Read turkana Apudunet 10 Bible Online

Apudunet 10 - turkana bible

Apudunet 10

¹Emaase Sodi tolimok Ekapolon Akuj Musa tama, “Kape taanyu ekapolon. Etiliwo ayong ngesi ka ngikasubak etich keng lu ichanaka noi, sodi atosubea ngakitoodikinet nakailiilok nugu anikech,

²sodi tolimokineta esi ngide kus ka ngitatae kus eger lo etabangaaniarea ayong Ngimisiri na asubea ngakitoodikinet nakailiilok. Iyenunete esi daang atamar arai ayong Ekapolon Akuj.”

³Sodi toloto Musa ka Aron nia ekapolon tolimokis tamasi, “Ebala Ekapolon Akuj, na erai Akuj a Ngieburaniae kona, ‘Irubakini iyong iwounit akitiditeun anikeng tanang ori? Kimiek ngitunga kang toloto kepeyokis ayong.

⁴Ani kirubak iyong iwounit, ayauni ayong emaase nakwap kon moi.

⁵Elalakearosi kesi noi toburuchiasi ngalup. Enyamete kesi ibore daang ni nyinyasuna ngamoru a akiru, tani ngikito lu idongito.

⁶Ilelebunosi kesi nakais kon ka nakais a ngikasubak etich kon kadaang, ta ngitunga kon daang. Erokearosi kesi noi akidwang ibore daang ni aanyungasi taapakon nakanuan.’ ” Sodi torei Musa torotok.

⁷Apot ngikasubak etich a ekapolon a Misiri tolimokis ekapolon tamasi, “Kichani itwaan en ngoni tanang ori? Kimiek Ngisirael toloto kipeyonokis Ekapolon Akuj, na erai Akuj kech. Nyeyena iyong atamar enyasun akwap a Misiri a?”

⁸Sodi tobuunae Musa ka Aron nia ekapolon, tolimok ngesi kesi tama, “Kapesi kipeyonokisi Ekapolon Akuj, na erai Akuj kus. Alutunga mono eloose?”

⁹Tatachak Musa tama, “Kilosi sua daang, ka ngide kosi, aapei ta ngitunga lumojong. Kirukori ka talokookosi ka tanakookosi, atorujasi ngamesekin, ka ngaanei, ta ngaatuk, kainyo kilosi sua akisub esukukuu lo kirimar Ekapolon Akuj.”

¹⁰Tolim ekapolon tama, “Ekongi ayong alimit Ekapolon Akuj atamar nyekemiekini ayong esi irukorete ka ngaberu kus ta ngide! Idodiunit ibore ngini atamar eyakasi ngakiro naaronok isakete esi asubakin.

¹¹Mam! Toloto ngikiliok make akipeyonokin Ekapolon Akuj kerai ibore ni isakete esi ngini.” Sodi kitwarakinae Musa ka Aron ani a ekapolon.

¹²Tolimok Ekapolon Akuj Musa tama, “Kikea akan kon kidiama bu emaase nakwap a Misiri. Epote kesi tadaka ibore daang ni erupunit, ibore daang ni abuchun anamoru a akiru.”

¹³Sodi kikea Musa aburo keng, yau Ekapolon Akuj ekuwam alo kide tokutak akwap apaaran juui towar, ta akwaar kiiya kiwala. Ani enangi nataparach, torukaunae ekuwam keyau emaase.

¹⁴Pot kesi a ngasepicho topetakin akwap wadaang. Arai asepich a emaase nakaalan noi nakolong nyeanyungara a ache kori nyeanyungario nabo.

¹⁵ Toburuchia amaase akwap toribok ngalup. Kirika emaase ibore daang ni aisikinete ngamoru a akiru, kirika tani ageor na ayei lokito. Emam ibore nikaliban ni abu kidong lokitoe tani epei kori emam enyait edongit nakwap daang a Misiri.

¹⁶Sodi tanyarau ekapolon Musa atipei tolimok tama, “Asechakinit ayong Ekapolon Akuj, na erai Akuj kus, ka esi dang.

¹⁷Torimakisi tokona akisech kang arimakinet naga bon, sodi kilipa Ekapolon Akuj, na erai Akuj kus tolema eriras lokaaran logo anikang.”

¹⁸Torotok Musa ani a ekapolon tolot kilip Ekapolon Akuj.

¹⁹Nakaneni kibele Akuj ekuwam loa akide toliwor ekuwam lotiapolon a atoo, lo akutari emaase tachaka nanam a Chamu. Emam tani emaase epei abu kidong nakwap a Misiri.

²⁰Nakaneni kitiliwo Ekapolon Akuj ekapolon a Misiri lo ichanana noi, towou akimiekin Ngisirael toloto. Aribu

²¹Tolimok Ekapolon Akuj Musa tama, “Kikea akan kon kidiama, ebuni aribu nakirion chuch toburuchia akwap daang a Misiri.”

²²Kikea Musa akan keng kidiama, sodi toribok akwap daang a Misiri chuch a ngirwa a nguuni.

²³ Tongop ngitunga a Misiri kona eanyungarete luche, emam itwaan abu torotok alokai keng esaa ngolo. Nakaneni ayei akicha ni alomito Ngisirael.

²⁴Tanyarau ekapolon a Misiri Musa tolimok tama, “Kapesi kipeyoto Ekapolon Akuj. Kirukosi tani ka ngide kus, ta ngaberu kus. Nakaneni idongete ngamesekin kus, ka ngaanei, ta ngaatuk.”

²⁵Tatachak Musa tama, “Nakinae robo iyong sua ngibaren lu kipeyoo Ekapolon Akuj, na erai Akuj kosi.

²⁶Kiramari sua ngibaren kosi, emam tani ipei ni idongi. Kiseuni sua ngikulepek ngibaren lu kipeyoo Ekapolon Akuj, na erai Akuj kosi. Nakaneni ani eringa sua nyenanga inaa, nyikiyeni atamar alubaren kipeyoo Akuj.”

²⁷Kitiliwo Ekapolon Akuj ekapolon a Misiri lo ichanana noi, towou akimiekin kesi toloto.

²⁸Tolimok ekapolon Musa tama, “Kape kane! Tochoite kisingolikin ayong nabo! Akolongit nakengolikinea ayong iyong, itoani iyong!”

²⁹Tatachak Musa tama, “Iyook iyong nguna. Nyikianyungari iyong ayong nabo.”