Read turkana Esita 1 Bible Online

Esita 1 - turkana bible

Esita 1

¹Ngirwa lua ekapolon Kerkesi, apolokinit ngesi ngiwaitin a akwap amiat apei ka ngitomwon-arei ka ngiarei napei alo India tanang Kuch.*g**

² Ebooyi ngesi alore a Susa alo arai ere loapolon a Persia.

³Ekaru lo a nguuni lo araakar ngesi ekapolon, abu ngesi tosubak akimuj nakaalan kotere ngikapolok keng luuchik daang ka ngikasubak etich keng. Ayakasi ngasigerea a Persia ka Media. Ayakasi tani ngikarikok a ngiwaitin a akwap ka ngikajakaanak neni.

⁴A ngilapio a ngikan-kapei, abu Kerkesi kidodiu ebari keng ka ajako a apolou keng.

⁵Ekisidi kanguna, tosubak ekapolon akimuj kotere ngitunga daang lu ayakasi lore loapolon a Susa, lu eyenikinitae ka lunyeyenikinitae. Kirika ekimuje ngolo ngirwa ngikan-kaarei anamanat a akai a ekapolon.

⁶Kitisiroe neni a ngawarui anapusiek ka naakwaak, toenae a ngaunoi anapusiek-arengak anaajokak, tokodakinae nasua nanyangayek iriamito sodi kinenekinoe napirio na esubunitae a ngakabulitinei. Asipokinitae ngikicholongo luapolok lu asubunitae a egolit ka ngasua nanyangayek, asipokinitae neni. Tooma alaar ngina, atapanakinitae ngakabulitinei naakwaak ka ngikam ta ngamoru nakaalak a ngaropiyae.

⁷Amasio a ngikopoi a egolit alu peekwaan. Eposi ekapolon emuna keng tamatae.

⁸Peamisitae etiae lo amaase ngitunga. Adungokinit sek ekapolon ngikasubak etich keng atamar tamat itwaan daang etiae locha esaki.[1]

⁹Nipei bore ngini, esumuji aberu a ekapolon na enyaritae Pachti ngaberu.

¹⁰Akolongit na ngakan-kaarei imujio, tamat ekapolon emuna talakar sodi tanyarau ngikasubak etich keng lukan-kaarei lu anyaritae Meuman, ka Bisita, ka Aribona, ka Bigita, ka Abagita, ka Setar ta Karikas.

¹¹Todungok ekapolon kesi atamar torikut aberu keng Pachti, enapit ekiraun keng lo a apolou. Arai aberu ngina nakebusean. Asaki ekapolon akidodikin ngikapolok keng luuchik ka ngipeyok keng dang atamar ibus aberu keng.

¹²Nakaneni ani elimokinete ngikasubak etich Pachti ngakiro na adungunit ekapolon, abu ngesi towou abunere. Tongo ekapolon noi tonyunyur.

¹³Arai eger a ekapolon akingiseenen ngikunonoi a etal ngakiro. Sodi tanyarau ngesi ngitunga ngulu kingit ngakiro na esubakini.

¹⁴Ngitunga lu engiseene ngesi jiik kesi ta Karichena, ka Chetar, ka Admata, ka Tarchich, ka Meres, ka Marsena ta Memukan. Araakasi lukan-kaarei ngulu ngikarikok a Persia ka Media lu araakasi ngikapolok lu engarenete anapolou a Kerkesi.

¹⁵Tolimok ekapolon kesi tama, “Ameari ayong ngikasubak etich kang nia akapolon Pachti, towou ngesi asubakin ngakiro na adungunit ayong! Ekoe, anukiro esakit etal tosubakinere ngesi?”

¹⁶Dio Memukan tolimok ekapolon ka ngikapolok keng tama, “Meere ekapolon bon esechakinit Pachti pearai esechakinit tani ngikapolok luuchik a ekapolon ta itwaan cha daang anapolou a Kerkesi!

¹⁷Imenyarete tokona ngaberu daang ngikiliok kech napei iirareta ngakiro na asubaki Pachti. Etamarete kesi, ‘Adungokini ekapolon Kerkesi Pachti atamar bu, nakaneni towou ngesi.’

¹⁸Ngaberu a ngikapolok a Persia ka Media daang na eirasi ngakiro na asubaki aberu a ekapolon, elimonokinete tokona ngikiliok kech nakiro nguna, sodi tonyunyurikin ngikiliok ngaberu kech.

¹⁹Ani kisaki iyong ekapolon, todung atamar nyeenangu Pachti nabo jik nia ekapolon. Todung atamar kigirae ngakiro nguna lotalio a Persia ka Media, sodi nyiiloch nabo jik. Ani erumor toseu aberu ache naajokon akidwang ngesi, kilunyokin nados keng toliwor aberu a ekapolon.

²⁰Ani elimorio etal ngolo anakwap anakon kana kadaang, eliwor aberu daang ekerit lokile keng, kebarit kori kiboosit.”

²¹Apot ngakiro nguna tojoikis ekapolon ka ngikapolok keng luuchik, sodi tosubak ekapolon ngakiro na alimuni Memukan.

²²Tomea ekapolon ngitunga yaasi ngabaruae lowaitin a akwap daang, kigirae abarua a ewae kadaang a ngabukui ka ekigire a ewae kangolo. Egiritae atamar eliwor ekile daang ekapolon anawi keng nabo ngesi etiakuni ngakiro na esal.