Read turkana Neemia 8 Bible Online

Neemia 8 - turkana bible

Neemia 8

¹Ani enangi elap lo a ngikan-kaarei, toloma Ngisirael daang lorerea kech anakwap a Yuda. Akolongit na ekingaren a elap kangolo, tochunakinos kesi daang Yerusalem naro na alotooma ekidor a Ngakipi. Tolimokis kesi Esira lo arai emuron nabo esomat etal lokolong ainakini Ekapolon Akuj Ngisirael kisitoru nia Musa, tolimokis atamar yau akitab a etal.

²Sodi yau Esira akitab ni achunakina ngitunga, lukiliok ka luberu ta ngide lukoosok lu apedorete akiyen ngakiro.

³Abu ngesi kisomak etal anaro a ekidor a Ngakipi, napei nataparach tanang naparan lotingilan. Topupokis kesi daang lokojokon.

⁴Towo Esira anakito ana eraakasi ekicheeles anasek adukitoe kotere etich ngolo. Towaa ngikiliok lugu aloteten keng, Matisia, ka Chema, ka Anaya, ka Uria, ka Ilikia ta Maaseya. Towaa ngikiliok lugu alokedieny keng Pedaya, ka Michael, ka Malikija, ka Achum, ka Achibadana, ka Sekaria ta Mechulam.

⁵Esaa lo awaar Esira alongaren kaneni alokicheles erounit ngitunga, apot kesi daang tokienyikis ngesi. Napei cha anganyarea ngesi akitab, tonyout kesi daang towaa.

⁶Tolim Esira tama, “Kipuroe Ekapolon Akuj Namerikanyer na epol!” Kikeasi ngitunga daang ngakan kech kidiama tatachut tamasi, “Aamen! Aamen!” Toriediko kesi ilipito Akuj, tojuko ngireetin kech ngalup.

⁷Ani erumor tonyout kesi towaa anisek awaatar, sodi kitatamikis Ngilawi lugu kesi etal, Yechua, ka Bani, ka Cherebia, ka Yamin, ka Akub, ka Chabesai, ka Odia, ka Maaseya, ka Kelita, ka Asaria, ka Yosabad, ka Anan ta Pelaya.

⁸Kisomata kesi akitab a etal a Akuj sodi kisisaut[8] ngakiro a etal topedoreta ngitunga akiyen.

⁹Ani iirarete ngitunga ngakiro na asakit etal, apot ngakiro nguna tonoma kesi sodi kisiakis akigoro. Kotere ngakiro nguna, apot Neemia lo arai ekapolon, ka Esira lo arai emuron a Akuj tarai eketataman a etal ta Ngilawi lusek eruorosi ngakiro a etal, tolimokis ngitunga daang tamasi, “Erai akolongit naga na italekinitoe Ekapolon Akuj na erai Akuj kus, warasi nyiisutonokis kori nyiigor.

¹⁰Kapesi nawi kimuja. Tolemutu akimuj kus ka emuna tomora ka ngulu nyetingito na itemokino. Italeuno akolongit naga ani a Ekapolon Akuj ana erai Akuj yok, warasi nyiialolong, kainyo alakara nakiinakini esi Ekapolon Akuj ngesi kitogogongi esi.”

¹¹Apot Ngilawi kirimokis ngitunga isililingete tolimonokinete atamar nyiialolong akolongit na italeuno ngina.

¹²Sodi toloto ngitunga daang nawiyei kimuja tamaase elakara nabo tomora ka luche akimuj kainyo apot kesi toyena ngakiro na esomanakinio kesi.

¹³Akolongit na atupit ngina, apot ngikapolok a ngimacharin, aapei ka ngimurok ta Ngilawi toloto nia Esira esakete akitatama etal.

¹⁴Tongichut atamar edungunit etal lokolong esitoruni Ekapolon Akuj nia Musa atamar toloma ngitunga lokalea ngirwa lu esukukuu a ngikalea.

¹⁵ Sodi todungut kesi ngakichikichiket nugu dio yaarae[9] wadaang alo Yerusalem, ka ngirerea luche ta ngadakarin. Tamasi, “Kapesi lomukur tolemut ngaten a ngiberoch ka na ngikito akimiet, ka na lopara, ka na ngingolea ta ngikito luche luduket ngikalea, itemem ka ngakiro na igiritae Lotal.”

¹⁶Sodi tolemut ngaten todukioto ngikalea kidiama nilapat a ngakais, ka tooma nalaarin kech, ka tooma alaar a akai a Akuj, ka naro na eyei diyete ekidor a Ngakipi ta na eyei diyete ekidor a Epiraim.

¹⁷Ngitunga daang lusek abongunete anarikonot anakwap anagela, apot toduko ngikalea toloma. Asubakin ngakiro nugu na ekingaren naga, nakolong adangaror ngirwa lua Yochua lokookeng a Nun. Tojoikis ngakiro nugu ngitunga daang, talakaros.

¹⁸Napei anakolongit ana ekingaren tanang na esal, esomaenete kesi etal a Akuj. Tanyama kesi esukukuu ngolo a ngirwa a ngikan-kaarei, ani akolongit na ngakan-kauni, min akiriamariam na esal, loger lo esakitor etal.