Read turkana Neemia 2 Bible Online

Neemia 2 - turkana bible

Neemia 2

¹Elap lo anyaritae Nisan, ekaru lo a ngitomwon-arei lo araakar Artachasta ekapolon, akolongit apei na emujea Artachasta, abu ayong ainak ngesi emuna. Aringa ngesi nyingolikina ayong asinyit a ache.

²Sodi kengit ngesi ayong tama, “Nyo isinyitor iyong, tarai bo nyideaka? Abe eyakasi tokona ngon ngakiro kinomito iyong etau!” Katobul ayong noi.

³ Atatachu atama, “Ekapolon toyei jik! Nyo bo peasinyo na enyasunor Yerusalem ni enukakinitae taapaakang, nabo enyasu akim tani ngidorin keng?”

⁴Kengit ekapolon ayong tama, “Nyo tokona isaki iyong?” Elip ayong Akuj a adis.

⁵Abu ayong atolimok ekapolon atama, “Ani kijoikinito iyong ngakiro kang tasaki akingarakin, kimiekinae ayong atolot nakwap a Yuda, lore lo enukakinitae taapaakang, sodi atobongok akiduk ere ngolo.”

⁶Kengit ekapolon ayong tama (ebooyi aberu keng alo diyete keng), “Ngirwa ngiai iperori iyong inaa? Ori ibongunio iyong?” Tachamu ngesi ngakiro kang sodi atolimok ayong ngesi atamar abonguni ori.

⁷Atolimok ayong ekapolon atama, “Ekapolon, ani kijoikinito iyong ngakiro kang, kelipit atamar kigirak ngabaruae ayaa lokaweikinak a ewae alo eyei too angolol a Eupurate[2] sodi katachamakineta ayong etori neni atolot nakwap a Yuda.

⁸Kigirak nabo abarua ayaa nia Asap lo eweikinit ngamon a ekapolon, sodi kainak ayong ngakito na adukio ngidorin a awas anakaagongon a akai a Akuj, ka ngakito naduket awas a ere ta naduket akai na alomi ayong.” Tacham ekapolon ngakiro kang daang kainyo kirukit ayong ka Akuj.

⁹Toseu ekapolon ngikarikok a ngasigerea ngiche ka ngikameak ngangolei, sodi erukosi ka ayong. Atorotok ayong ani anangi too Eupurate, ainak ngikaweikinak a ewae kangolo ngabaruae a ekapolon.

¹⁰Sanbalat lo abunit alo Bes-oron, ka Tobia lo arai ekaweikinan a arieng a Amon, na eirareta atamar asubakinea ayong Ngisirael ngakiro naajokak, apot kesi tolemasi lokojokon.

¹¹Atolot ayong Yerusalem, atoper inaa ngirwa nguuni.

¹²Amam itwaan alimokinit ayong ngakiro na asaki Akuj kang ayong atosubea Yerusalem. Ani enangi kiding akwaar, atonyou ayong atopudo nikalapatan, atoriko ngirukitos kang ngidikidio. Emam ibarasit iche kirikit sua pearai esikiria lo adokit ayong.

¹³Ani eringa akwaar, atorotok ayong alore etor lokidor a Adipo lo eyei too, atolot kuju eporo eitanit a Emun apolon, atolot lokidor a Asakatan. Ani alosi, eseme ayong ngawasea a Yerusalem na aukoro ka ngidorin lu anomiarit akim.

¹⁴Ani enangi kide ere, atolot kwap lokidor a Eitanit ka nabwel a Ekapolon. Tongopik esikiria lo adokit ayong ni itori.

¹⁵Abu ayong nadipo a Kidiron atolot eseme awas. Ani erumor atobongu etoru nisek abunio etoro lokidor a Adipo atobongo lore.

¹⁶Ngikaweikinak a arieng daang lu kaneni, amam lo ayeni ni alosit ayong kori ibore ni asubi ayong. Nabo emam ngakiro abu ayong atolimok Ngiyaudi, ka ngimurok a Akuj, ka ngikarikok ta ngikaweikinak a arieng, kori itwaan cha daang ni adikino elomari lotich ngolo.

¹⁷Nakaneni atolimok ayong kesi atama, “Kingolikis mono esi ngichan lu kianyu ngoni ani enyasunor Yerusalem ka ngidorin keng lu anomia akim! Potu atodukokisi ngawasea a ere sodi totuborotor ngileech aniyok.”

¹⁸Abu ayong atolimok kesi eger lo kirukitor ayong ka Akuj ka eger lokengarakinea ngesi ayong ta ngakiro nakalimokini ekapolon ayong. Tatachut kesi tamasi, “Tonyoutu esiakisi abongokin akiduk!” Tonyout kesi esakete akisiakin etich.

¹⁹Ani iirarete Sanbalat, ka Tobia lo arai ekaweikinan a arieng ta Emwarabut eche anyaritae Gechem, iirarete ngakiro na kisaki sua akisub, apot kitokianatar sua ka akimeny ebalasi, “Abe nyo mono tokona isubete esi? Isakete esi akinger ekapolon a?”

²⁰Atatachak ayong kesi atama, “Kipwatakini sua Akuj na adis ngakiro naajokak. Kirai sua ngikasubak etich keng, kisiakini akiduk. Nakaneni emam esi ibore kus eyei Yerusalem kori nyikimaritae esi alotalio a Yerusalem.”