Read turkana Neemia 6 Bible Online

Neemia 6 - turkana bible

Neemia 6

¹Sanbalat, ka Tobia, ka Gechem Lomwaarabut ta ngimoe kosi luche, apot kiirasi atamar kirumo sua akiduk awas nabo emam ngipukei eyakasi nawas tani bo keringa sua nyiwaakina ngidorin dang.

²Apot Sanbalat ka Gechem tomeut ngitunga nikang ebalasi, “Bua eriamunos nadakar apei anaro a Ono.” Arai eger ngolo lo asaketa kesi akiwan ayong.

³Atomea ayong ngitunga alimokin kesi kona, “Epol etich lo asubi ayong noi, nyapedori ayong abunere inaa. Nyapedori ayong abunere nikus sodi towo etich.”

⁴Tomeut kesi ngitunga nikang ngameunet ngoomwon iruorosi ngapeikiro. Atomeana nabo ayong ngitunga nikech eruoro ngapeikiro.

⁵Sodi tomeu Sanbalat ngikasubak etich keng ameunet na ngakan etingito abarua na engaara.[7]

⁶Egiritae abarua kona, “Eyakasi ngakiro na epetakina lobukui lu idunyare, alimu Gechem dang atamar ikote neni, na ebeyo isakete iyong ka Ngiyaudi akinger ekapolon. Ngakiro nguna kesi ibongokineto esi akiduk awas. Isaki iyong aliwor ekapolon,

⁷nabo iwaak iyong ngikadwarak ngiche Yerusalem lu elimorete atamar irai iyong ekapolon a Yuda. Elimokinio ekapolon Artachasta ngakiro nguna. Kalimokinit bocha atamar eriama ayong ka iyong eruoro ngakiro nguna.”

⁸Atomea ayong ngitunga nikeng atama, “Emam ngakiro na ilimu iyong erai iteni. Iyong ilope itongunit ngakiro nguna daang.”

⁹Asakete kesi akitubul sua itamito atamar elilimiyorete ngakan kosi atoisikisi etich. Nakaneni elip ayong Akuj atama, “Akuj, kitogogong robo tokona ngakan kang!”

¹⁰Atolot ayong nawi a Chemaya alo arai lokookeng a Delaya tarai etatait a Meetabel. Agolokinitoe ngesi kai keng. Katolimok ngesi ayong tama, “Kapana atoduka alowae alo italeuno alokai a Akuj sodi atogolo ngidorin, kainyo eponitae akiar iyong.”

¹¹Atolimok ayong ngesi atama, “Meere robo ayong itwaan ni ematanar ka akiduk. Esibit iyong alosi ayong akiduk alokai a Akuj atoyuunor a? Nyapedori ayong.”

¹²Ani etamakini ayong ngakiro nguna, atoyen atamar meere Akuj emeunit Chemaya, pearai Tobia ka Sanbalat kesi ediakito ngesi bunio akisuruor ayong ngakiro nguna.

¹³Adiekio ngesi a ngaropiyae bunio akitubul ayong atosechea, sodi taanyuneta kesi alolom na keruorotor ayong niaronon ka akisurum ngileech.

¹⁴Elip ayong Akuj atama, “Akuj, kitamu ngakiro na asubakis Tobia ka Sanbalat, kirira kesi. Kitamu tani aberu na erai akadwaran na enyaritae Nodia ta ngikadwarak luche daang lu asakete akitubul ayong.”

¹⁵Arai ngirwa daang lu asubere etich ngitomwon-kan ka ngiarei. Torumor etich akolongit na ngatomwon-arei ka ngakan a elap alo enyaritae Elul.

¹⁶Ani iirarete ngimoe kosi lu ayakasi lobukui lu idunyare, atamar kirumo sua etich, kiruma ngileech kainyo ayenete atamar Akuj kosi kiturumori sua etich.

¹⁷Ngirwa ngulu daang, egiranakinosi ngikarikok a Ngiyaudi ka Tobia ngabaruae.

¹⁸Ngitunga lukaalak alo Yuda, ebakito alowae a Tobia kotere lokamuran keng lo arai Eyaudit, lo anyaritae Chakania lokookeng a Ara. Nabo lokookeng a Tobia lo anyaritae Yewanan, eusit nakookeng a Mechulam alo arai lokookeng Berekia.

¹⁹Kalimonokinete ngitunga ayong ngakiro naajokak daang na asubi Tobia, sodi tolimokis ngesi ngakiro daang nacha alimuni ayong. Toliwor Tobia kegiranakini ayong ngabaruae jiik, esaki akitubul ayong.