Read turkana Esita 7 Bible Online

Esita 7 - turkana bible

Esita 7

¹Sodi toloto ekapolon ka Aman akimuj ka Esita

²na ngaarei. Esaa lo amaasa kesi emuna, kingit ekapolon Esita tama, “Akapolon Esita, nyo isaki iyong? Tolimokinae kiinakin. Kainakini ayong iyong tani epewae a apolou kang.”

³Tatachu akapolon Esita tama, “Ani kijoikinito iyong ngakiro kang, ani kisaki iyong ainakin ayong ibore ni elipa, ibore ni elipa ayong ngesi atamar atoyara ayong ka ngitunga kang.

⁴Kigialar ayong ka ngitunga kang kitaar emam akisienut kitomunyar. Arai bo tarai ibore en ni kigialarere sua atarata ngikedalak dang, kelilingit pekechanit iyong. Nakaneni anang sua ni kimunyarere kikisar jik!”

⁵Sodi kingit ekapolon Kerkesi Esita tama, “Ngae ngini eyechakini asubakin ngakiro nguna? Ngae itwaan ngini?”

⁶Tatachak Esita tama, “Emoit kosi, ekaboliaran kosi, ngesi itwaan niaronon be Aman en!” Tobul Aman alongaren ekapolon.

⁷Tonyou ekapolon engoit noi, tolot namanat a akai a ekapolon. Toyen Aman atamar atiaku ekapolon jik akirirare ngesi kotere ngakiro nguna. Kidong Aman imaimai Esita atamar katoyuu nyakaar.

⁸Kimasakin Aman lokicholong lo ebooyo Esita imaimai esaki katorimakin. Ani ebonguni ekapolon anamanat elomuni namaniyat, kingolik ngakiro na asubi Aman. Tachalak ekapolon tama, “Oitiakoi kare! Esaki ekile logo atikoonor akapolon alongaren kang alokai kang a?” Napei alimunio ekapolon ngakiro nguna, todolut ngikasubak etich a ekapolon tobura akou a Aman.

⁹Abu epei kech lo anyaritae Aribona tolim tama, “Abu Aman ngoon toduk tani ekitoe loaret kai keng esaki kinenek Mordekai taar, tarai Mordekai kolong kiyuuni iyong ekapolon. Erai aoyau a ekitoe kangolo ngamitae ngatomwon-arei ka ngaarei!” Todung ekapolon tama, “Kinenekisi Aman lokitoe ngolo.”

¹⁰Apon Aman kinenekinoe lokitoe lokolong aduki ngesi esaki aarea Mordekai. Ani erumor toyon angoit a ekapolon.