Read turkana Esita 3 Bible Online

Esita 3 - turkana bible

Esita 3

¹Ekisidi a ngakiro kanguna, abu ekapolon Kerkesi kitiliwo Aman ekapolon lo atupit ngesi. Arai Aman lokookeng a Amedasa alo arai alesit a Agag.[3]

²Abu Kerkesi todungok ngikapolok keng luuchik atamar kidodikis Aman arimatoi toriediko ka akijuur alongaren keng. Apot daang tosuba nguna pearai Mordekai bon abu towou.

³Apot ngikapolok luche luuchik kingita Mordekai tamasi, “Nyo bo iwounitor iyong akiwap ngakiro na adungu ekapolon?”

⁴Emaimayete kesi Mordekai akolongit daang, nakaneni towou Mordekai akiirar ngakiro kech, tolimok tama, “Arai ayong Eyaudit. Nyariedikokini ayong Aman.” Apot kesi tolimokis Aman ngakiro a Mordekai esakete akiyen na elimuni ngesi kotere eboyor a Mordekai.

⁵Ani ingolikini Aman atamar awou Mordekai ariedikokin kori akijuur alongaren keng, abu tongo noi.

⁶Ani eanyuni atamar erai Mordekai Eyaudit, totiaku atamar nyitemokino akirirare Mordekai alopei. Totiaku ngesi amunyar Ngiyaudi daang anakwap a Persia kadaang.

⁷Ekaru lo a ngitomon ka ngiarei lo araakar Kerkesi ekapolon, elap lo ekingaren lo enyaritae Nisan, abu Aman todung atamar taramae ekura (anyaritae ekura ngolo Purim) taanyunere akolongit ka elap lo esubakinere ngakiro nasek atiakunit ngesi. Apon totiakunae akolongit na ngatomon ka ngauni a elap alo a ngitomon ka ngiarei alo enyaritae Adar.

⁸Sodi tolimok Aman ekapolon tama, “Eyakasi ngitunga a ekitela a eche epetakina nakwap kon wadaang nabo eyakasi lowaitin daang a akwap. Etiakak ngitalio kech ka lua ngitunga aluche kadaang. Nyiwapito kesi ngitalio kon, ekapolon. Nyejoikinit tokona iyong irubakini anaikinit ngakiro kech.

⁹Ekapolon, ani kisaki iyong, todung atamar taarae kesi. Ani kisubak nguna, alimu ayong atamar alemuni ngakwangae na iporito ngakiloi 340,000 ewaak ni iwaanakinio ngaropiyae a ekapolon tosubere etich a akwap.”

¹⁰Tobut ekapolon ekababaat keng nak emoit a Ngiyaudi lo anyaritae Aman lokookeng a Amedasa, lo erai alesit a Agag. Arai ekababaat ngolo emachar lo itodiuni atamar erai ngakiro na alimun ngaka ekapolon.

¹¹Tolimok ekapolon Aman tama, “Eraakasi ngaropiyae ngakon, eraakasi ngitunga dang ngikon. Tosubea kesi nacha isaki iyong.”

¹²Akolongit na ngatomon ka ngauni a elap alo ekingaren, tanyarau Aman ngikegirak a ekapolon todungok atamar kigira ngabaruae sodi kilokonyo a ngabukui kadaang ka ekigire daang a akwap, sodi yaarae lokapolok, ka ngikapolok a ngiwaitin a akwap ta ngikapolok luuchik daang. Apon ngabaruae nguna kipotoroe a ekiro a Kerkesi tatapakinae emachar a ekababaat keng.

¹³Apot ngimeanara yaasi ngabaruae nguna lowaitin daang a akwap. Egiritae atamar akolongit na ngatomon ka ngauni a elap alo enyaritae Adar, esakitae Ngiyaudi daang taarae, napei aluuchik tanang lumojong, napei anaberu tanang lode. Esakitae kesi eario emam akisienut, sodi todemarae ngiboro kech.

¹⁴Asakitae akiroit ngina ikekinio ngitunga daang alowaitin kadaang, sodi toyenea itwaan daang na enangea akolongit ngina.

¹⁵Loger lo adungunitor ekapolon, apon akiroit ngina tolimoroe alore aloapolon enyaritae Susa. Yaasi ngimeanara ngakiro nguna lowaitin luche a akwap. Apot ekapolon ka Aman kiboikinos tamata aapei, toriangakina ngitunga a ere a Susa.