Read turkana Neemia 4 Bible Online

Neemia 4 - turkana bible

Neemia 4

¹Na eirarea Sanbalat atamar kisiak sua Ngiyaudi abongokin akiduk awas, abu tongo noi kimeny sua

²alongaren ngirukitos keng ka ngasigerea a Ngisamariae. Tolim ngesi tama, “Abe nyo mono esubete Ngiyaudi lupalag lugu? Abe esakete abongokin akiduk ere a? Itamito kesi atamar ani kipeyoo ngakipeyos kirumori etich a akolongit a apei a? Epedorete kesi asubun ngamoru naduket alongame alo inomitae a?”

³Awei Tobia lo ekitela a Ngiamon alo diyete Sanbalat. Abu kiatak tama, “Awas ani epedorete lugu akiduk? Epedori tani kwee aukor ketama ekekini!”

⁴Elip ayong Akuj atama, “Ee Akuj, kiira eger lo kikianatar kesi sua! Kimiek ngimeny lukech ngulu tobongokis kesi ngikulepek. Kimiek kesi todemarae ngiboro lu etingito daang sodi torikoroe nakwap nagela toliworos ngirikon.

⁵Nyiirimak kesi anakiro anaaronok esubete kesi, nabo wara ngasechesea kech nyiikisar alongaren kon kainyo eyenya kesi ngikadukok!”

⁶Kipot sua atoduko awas kitemokin anus a aoyau ana alokidiama, kainyo erichasi ngitunga alotich.

⁷Sanbalat, ka Tobia, ka ngitunga a akwap a Arabia, ka lua Amon, ta lua Achidod, apot kiirasi atamar erubakinito ngitunga edukete awas a Yerusalem nabo agol ngipukei lu ayakasi nawas. Apot kesi tongoa noi.

⁸Totuko kesi daang aponere akitijikin ngitunga a Yerusalem ka ayaun ekurikur lotunga.

⁹Nakaneni kipotu sua elipa Akuj kosi, sodi ewaakisi ngasigerea na iteete ere akwaar ka apaaran.

¹⁰Tamasi ngitunga a Yuda, “Alilimiyosi sua ngawat ani kiwokitor eegos loapotion, toringa engame lokiwoko elal. Kikokini sua kiduki awas akolongit naga ai?”

¹¹Apot ngimoe kosi tamasi, “Nyepedorete kesi akiyen kori akingolikin ngoni tanang ni kituumwokinea kesi ataara sodi tasalu etich kech.”

¹²Ngiyaudi lu alomito kiding kech, aponeenete jiik akichikichik sua ebalasi, “Epote kesi alowaitin kadaang alu elomito, kitijikis ngoni.”

¹³Sodi atokorak ayong ngitunga ngilengea, ka ngakwaaras ta ngimalea, dio atorek kesi a ngimacharin kech towaa kayaaye awas alowaitin alu aringa nyerumoro akiduk.

¹⁴Ani engolikini ayong atamar aema ngitunga, atolimok kesi ka ngijakaanotin a ere ta ngikaweikinak atama, “Nyieam ngimoe yok. Kitamutu eger lo eraakar Ekapolon Akuj na Epol tarai naketubulon! Tojwoto kotere ngitunga kus, ka ngide kus, ka ngaberu kus ta ngawiyei kus.”

¹⁵Kiirasi ngimoe kosi atamar kiyen sua ngakiro na atukito kesi, nabo toyena atamar etepenia Akuj ngakiro kech. Ani erumor atobongokisi sua daang akiduk awas.

¹⁶Akisiakin akolongit ngina jik, toliworos ngitunga kang epewae esubete etich, kiteto luche akwap enapito ngasua alorarumo totingito ngakwaaras, ka ngaupwala ta ngimalea a akau. Kibaka ngikarikok kosi alowae a ngitunga a Yuda,

¹⁷alu adukete awas. Tani ngitunga lu adakito ngiboro luduket, asubete etich a akan a apei, totingito ibore nijiet anache.

¹⁸Aenikinit itwaan ni aduki daang ekileng losiep keng toduki. Kirukit ayong jiik ka itwaan nikaraman elii.

¹⁹Atolimok ayong ngitunga ka ngijakaanotin ta ngikarikok kech atama, “Elal etich, epetakina wadaang. Kilonikin ngoni anawas.

²⁰Napei iirareta esi elii eramio, tomotunos laalo kiya sua. Ejii Akuj yok alowae yok.”

²¹Sodi toliwor akolongit daang napei echilea nanyang tanang ni etakanuneta ngikanyer anadis, esubete epewae kosi etich towaas luche etingito ngakwaaras.

²²Esaa ngolo, atolimok ayong ngitunga atama, “Ekarikon daang ka ngitunga keng, iteete ere a Yerusalem nakwaare, ani naparan tosuba etich.”

²³Ayong ka ngirukitos kang ta ngikasubak etich kang ta ngasigerea naketeete ayong, nyebutoro ngiworui kosi tani nakwaare. Kitingit sua daang ngiboro kosi lujiet anakan.