Read turkana Neemia 9 Bible Online

Neemia 9 - turkana bible

Neemia 9

¹Akolongit na ngatomwon-arei ka ngoomwon a elap alopei kangolo, apot Ngisirael tochunakinos wapei, torono akimuj ka akinap ngiguniae, nabo tonukakis apua nakies kech.

²Kipakaros Ngisirael alotunga alu a ngakwapea anache kadaang. Towaa kesi sodi tolimosi ngasechesea kech ka ngasechesea kata apaakech.

³Apon kesi kisomakinae etal a Ekapolon Akuj ana erai Akuj kech a ngisaae a nguuni. A ngisaae a nguuni alu atupuunete, apot kesi tolimosi ngasechesea kech sodi kilipa Ekapolon Akuj na erai Akuj kech.

⁴Ayei ekicheeles a Ngilawi. Towaa Yechua, ka Bani, ka Kadimiel, ka Chebania, ka Buni, ka Cherebia, ka Bani ta Kenani kaneni. Apot kesi kilipa Ekapolon Akuj na erai Akuj kech, iremasi.

⁵Ngilawi lugu, Yechua, ka Kadimiel, ka Bani, ka Achabneya, ka Cherebia, ka Odia, ka Chebania ta Pesaya, kesi apot tolimut tamasi, “Tonyoutu kipuro Ekapolon Akuj na erai Akuj kus. Kipuro ngesi jik nakajik! Kipur itwaan daang ekiro keng lo a apolou, tani bo kemam ekipur a itwaan lo itemokin dang.”

⁶Ani erumor kilipa Ngisirael ngakilipasinei nugu. “Iyong bon Ekapolon Akuj ngesi irai Ekapolon Akuj. Isubuni kolong iyong adis, ka ngikanyer lu eyakasi nadis. Isubuni iyong akwap ka anam, ta ngiboro daang lu eyakasi nikech. Sodi kiteyar iyong kesi daang. Kilipito iyong ngajorei na adis.

⁷ Iyong Ekapolon Akuj ngesi kolong iseuni Aburam, sodi kipudo ngesi alo Ur anakwap a Babilonia. Kilokony iyong ekiro keng toliwor Aburaam.

⁸ Ibu iyong toyen atamar kimuno ngesi iyong, dio iyong tachamakinos ka ngesi. Kichikak iyong ngesi atamar iinakini akwap a Ngikanaan, ka na a Ngiiti, ka Ngiamor, ka Ngiperes, ka na a Ngiebus ta na a Ngigirigach, sodi toliwor akwap na elomete ngalesea keng. Ibu iyong kirichak akichikakinet kon kainyo irai iyong lo itenoono.

⁹“Ibu iyong kingolik aboliaro a taapaakosi alo Misiri. Nakikaloikinioto kesi iyong ananam a Chamu, ibu iyong kiira.

¹⁰Ibu iyong tosub ngakitoodikinet nakailiilok tosubea ekapolon, ka ngikapolok keng luuchik, ta ngitunga a akwap keng, kainyo iyeni iyong eger lo echiakiaritotor kesi ngitunga kon. Neni ngesi iriamunea iyong ekipur, lo kipurore iyong tani tokona.

¹¹ Kiwaak iyong erot kiding anam, kitoro ngitunga kon, sodi toriko iyong kesi kitoro nalup nakoonok. Apot ngakipi natuluk kilikosi ngulu ewapito kesi, loger lo esiporor amoru nituluk.

¹²Torik iyong kesi a apir a edou naparan, ani nakwaare kinwaku erot kech a akim.

¹³Alomoru a Sinai, ibu iyong totiyaun anadis, dio kisuruor ngitunga kon. Nak iyong kesi ngitalio luajokak, ka ngakitatamet naajokak.

¹⁴ Kitatam iyong kesi kitaleut ngirwa kon a Sabato. Nak iyong kesi ngitalio kon, kisitoru nia Musa alo arai ekasuban etich kon.

¹⁵“Ani enyami kesi akoro, nak iyong akimuj na abuni anadis. Ani enyami kesi akure, nak iyong ngakipi na apote anataaba. Tolimok iyong kesi atamar tolemasi akwap nakolong ibala iyong iinakini kesi.

¹⁶Nakaneni apot taapaakosi toliworos lua ngiwog, nabo lukechanak, towout kesi akiwap ngakiro na idunguni iyong.

¹⁷ Towout kesi akiwap ngakiro, kimuriakis kesi ngakiro nakolong isubi iyong daang. Kimuriakis kesi ngakiro nakailiilok, nakolong isubi iyong. Kotere ngiwog kech, apot kesi toseut ekarikon, lo ebuari kesi toliworos ngikedalak alo Misiri. Nakaneni irai iyong Akuj na irimanakini, irai iyong na ngisien ka amina, nyingoyeene iyong atipei. Etioko ngisien kon, nyeisikina iyong kesi.

¹⁸Apot kesi tosubut akuj, isikwaanito ka emong, sodi tamasi, ‘akuj nakolong kirikuni sua alo Misiri!’ Araakasi ngiyeny ngulu luaronok noi anikon!

¹⁹Nakaneni ibu iyong nyiisik kesi kaina anariet, kainyo etioko ngisien kon. Ibu iyong nyiilema edou kori akim, lu arikito kesi akwaar ka apaaran.

²⁰Aloger ijokia iyong, ibu iyong kitatam kesi ngakiro na ejoikinit esubete. Nak iyong kesi akimuj nabe manna tanyama, ka ngakipi tamata.

²¹ Alokaru alutomwon-omwon alu ayakatar kesi nariet, ibu iyong nak kesi ibore daang. Nyedaudauna ngiworui kech, kori nyebwo ngakejen kech.

²²“Kisidwang iyong kesi ngibukui ka ngapolosio, ngakwapea na edunyatar kesi. Kidwanga kesi akwap na enyaritae Echibon. Sion ngesi arai ekapolon a akwap kangina. Kidwanga nabo akwap na enyaritae Bachan. Ogu ngesi arai ekapolon a akwap kangina.

²³ Nak iyong kesi ngide lukaalak, loger lo elalaketa ngikanyer lu eyakasi nadis. Kimiek iyong kesi toloma nakwap nakolong ichikakini iyong taapaakech.

²⁴Apot kesi tolemasi akwap a Kanaan, Kidwang iyong ngitunga lu alomito neni. Kimiek iyong kesi tosuba ngakiro na asakete, tosubeta ngitunga a Kanaan ka ngikapolok kech.

²⁵ Apot ngitunga kon tolemasi ngirerea lu edukitoe ngawasea, ka ngalup naketurupunak ngikinyam, ka ngakais na eleleba ngiboro luajokak, ka ngakare nasek awaditae, ka ngikito a akimiet, ka ngikito a ageor ta ngamanat a ngimusabib. Tanyama kesi akimuj nacha asakete daang, totuma. Talakaros kesi kotere ngiboro luajokak daang lu iinakini iyong kesi.

²⁶“Nakaneni towout ngitunga kon akiwap ngakiro kon, kitongero iyong. Tobobongo kesi etal kon. Taara kesi ngikadwarak lu echikichikete kesi, ebalasi kesi toreeunos nikon. Kiyenya kesi iyong jiik.

²⁷Kotere nguna, kimiek iyong ngimoe kech idwangete kesi, sodi topolokis. Ani epete kesi lochan, kitanyarata iyong esakete akingarakino, sodi kiira iyong kesi anadis. Kotere ngisien kon luationok, inu iyong kesi ngikarikok, lu ayuunete kesi alomoe kech.

²⁸ Ani emini ekisil nakwap, tosecha kesi nabo. Dio iyong nabo kimiek ngimoe kech idwangete kesi. Kaneni dang, ani elungete kesi ngasechesea, sodi kikaloikis iyong, ibu iyong kiira kesi anadis. Toyuu iyong kesi jiik kotere ngisien kon luationok.

²⁹Kichikichik iyong kesi atamar kiwapa ngakitatamet kon. Kotere ngiwog kech, apot kesi tongero ngitalio kon, lu eraakasi ani kiwap itwaan, eyari. Totumaaketa kesi nabo kichanaketa, tongero akiwap ngitalio kon.

³⁰Ngikaru daang, kichikichik iyong kesi ititinyikinit. Tomea iyong ngikadwarak kon akichikichik kesi, nakaneni apot ngitunga kon nyiirasi, dio iyong kimiek ngibukui luche kidwanga kesi.

³¹ Kaneni dang, kotere ngisien kon luationok, ibu iyong nyiisik kesi kori nyiimunya. Irai iyong Akuj naajokon na ngisien!

³²“Ee Akuj na irai Akuj kosi, Ipol iyong! Irai iyong naketubulon, nabo tarai nakaagongon! Irichakinit iyong ngakichikakinet kon, nabo irai Akuj a ngisien noi. Napei alorwa alu kolong a ngikapolok a Asiria, tanang tani tokona, kiboliare sua noi! Aboliare ngikapolok kosi, ka ngikarikok kosi, ka ngimurok kosi, ka ngikadwarak kosi, ka taapaakosi ta ngitunga kosi daang. Wara robo nyikiditeik aboliaro ngina!

³³Iyookino ngakiro nakirirator iyong sua. Irai iyong lokimunoi, tani kisechit sua.

³⁴Taapaakosi, ka ngikapolok kosi, ka ngikarikok kosi ta ngimurok kosi, nyirichakina etal kon. Nyiirara kesi ngakiro na idungunit iyong, ka ngakichikakinet kon.

³⁵Kotere apiaro kon, apot ngikapolok topolokis ngitunga kon, na alomitotor nakwap nakaaloman, naketurupunan ngikinyam, nakolong iinakini iyong kesi. Nakaneni apot kesi nyereeunosi anakisech kech, pot akisub etich kon.

³⁶Kingolik a, sua tokona lugu kirai ngikedalak anakwap ana kolong iinakini iyong taapaakosi, isaki tanyama ageor ka ibore niajokon daang eyei neni.

³⁷Kotere akisech kosi, aliwor ebari a akwap eka ngikapolok alu kolong iyauni iyong kitopolokis sua. Kisubeta kesi sua ka ngibaren kosi ngakiro nacha esakete, kiya sua lochan luationok!”

³⁸Kotere ngakiro daang na asubakin, sua Ngisirael daang, kigir tokona nege atamar kichamakin ka iyong. Ngikapolok kosi, ka Ngilawi ta ngimurok, egirakis ngirora kech ka ngimacharin.