Read turkana Esita 8 Bible Online

Esita 8 - turkana bible

Esita 8

¹Akolongit napei ngina, abu ekapolon Kerkesi nak Esita ngiboro a Aman daang. Arai Aman emoit a Ngiyaudi. Tolimok Esita ekapolon atamar kiruoro ngesi ka Mordekai, ani napei ngina jik, apon Mordekai tachamakinae eanyuununi ekapolon.

²Tobut ekapolon ekababaat lo ayei emachar keng nak Mordekai. Ademuni sek ngesi Aman ekababaat ngolo.

³Ani erumor kisuruor Esita ekapolon nabo, tadakakin nakejen keng igoro. Kimaima Esita ekapolon atamar kiratak ngakiro naaronok nasek atukit Aman lo arai alesit a Agag[5] asubea Ngiyaudi.

⁴Kikek ekapolon ngesi aburo a apolou na egolit, sodi tonyou Esita tolim tama,

⁵“Ani kijoikinito iyong ekapolon ngakiro kang, ani kikachit iyong ngakiro kang, tolim kare atamar kiratakinae ngakiro nangoon adunguni Aman nyeesubakin. Ngakiro nangoon adunguni lokookeng a Amedasa lo arai alesit a Agag atamar tomunyarae Ngiyaudi daang anapolou kon.

⁶Ekokini ayong anaikini ai, erai kesubakin naaronok nugu alotunga kang, taarae ngiyenet kang?”

⁷Sodi tolimok ekapolon Kerkesi akapolon Esita ka Mordekai Loyaudit tama, “Kingolikisi a, enenek ayong Aman lokitoe aar, kotere ngakiro na atukit asubea Ngiyaudi, nabo ainak Esita ngiboro keng.

⁸Nakaneni ngakiro na alimun a ekiro a ekapolon, tatapakinae emachar a ekapolon, nyepedorio akiloch. Tokona bocha, ipedorete esi akigirakin Ngiyaudi ngakiro nacha isakete esi, ipedorete akigir a ekiro kang tatapakis emachar kang.”

⁹Asubasi ngakiro nugu akolongit na ngatomwon-arei ka ngauni elap lo a nguuni lo enyaritae Sipan. Abu Mordekai tanyarau ngikegirak a ekapolon tolimok atamar kigira ngabaruae Loyaudi, ka ngikapolok a ewae a akwap, ka ngakasubak etich ta ngikapolok luuchik a ngiwaitin kadaang alu eraakasi 127 napei alo India tanang Kuch. Apon ngabaruae kigirarae lowae a akwap daang a ngabukui keng ka ekigire keng. Kigirakinae nabo Ngiyaudi a ngabukui kech ka ekigire kech.

¹⁰Kigir Mordekai ngabaruae a ekiro a ekapolon tatapak emachar a Kerkesi. Apot ngitunga lu adokito ngangolei nakapiranak na anok a ekapolon, yaasi ngabaruae nguna.

¹¹Egiritae ngabaruae nguna atamar achamaki ekapolon Ngiyaudi alorerea kadaang tojwoto toyuunos make. Ani kitijikis kesi ngitunga a akwap cha kadaang lu etingito ngiboro lujiet, alowae a akwap kadaang, esakitae kesi itijikinete ngitunga ngulu tomunyasi aapei ka ngaberu kech ta ngide kech. Taara kesi emam akisienut nyiidong tani ipei sodi tolemasi ngiboro kech.

¹²Asakitae ngakiro nguna esubakinosi anakwap a Persia kadaang akolongit nasek aseunitae atamar earere Ngiyaudi, akolongit na ngatomon ka ngauni a elap alo a ngitomon ka ngiarei alo enyaritae Adar.

¹³Asakitae ngakiro nguna elimorio erai etal toyen itwaan daang alowae a akwap kadaang. Sodi kiboikinos Ngiyaudi itemokino, tatachakineta ngakiro nguna alomoe kech enangi akolongit ngina.

¹⁴Loger lo adungunitor ekapolon, apot ngikameak ngangolei todokasi nangolei a ekapolon kipirakis lokojokon. Apon ngakiro nguna tolimoroe tani alore aloapolon anyaritae Susa.

¹⁵Torotok Mordekai alokai a ekapolon enapit ngiworui lua apolou lupusiek ka luakwaak, ka eworu lokaanikan ajokon lopus-arengan ta ekiraun loapolon lo a egolit. Talakaros ngitunga alorotin a ere a Susa kimariteto.

¹⁶Apot ngitai a Ngiyaudi talakunos, toliworos elakara, kikilenikinite.

¹⁷Alorerea kadaang ka ngiwaitin a akwap daang, nicha esomakinere abarua a ekapolon, apot Ngiyaudi tosubakis esukukuu kimuja talakaros. Apot tani ngitunga ngiche tamasi kirai Ngiyaudi kainyo aemito kesi Ngiyaudi.