Read turkana Apudunet 1 Bible Online

Apudunet 1 - turkana bible

Apudunet 1

¹Ngirora a talokookeng a Yakobo alu erukorete ka Yakobo Misiri, erukito epei kech daang ka ngitunga a awi keng, kesi ta

²Reuben, ka Simeon, ka Lawi, ka Yuda,

³ka Isakar, ka Sebulun, ka Benjamen,

⁴ka Dan, ka Naputal, ka Gad, ta Acher.

⁵Araakasi ngalesea daang a Yakobo ngitunga ngitomwon-kaarei. Esiaunit sek lokookeng Yosep Misiri.

⁶Ani ekisidi, totoaka Yosep ka talokaatokeng daang, ta ngitunga a ales kangina daang.

⁷ Nakaneni toureta ngalesea a Ngisirael talalaketa noi, sodi kilelebunos kesi nakwap.

⁸Abu ekapolon eche lo peayeni Yosep topolok akwap a Misiri.

⁹Tolimok ngesi ngitunga keng tama, “Elalak Ngisirael lugu noi nabo ejwoko kidwangito ngoni.

¹⁰Ejoikinit kisakuni erot lo kiratakinea nyiatakinos talalaketa nabo noi. Toliwor ani na kiremere ngoni, kimorikinos kesi ka ngimoe yok kitijwoto ngoni sodi tosiwa[1] anakwap.”

¹¹Sodi toseut Ngimisiri ngikasubak etich toweikis Ngisirael toliwor isilelenyete kesi a etich aloationon. Toduko Ngisirael ngirerea a Pisom ka Rameses toliworos kesi ikachanakinio akimuj a ekapolon a Misiri.

¹²Nakaneni tani na echekiyaritotor Ngimisiri Ngisirael kongina, apot Ngisirael talalaketa noi topetakin akwap wadaang. Toema Ngimisiri Ngisirael.

¹³Sodi kitusuba kesi Ngisirael etich a eger aloationon.

¹⁴Kitorono eboyor kech ani etusubeta etich loationon a ematapar. Alotich kadaang, alo asubete kesi, kitusubae a ationis.

¹⁵Kisuruor ekapolon a Misiri ngaberu ngaarei, anyaritae apei Chipira, tanyaritetei nache Pua. Araakasi ngaberu nguna na esidouniyete ngaberu a Ngieburaniae.

¹⁶Tolimok ekapolon kesi tama, “Ani isidounete ngaberu a Ngieburaniae, taara ikoku nisapat, kimiekis nipese toyar.”

¹⁷Nakaneni akerito ngaberu na isidouniyete nache nguna Akuj, nyiwapa kesi ngakiro a ekapolon. Apot kesi kimiekis ngide lusapa eyarete.

¹⁸Sodi tanyara ekapolon ngaberu na esidouniyete nache nguna kingit tama, “Nyo isubeta esi kona? Nyo imiekineta esi ngide lusapa eyarete?”

¹⁹Tatachakis ngaberu nguna ngesi tamasi, “Nyetiono akidoun a ngaberu a Ngieburaniae loger ana a Ngimisiri, idouniyete eringa sua nyenanga ni eyakasi kesi.”

²⁰Sodi kingarak Akuj ngaberu na esidouniyete nache niajokon. Talalaketa Ngisirael toliworos lukajwok.

²¹Ani kona akeritotor ngaberu na esidouniyete nache Akuj, kitaanyu Akuj kesi ngide ka ngawiyei na eraakasi ngakech a ngakulepek.

²² Sodi todungok ekapolon a Misiri ngitunga daang a akwap keng tama, “Ikoku nisapat nia Ngieburaniae daang idounio, tachakakisi nangolol a Nili, nakaneni kimiekisi lupesur toyara.”