Read turkana Neemia 13 Bible Online

Neemia 13 - turkana bible

Neemia 13

¹Na esomakinere ngitunga etal a Musa iremae pon kisomakinae ni igiritae atamar emam itwaan a Ngiamon kori a Ngiamoab ni ejoikinit elomari lotunga a Akuj,

²kotere apukorete kolong ngitunga ngulu Ngisirael akimuj ka ngakipi alorot na arotokinioto Ngisirael alo Misiri. Pearai apot kesi nakis Balaam ngaropiyae kilamea Ngisirael, nakaneni abu Akuj yok kiloch ngilam ngulu toliworos apiaro.

³ Ani iirarete Ngisirael etal ngolo isomao, apot totiakakisi ngitunga lua ngakwapea anache daang anikech.

⁴Emuron lo anyaritae Eliachib lo aweikinit ngikerui a akai a Akuj, achamasi sek ka Tobia a ngirwa alukaalak.

⁵Abu ngesi nak Tobia amaniyat naapolon na asakitae erai ngesi ikachanakinio ngalemunet a ngalemet ka emitina, ka ngiboro lu asubere etich alokai a Akuj, ka ngalemunet a ngimurok, ka ngatiaket a ngalemet, ka emuna ta akimiet na ainanakinio Ngilawi ka ngikaeok ta ngasigerea a akai a Akuj.

⁶Ani esubasi ngakiro nguna, atamam ayong alo Yerusalem, kainyo ekaru lo a ngitomwon-uni ka ngiarei lo araakar Artachasta ekapolon a Babilon, abongorit ayong nikeng akitaanyun ngesi. Adaunet a ngirwa a ngikos, katachamak ngesi ayong

⁷abongori Yerusalem. Atorukau ayong kaneni Eliachib kesubaki ngakiro naaronok ani ainakinea Tobia amaniyat alokai a Akuj.

⁸Atongo ayong noi dio emasa ngiboro a Tobia daang nikalapatan.

⁹ Atodung ayong atamar kitaleunoe ngamaniyae, sodi tolemunae ngiboro a akai a Akuj ka ngalemunet a ngalemet ta emitina tobuakinae namaniyae.

¹⁰Atoriam ayong tani ngikaeok ka Ngilawi kedokis alo Yerusalem kebongosi namanat kech, kainyo peainakinete ngitunga kesi ngalemet na itemokino.

¹¹Sodi ekilak ayong ngikapolok luuchik atama, “Kotere nyo epasakinere akai a Akuj?” Atobuu ayong Ngilawi ka ngikaeok kai a Akuj sodi tobongokis ngitichisio kech.

¹²Sodi kisiakis Ngisirael daang nabo ayaunun ngalemunet kech a ngalemet ka emuna ta akimiet yaut lokerui a akai a Akuj.

¹³ Atoseu ayong ngitunga lugu toweikis ngikerui, Chelemia lo arai emuron a Akuj, ka Sadok lo ayeni etal ta Pedaya lo arai Elawit. Anan lokookeng a Sakur tarai etatait a Matania, engarakina ka kesi, kainyo amunoi kesi. Arai etich kech akoranakin ngikasubak etich luche akimuj.

¹⁴ Ee Akuj kang, kitamu ngakiro nugu daang na asubea ayong akai kon ka etich kon.

¹⁵Ngirwa ngulu, engolik ayong ngitunga a Yuda echiuniyete emuna anamusabib akolongit na Sabato. Edokete ngiche ngalemet kech, ka emuna, ka ngamusabib, ka ngameyana ta ngiboro luche losikiria kech yaasi Yerusalem. Abu ayong echikichik kesi atamar nyeegielasi ibore tani ipei akolongit na a Sabato.

¹⁶Ayakasi ngitunga ngiche a ere a Tiro lu alomito Yerusalem. Apot kesi yaut ngikolea ka ngiboro lugelagelae daang lore agielanakin ngitunga kosi akolongit na a Sabato.

¹⁷Ekilak ayong ngikarikok a Ngiyaudi atama, “Anukiro naaronok isubete esi nugu! Isecha esi etal a Sabato.

¹⁸Ngakiro napei kolong eriraa Akuj taapaakus nugu naenyasunea ere logo. Nakaneni eringa esi isakete akitongoikin Akuj Ngisirael ani isecheta etal a Sabato.”

¹⁹Sodi atodung ayong atamar togolonokinoe ngidorin a ere na isiakinea akolongit na a Sabato daang napei cha eliworor atabong, nyeengaar ngidorin ngulu nabo tanang ni edaunor Sabato. Ewaak ayong ngitunga lukang ngiche lodorin nyiilomunere ngiboro lore akolongit na a Sabato.

²⁰Ngimuchurus lu agielanarete ngiboro daang lugelagelae, apereenete dopetei nikalapatan awas a ere akolongit na Ijumaa nakwaare.

²¹Echikichik ayong kesi atama, “Emam ibore idarito esi anikalapatan tanang iwalari. Ani kibongokis esi ngakiro nguna nabo, kerumuni ayong esi.” Akisiakin ngina jik, nyebonguno kesi nabo jik akolongit na a Sabato.

²² Atodungok ayong Ngilawi atamar kitaleunos sodi toloto kiyoko ngidorin kirichakinere etal a Sabato. Ee Akuj kang, kitamunae kotere tani ngakiro nguna, sodi kitajalu kotere amina kon naapolon.

²³Ngirwa ngulu, engolik ayong Ngiyaudi nikaalan iutanarito ngaberu a akwap a Achidod, ka Amon ta Moab.

²⁴Ngide kech epewae, eruorosi ngabukui a Achidod, kiruoros ngiche ngabukui ngache, peayenete ngabukui yok.

²⁵Ekilak ayong ngikiliok ngulu, elam kesi, edet sodi atorut ngitim kech. Ani erumor esikong ayong kesi alokiro a Akuj atama, “Nyiipotosi tanakookus kiuta talokookech, kori nyiirikosi tanakookech kiuta talokookus kori esi ngikulepek.

²⁶Abe ngaberu bo na ekote nguna kesi kolong etesechete Solomon lo arai ekapolon a Isirael! Ayenikinitae ngesi akidwang ngikapolok a ngibukui aluche kadaang. Amina Akuj ngesi sodi kitiliwo ekapolon a Isirael kadaang. Kaneni dang, apot ngaberu na ngakwapea anache kitosecha ngesi.

²⁷ Ejoikinit tokona sua kiwapi ekitetemes kus atosechakisi Akuj kosi, euta ngaberu na ngakwapea anache a?”

²⁸Arai Yoyada lokookeng a Eliachib alo arai emuron loapolon. Nakaneni abu lokookeng a Yoyada epei kiut nakookeng a Sanbalat alo abunit alore a Bes-oron. Abu ayong etwarak Yoyada alore a Yerusalem kotere ngakiro nguna.

²⁹Ee Akuj kang, kitamu eger lo asecheta ngitunga etich a emuron a Akuj ka achamunet nakolong ichamakinosi iyong ka ngimurok ta Ngilawi.

³⁰Etaleu ayong ngitunga anibore kadaang ani akwap anache. Ewaak ngitalio lu iwapete ngimurok ka Ngilawi toyenea itwaan daang etich keng.

³¹Atorek ayong ngisaae lu echamit eyauniyere ngakito na inomere ngakipeyos, ka ngisaae lu eyauneta ngitunga ngakipeyos kech na ngalemet ana ekingaren ta ageor na ekoniuni ekingaren. Ee Akuj kang, kitamu ngakiro nugu daang sodi kitosubea naajokak.