Read turkana Apudunet 11 Bible Online

Apudunet 11 - turkana bible

Apudunet 11

¹Tolimok Ekapolon Akuj Musa tama, “Ameuni ayong eriras epei bon ni eyei ekapolon a Misiri ka ngitunga keng. Ani erumor kimiek ngesi esi toloto. Kitwarakini ngesi esi daang kane.

²Kape tokona kiruoro ka Ngisirael tolimok kesi atamar toloto nia ngikidunyet kech kiliput asir a ngasua ka na egolit.”

³Kitiliwo Ekapolon Akuj Ngimisiri lu idodiunito arimatoi ani a Ngisirael. Engolikinito ngikasubak etich a ekapolon a Misiri ka ngitunga daang atamar arai Musa itwaan ni eyenikinitae noi.

⁴Sodi tolimok Musa ekapolon tama, “Ebala Ekapolon Akuj kona, ‘Kiding akwaar, etori ayong kiding akwap a Misiri.

⁵Etoani ikoku nisapat daang ni ekingaren anakwap a Misiri, napei ani eyei lokookeng a ekapolon a Misiri lo irumi apolou, tanang nia lokookeng a aberu anakedalan erai akerian ngikinyam. Tani ibarasit ni erai ika ekingaren euriunio, etoani.

⁶Emini akigoro naaronon nakwap daang a Misiri, nyemino akigoro na ikoni ngina a ache kori nyemini nabo jik.

⁷Nakaneni nyikomokini tani nyiingok ani eyakasi Ngisirael kori nyerukinete tani ngibaren kech. Sodi toyeneta esi atamar atiakit ayong Ekapolon Akuj Ngimisiri ka Ngisirael.’ ”

⁸Tolim Musa ngakiro narumoret tama, “Epote ngikasubak etich kon daang kijuuruoto alongaren kang, sodi kemaima ayong esakete atoriko ngitunga kang daang atolot. Ani ekisidi kanguna, anyouni ayong atolot.” Sodi torotok Musa ani a ekapolon a Misiri engoit noi.

⁹Alimokini sek Ekapolon Akuj Musa tama, “Erubakini ekapolon ewounit akiirar ngakiro kus, sodi atosubea ayong ngakitoodikinet nakailiilok nakaalak alo Misiri.”

¹⁰Tosuba Musa ka Aron ngakitoodikinet nakailiilok alongaren ekapolon, nakaneni kitiliwo Ekapolon Akuj ekapolon a Misiri lo ichanana noi, sodi towou ngesi akimiekin Ngisirael torotokis anakwap keng.