ayakasi natiaket nakang kesi ngimurok lu akusete ngaburucho lu anyaritae Eliakim, ka Maaseya, ka Miniamin, ka Mikaya, ka Elioenai, ka Sekaria ta Anania.

⁴²Totupuut Maaseya, ka Chemaya, ka Malikija, ka Elam ta Eser. Toeokis ngikaeok erikit Yesiraya kiremasi.

⁴³Kipeyoe ngakipeyos nakaalak akolongit ngina, sodi talakaros ngitunga noi kainyo etalakarit Akuj kesi noi. Apot tani ngaberu ka ngide talakaros. Abu echale lo alakara ngolo kiirarae anikalonan.

⁴⁴Akolongit ngina, toseunae ngitunga toweikis ngikerui lu ikachio ngadekon a akai a Akuj, ka ngalemunet, ka ngalemet na ekingaren ta ageor na akoniununi ekaru daang. Ngitunga ngulu kesi ediauniyete ngalemet a ngimurok ka Ngilawi anamanat ana ayakasi diyete ngirerea lugelagelae, loger lo esakitere Alotal. Apot ngitunga a Yuda daang talakaros kotere ngimurok ka Ngilawi

⁴⁵kainyo asubete kesi esukukuu lo a akitaleunun ka ngitalio lusek adungunit Akuj. Apot ngikaeok dang ka ngasigerea a akai a Akuj tosuba ngitichisio kech itemem ka ngitalio lukolong ewaakinete ekapolon Daudi ka lokookeng Solomon.

⁴⁶Napei kolong a angorot alorwa a Daudi ka ekaeon Asap, aliworosi ngikaeok eeosi ngieosio a ekipur ka abuanakin Akuj alakara.

⁴⁷ Ngirwa nabo lua Serubabel ka Neemia, alemuuniyete Ngisirael daang ngalemunet na einakinio ngikaeok ka ngasigerea a akai a Akuj. Alemanakinete ngitunga Ngilawi akipeyos sodi totiakakis Ngilawi ngimurok nginerin kech.