Read turkana Apudunet 12 Bible Online

Apudunet 12 - turkana bible

Apudunet 12

¹Esuruori Ekapolon Akuj Musa ka Aron alo Misiri tolimok tama,

²“Erai elap logo elap lo ekingaren a ngilapio a ekaru kus.

³Tolimokisi Ngisirael daang atamar, akolongit na ngatomon a elap kalo, elemuni itwaan daang imesek nikile kori ikale kotere ngitunga a awi keng.

⁴Ani kekidioko ngitunga a awi a apei, pekepedorete akirikar ibarasit ipei, tolemut ngesi ka ekidunyet keng ibarasit, tomora itemem ka ekimar a ngitunga ka etiae lo epedori itwaan daang akinyam.

⁵Iseuni iyong anamesekin kori anaanei, nakaneni ejoikinit erai ni ekaru a epei, nikile ni emam ni ichwangakina.

⁶Ani nakwaare a akolongit ana ngatomon ka ngoomwon a elap, earete Ngisirael daang ngibaren.

⁷Elemunete ngitunga ngaakot ngache kiwasakis lowaitin ngiarei a ngidorin ka ewae lo alokidiama a ngidorin a akai ana enyameta kesi akiring a ngibaren.

⁸Akolongit ngina nakwaare, epeyo akiring tanyamae aapei ka ngikito luadwarak ta ngamugati na emam ekitoe lo itubui.

⁹Tochoito inyamete tani nadiochichi ejon kori ipotoi, nakaneni topeo daang imorikina aapei ka akou, ka ngakejen, ta ngiboro a akook.

¹⁰Nyiimiekis tani nadiochichi eperi kiwalak. Ani keyei na eperi kiwalak ejoikinit inomio.

¹¹Ejoikinit esi inyamete ikirikirasi, tanapa ngiworui ka ngamuk na inyounitotor alosit, ka akiting aburo, kainyo erai akolongit ngina esukukuu a Adeparet kang, nakarimare ayong, Ekapolon Akuj.

¹²“Akolongit ngina nakwaare, etori ayong kiding akwap a Misiri, aari iuriuna ni ekingaren daang ni erai ikile, alotunga ka ngibaren. Nakaneni erirae ayong ngakujo daang a akwap a Misiri. Arai ayong Ekapolon Akuj.

¹³Eliworosi ngaakot na iwasakinio lowaitin luarei a ngidorin emachar lo idodiuni ngakais na iyakasi esi. Na aanyungarea ayong ngaakot, kadepari ayong esi nyakawan na eriraa Ngimisiri.

¹⁴ Ejoikinit esi itamununete akolongit naga toliwor akolongit a esukukuu a Ekapolon Akuj. Toliworos itamununete jiik.”

¹⁵Tolim Ekapolon Akuj tama, “A ngirwa a ngikan-kaarei, inyamete esi ngamugati na emam ekitoe lo itubui. Akolongit na ekingaren, tolemasi ekitoe lo itubui ngamugati anakais kus. Ani kenyam itwaan ngamugati na eyei ekitoe lo itubui, ngirwa lukan-kaarei ngulu, nyeringa itwaan ngini imarunitae atamar erai itwaan kang.

¹⁶Akolongit na ekingaren ka na ngakan-kaarei, ejoikinit esi iriameenete kipeyonokis Akuj. Emam etich esubio ngirwa ngulu, nakaneni ipedorete esi akipore na erai akimuj.

¹⁷Kirichakisi esukukuu a ngamugati anapadok kainyo erai akwaar ngina ngesi kolong epudunio ayong ngitela kus anakwap a Misiri. Kitamuunutu akwaar naga jiik toliwor akwaar a esukukuu.

¹⁸Atabong a akolongit ana ngatomon ka ngoomwon a elap alo ekingaren tanang ebong a akolongit ana ngatomwon-arei ka apei, nyiinyam ngamugati na eyei ekitoe lo itubui.

¹⁹A ngirwa a ngikan-kaarei, tolemasi ekitoe lo itubui ngamugati anakais kus, kainyo ani kenyam itwaan ngamugati na eyei ekitoe lo itubui, nyeringa itwaan ngini imarunitae atamar erai ipei a ngitunga kang alu eraakasi Ngisirael, tani kerai ngesi itwaan ni nyerai akwap ngina akeng, kori kerai ika akwap kangina.

²⁰ Nyiinyam ibore ni iwaakinitae ekitoe lo itubui. Anakais kus kadaang, tanyama ngamugati na emam ekitoe lo itubui.”

²¹Tanyarau Musa ngikarikok a Ngisirael daang sodi tolimok tama, “Toseu ipei kus daang imesek kori ikale taar, sodi tanyameta ngitunga a ngawiyei kus esukukuu a Adeparet.

²²Tolemutu akuyen a ekitoe enyaritae isopo,*g** kirepakis natubwa nachukul na eyakasi ngaakot a ibarasit, sodi kiwasakis ngaakot lowaitin luarei a ngidorin ka ewae loa alokidiama a ekidor a akai. Nyeerotok itwaan tani ipei anikus tanang nataparach.

²³Ani itori Ekapolon Akuj kiding akwap a Misiri taar Ngimisiri, ingolikini ngesi ngaakot alokidiama ngidorin ka ngiwaitin luarei a ngidorin, sodi nyiimiek ngesi emalaikat a akitu elomari nakais kus sodi kitaar esi.

²⁴Ejoikinit esi ka ngide kus iwapete ngitalio lugu jik.

²⁵Ani ilomarete esi nakwap nakichikak esi Ekapolon Akuj atamar kiinakini, ejoikinit esi irichakinete etal ngolo.

²⁶Ani kingita esi ngide kus tamasi, ‘Nyo eger a ngakiro kanu?’

²⁷ Itachakinete esi kesi tamasi, ‘Erai akipeyos a Adeparet na erimare Ekapolon Akuj, kainyo adepari kolong ngesi ngakais a Ngisirael alo Misiri. Aari ngesi Ngimisiri kimiek sua.’ ” Toriediko Ngisirael kilipa.

²⁸Sodi toloto kesi akisub na adungokini Ekapolon Akuj Musa ka Aron.

²⁹Ani enangi kiding akwaar, taar Ekapolon Akuj ngide lusapa daang lu ekingaren a Ngimisiri. Napei ani eyei lokookeng a ekapolon a Misiri, alo arai ekeruman apolou, tanang ni ayei lokookeng a itwaan ani aenitae alojela. Taarae tani ngiuriuna lu ekingaren a ngibaren kadaang.

³⁰Akolongit ngina nakwaare, tokienyut ekapolon ka ngikasubak etich keng. Ayei echale a akigoro lowaitin daang a Misiri, kainyo amam akai tani apei napeatoanitor ikoku nisapat.

³¹Akolongit ngina nakwaare, tanyarau ekapolon a Misiri Musa ka Aron tolimok tama, “Kapesi esi ka Ngisirael kus! Torotokisi anakwap kang, toloto kipeyonokis Ekapolon Akuj, loger lokolong ibalatar esi.

³² Torujasi ngamesekin, ka ngaanei, ta ngaatuk, sodi toloto. Kilipakinae ayong dang katopiar.”

³³Kibunyakis Ngimisiri ngitunga esakete torotokis alo Misiri, tamasi, “Kitoaki sua daang erai pekirotokis esi.”

³⁴Sodi kilelebikis ngitunga ngamugati na emam ekitoe lo itubui, kiwaakis napalaranga na imaare ngamugati, kilukakis loworui, sodi toriongakis losegeta.

³⁵Kepot Ngisirael tosuba ngakiro nasek alimokini Musa. Kiliput kesi Ngimisiri asir a ngasua ka na egolit, ta ngiworui.

³⁶ Kitiliwo Ekapolon Akuj Ngimisiri lu idodiunito arimatoi ani a Ngisirael, sodi nakis kesi ngiboro lu asakete. Tolemasi Ngisirael ebari a Ngimisiri a eger kangolo.

³⁷Torotokis Ngisirael a ngakejen alo Rameses tananga Sukos. Araakasi kesi ngikiliok ngabunge ngamiae ngakan-kapei, peimarunitae ngaberu ka ngide.

³⁸Kirukosi kesi ka ngitunga luche lukaalak, emeto ngamesekin, ka ngaanei, ta ngaatuk dang.

³⁹Kimata kesi a akim ngamugati na emam ekitoe lo itubui, a ngakiria ana ayaunete kesi alo Misiri, kainyo etwarakinio kesi alo Misiri atipei tongopik kona esubakinete akimuj kech ka akidorokin ngamugati na eyei ekitoe lo itubui.

⁴⁰Alomito Ngisirael Misiri a ngikaru a ngamiae a ngoomwon ka ngitomwon-uni.

⁴¹Ani akolongit na adaunotor ngikaru ngamiae ngoomwon ka ngitomwon-uni, torotokis ngitela daang a ngitunga a Ekapolon Akuj alo Misiri.

⁴² Akolongit ngina nakwaare, ngesi achoikinea Ekapolon Akuj Ngisirael kipud alo Misiri. Itiliworitae akwaar a akolongit kangina aka Ekapolon Akuj jik, na erai ekienyeneta Ngisirael.

⁴³Tolimok Ekapolon Akuj Musa ka Aron tama, “Ngitalio a esukukuu a Adeparet lugu, emam itwaan ni nyerai ika akwap kus ni enyami akimuj a Adeparet.

⁴⁴Nakaneni enyami ekedalan daang lo igielunete esi erai kilengera esi ngesi mono.

⁴⁵Nyenyami ekaloton kori ekasuban etich akimuj ngina.

⁴⁶Enyamio akimuj ngina daang alokai ana ipoore, nyenyamio anikalapatan. Nyebelio ngakoyo a ibarasit.

⁴⁷Enyamete Ngisirael daang akimuj a esukukuu kangolo.

⁴⁸Nakaneni nyenyami ekile lo nyilengeritae. Ani keyei itwaan ni nyerai ika akwap kus ni alom nakwap kus tasaki akinyam akimuj a esukukuu a Adeparet idodikinitor Ekapolon Akuj arimatoi, ejoikinit esi ilengerete mono ngikiliok lu eyakasi nawi keng. Sodi kisikokinae ngesi itwaan ni idounitoe erai Esiraelit, toliwor enyameene akimuj a esukukuu a Adeparet.

⁴⁹Iwapete Ngisirael ngikulepek ka ngitunga lu nyerai ngika akwap kus lu elomete nakwap kus, ngitalio ngulu.”

⁵⁰Kiwapa Ngisirael daang ka akisub ngakiro na adungokinit Ekapolon Akuj Musa ka Aron.

⁵¹ Akwaar ngina, kipud Ekapolon Akuj ngitela a Ngisirael anakwap a Misiri.