Read turkana Esita 6 Bible Online

Esita 6 - turkana bible

Esita 6

¹Akolongit ngina nakwaare kikoler ekapolon. Todung ngesi atamar yaunae ngakitabea na igiritae ngakiro a apolou kisomakinae ngesi.

²Ewae lo esomao, ayakasi ngakiro a Mordekai nakolong angichunea ngakiro na atukitere akiar ekapolon. Bigtana ka Terech kesi atukito akiar ekapolon. Araakasi kesi ngikasubak etich a akai a ekapolon lu eyokiyete ngamaniyae a ekapolon.

³ Kingis ekapolon tama, “Anukiro kipot ngoni atosubakineta Mordekai ebusioto ngakiro nugu?” Tatachut ngikasubak etich keng tamasi, “Emam ngakiro asubakinere ngesi.”

⁴Kingit ekapolon kesi tama, “Eyei ekapolon loochi lo eyei nalaar a?” Esaa lopei ngolo alomunea Aman nalaar. Abunit ngesi alimokin ekapolon atamar kinenekinoe Aman nakito na adukitoe taarae.

⁵Sodi tatachut ngikasubak etich tamasi, “Eyei Aman nege, esaki aanyun iyong.” Tolim ekapolon tama, “Kilomutu.”

⁶Sodi tolom Aman tooma, tolimok ekapolon ngesi tama, “Eyei itwaan ni asaki ayong lokojokon akidodikin arima. Anukiro asubakinea ayong itwaan ngini?” Kitama Aman alotau tama, “Ekoe, ngae tokona iche esaki ekapolon arima pearai ayong?”

⁷Sodi tolimok Aman ekapolon tama, “Itwaan ni esaki ekapolon akidodikin arimatoi ngini,

⁸inunae ngiworui a ekapolon lu enapeene ekapolon elope, ka angole na edokeene ekapolon elope, angole na etapakinitae ekiraun nakou.

⁹Ani erumor toseu epei a ngikapolok kon aluuchik lo erimae noi, kitanap itwaan ngini ngiworui ngulu, sodi torik angole edokit itwaan ngini, kisitor kiding aro a ere, irema ebala, ‘Kingolikisi eger lo etacheenea ekapolon itwaan ni esaki akidodikin arimatoi!’ ”

¹⁰Ani erumor tolimok ekapolon Aman tama, “Tonyou atipei tolem ngiworui ka angole, sodi tosubea ngakiro na arima nguna Mordekai Loyaudit, lo ibooyeene alokidor a akai a ekapolon.”

¹¹Sodi tolem Aman ngiworui ka angole, kitanap Mordekai ngiworui. Todoka Mordekai nangole, torik Aman ngesi kisitor kiding aro a ere elimokinit ngitunga irema ebala, “Kingolikisi eger lo etacheenea ekapolon itwaan ni esaki akidodikin arimatoi!”

¹²Ani erumor tobongo Mordekai lokidor a akai a ekapolon. Kikomak Aman nawi erapit ereet ani erumitotor ngileech.

¹³Tolimok ngesi aberu keng ka talopaekeng daang na asubakin. Sodi tolimut aberu keng ka talopaekeng lukoosok ngulu tamasi, “Kidema ro iyong lobe Mordekai ngolo apolou. Erai ngesi Eyaudit, nyipedori iyong akidwang ngesi. Iteni kidwangi ngesi iyong.”

¹⁴Ani eringa kesi iruorosi, todolut ngikasubak etich a ekapolon atipei arikor Aman nakimuj a Esita.