Read turkana Esita 9 Bible Online

Esita 9 - turkana bible

Esita 9

¹Tanang akolongit na ngatomon ka ngauni a elap alo a ngitomon ka ngiarei alo anyaritae Adar. Akolongit ngina ngesi adikino ngakiro nakolong adunguni ekapolon esubakinere, ngesi asakitere ngimoe a Ngiyaudi idwangete Ngiyaudi. Nakaneni apot ngakiro kilochos, kidwanga Ngiyaudi ngimoe kech.

²Alorerea kadaang a ngiwaitin a akwap a Kerkesi, apot Ngiyaudi tochunakinos akitijikin itwaan cha daang ni iningokini akiwan kesi.

³Apot ngikapolok a ngiwaitin kadaang ka ngikapolok a ngiwaitin a akwap, ka ngikasubak etich ta ngikapolok luuchik a ekapolon, kingarakis Ngiyaudi kainyo aemito kesi daang Mordekai.

⁴Ayenio anakwap kadaang atamar abu Mordekai toliwor itwaan niyanat alokai a ekapolon, nabo adikino eyenikinio noi.

⁵Kotere nguna, apot Ngiyaudi tosubeta ngimoe kech ngakiro daang nacha asakete asubea. Apot kitijikis kesi a ngilengea, tongolongolaasi tomunyasi.

⁶Alo Susa alo arai ere loapolon, apot Ngiyaudi taara ngitunga ngamiae ngakan.

⁷Taara kesi tani Parchandasa, ka Dalpon, ka Asipasa,

⁸ka Porasa, ka Adalia, ka Aridasa,

⁹ka Parmachita, ka Arisai, ka Aridai ta Paisata.

¹⁰Araakasi lutomon ngulu talokookeng a emoit a Ngiyaudi alo anyaritae Aman alo arai lokookeng a Amedasa. Kaneni dang, apot Ngiyaudi nyeemoriakinosi ngiboro a ngitunga.

¹¹Akolongit napei ngina, apon tolimokinae ekapolon ekimar a ngitunga alu aario alo Susa.

¹²Sodi tolimok ekapolon Esita tama, “Alore a Susa bon, abe aar Ngiyaudi ngitunga ngamiae ngakan, aapei ka talokookeng a Aman lutomon. Ekoe, anu tokona kesubakis kesi alowaitin aluche a akwap! Nyo tokona isaki iyong? Esubakinio. Nyo tokona iche ilipa iyong? Kiinakinio.”

¹³Tatachu Esita tama, “Ani kijoikinit iyong ekapolon, kimiek Ngiyaudi lu eyakasi Susa tosubakis moi nabo ngakiro na ikote na akolongit kana. Todung atamar kinenekinoe ngawat kata lokookeng a Aman alutomon lokito.”

¹⁴Todung ekapolon atamar tosubae ngakiro nguna, apon ngakiro nguna tolimoroe alo Susa. Apon ngawat kata lokookeng a Aman alutomon kinenekinoe lokito luaret.

¹⁵Akolongit na ngatomon ka ngoomwon a elap alo enyaritae Adar, apot Ngiyaudi alo Susa tochunakin nabo taara ngitunga ngiche ngamiae ngauni alore. Nakaneni apot kesi nabo nyeemoriakinosi ngiboro a ngitunga.

¹⁶Apot Ngiyaudi a ngiwaitin aluche dang tochunakin tojwoto. Apot kesi tomunyasi ngimoe kech, taara ngitunga 75,000 lu aremokino kesi. Nakaneni nyemoriakina kesi ngiboro.

¹⁷Arai akolongit ngina na ngatomon ka ngauni a elap alo enyaritae Adar. Arai akolongit na atupit ngina, na ngatomon ka ngoomwon, apot kesi kiangasi nyeara ngitunga, kitiliwosi akolongit ngina na alakaraka ekimuje.

¹⁸Kaneni dang, apot Ngiyaudi lu ayakasi Susa kiangasi akolongit na ngatomon ka ngakan, kainyo aarete kesi ngitunga akolongit na ngatomon ka ngauni ka na ngatomon ka ngoomwon, kiangasi na ngatomon ka ngakan.

¹⁹Ngakiro nguna kesi itiliworitotor Ngiyaudi lu elomito lorerea luuchik akolongit na ngatomon ka ngoomwon a elap alo Adar aka alakara ka akiangar, imujio inanakinetei ngainakinet a akimuj.

²⁰Abu Mordekai kigir ngakiro na asubasi nguna daang, sodi kigira ngabaruae Loyaudi daang lu ayakasi diyete ka lukalonak anakwap a Persia kadaang.

²¹Asaki Mordekai Ngiyaudi kitiliwosi akolongit na ngatomon ka ngoomwon ka na ngatomon ka ngakan a elap alo Adar, esukukuu.

²²Ngirwa ngulu kesi kolong amunyareta Ngiyaudi ngimoe kech. Elap ngolo ngesi elochor akialolong kech toliwor alakara, kiloch akigoro kech toliwor esukukuu. Asakitae kesi kitiliwosi ngirwa ngulu lua esukukuu ka ngimujen. Kitiliwosi ngirwa lu einanakinotor make akimuj ka ainanakin ngikebootok ngainakinet.

²³Apot Ngiyaudi kiwapa ngakichikichiket a Mordekai toliwor esukukuu ngolo ekaru daang.

²⁴Aman lokookeng a Amedasa alo arai alesit a Agag, tarai emoit a Ngiyaudi, abu taram ekura lo enyaritae Purim esaki aanyunea akolongit na emunyarea Ngiyaudi. Areat ngesi akikisar kesi anakwap.

²⁵Nakaneni tolot Esita nia ekapolon, todung ekapolon kigirae atamar ngakiro naaronok nasek atukit Aman asubea Ngiyaudi, tobongokis ngesi. Apon ngesi ka talokookeng kinenekinoe lokito taarae.

²⁶Ngakiro nguna kesi enyaritere ngisukukui ngulu Purim. Kotere abarua a Mordekai ka ngakiro daang na asubakin Aloyaudi,

²⁷apot Ngiyaudi kitiliwosi etal kech, ka etal a ngalesea kech, ta etal a itwaan cha kadaang ani eliwor Eyaudit, atamar kirichunae ngirwa luarei ngulu ekaru daang loger lo echikakinitor Mordekai kesi.

²⁸Anawiyei kadaang a Ngiyaudi, analesea kadaang, alowaitin kadaang a akwap, ka ngirerea daang, apon totiakunae atamar ejoikinit ngirwa lua Purim itamunio kirichunae jiik.

²⁹Ani erumor apot Esita nakookeng a Abiyail ka Mordekai kigira abarua, kigirak Esita nabarua ngina atamar achamak ngakiro a Purim nasek egirit Mordekai.

³⁰Egirakinitae abarua ngina Ngiyaudi daang, sodi yaarae ngabaruae nguna lowaitin 127 a akwap a Persia daang. Agatakinit abarua ngina Ngiyaudi ekisil ka ajokis,

³¹nabo edodikinit kesi ka ngalesea kech atamar kirichakis ngirwa lua Purim itemokino loger lokolong sek erichakinitotor aroneenen akimuj ngirwa lu igorotor esutonokinete. Mordekai ka akapolon Esita kesi adungunete ngakiro nguna.

³²Ngakiro na adunguni Esita echamakinit ngitalio a Purim, apon kigirae nakitab.