Read turkana Esita 5 Bible Online

Esita 5 - turkana bible

Esita 5

¹Akolongit na ngauni na aronitor Esita akimuj, abu ngesi tanap ngiworui keng lua apolou, tolot towo analaar ana alotooma a akai a ekapolon, ingoliarit namaniyat na ayei ekicholong a ekapolon. Ayei ekapolon tooma ebooyi alokicholong keng engoliarit lokidor.

²Ani ingolikini ekapolon Esita, abu tomina dio akikekin Esita aburo keng a apolou na egolit. Sodi bu Esita tatap akou a aburo.

³Kingit ekapolon Esita tama, “Nyaai akapolon Esita? Tolimokinae ibore ni isaki iyong, tani kerai epewae a apolou kang kiinakinio.”

⁴Tatachu Esita tama, “Ekapolon, ani kichamuni, kepeyounit ayong iyong ka Aman pot takae ebong nakimuj nakasubakinit ayong esi.”

⁵Atipei abu ekapolon todungok Aman atamar bu, sodi toloto toliworos ngipeyok a Esita. Sodi toloto ekapolon ka Aman akimuj anawi a Esita.

⁶Ani esaa lo amaasa kesi emuna, kingit ekapolon Esita tama, “Tolimokinae ibore ni isaki iyong, kiinakinio. Kainakini ayong iyong ibore ni isaki tani kerai epewae a apolou kang.”

⁷Tatachu Esita tama, “Ngakiro kang nugu,

⁸ekapolon, ani kijoikis iyong ngakiro na asaki ayong, kepeyounit iyong ka Aman pot moi nakimuj ache nakasubakini ayong esi. Moi ngesi kalimokinea ayong iyong ibore ni asaki.”

⁹Torotok Aman anakimuj elakara ebala etau chuu. Ani anipei, kingolik Mordekai alokidor a akai a ekapolon. Ani ewouni Mordekai anyoun kidodik Aman arimatoi na etorunio neni, abu Aman tongo noi.

¹⁰Nakaneni totitinyik ngesi tolot nawi. Ani erumor kipeyou ngesi ngipaalon keng nawi keng dio tanyara aberu keng dang na anyaritae Serech bu neni.

¹¹Kiwogakin Aman kisisa eger lo ebaritor ngesi, kimaru talokookeng, ka eger lo ainakinea ekapolon ngesi etich loa apolou, ka eger lo epoloo ngesi akidwang ngikapolok luche luuchik daang a ekapolon.

¹²Torubak Aman iruoro ebala, “Tani eyakasi nguna daang, emam ichetwaan epeyou akapolon Esita nakimuj alokai keng pearai ekapolon ka ayong, nabo kipeyounitoe moi nabo dang.

¹³Nakaneni emam ngakiro nugu daang nakajoikinete ayong erai cha keringa ayong etee Eyaudit lobe Mordekai ibooyi alokidor a akai a ekapolon.”

¹⁴Sodi apot aberu keng ka ngipaalon keng daang tolimokis ngesi kona, “Nyo peidukio iyong ngakito na inenekinio taarere na eraakasi aoyau kech ngamitae ngatomwon-arei ka ngaarei? Ani moi nataparach tolimok ekapolon atamar tomiedakinae Mordekai nakito nguna totoan, sodi tolot iyong nakimuj ilakara.” Apot ngakiro nguna tojoikis Aman, sodi todukok ngakito nguna.