Read turkana Apudunet 13 Bible Online

Apudunet 13 - turkana bible

Apudunet 13

¹Tolimok Ekapolon Akuj Musa tama,

² “Kitaleu ngiuriuna lukiliok idounio ekingaren daang toliworos ngikang. Ikoku nisapat daang idounio ekingaren alo Isirael, ka ibarasit nikile euriunio ekingaren daang, erai ikang.”

³Tolimok Musa ngitunga tama, “Kitamutu akolongit naga. Erai akolongit naga nakolong irotokinioto esi alo Misiri, na erai akwap nakolong iraakatar esi ngikedalak. Akolongit naga ngesi nakolong kipudunio esi Ekapolon Akuj a agogongu anaationon. Nyiinyam ngamugati na eyei ekitoe lo itubui.

⁴Irotokinete esi alo Misiri akolongit naga, alolap alo ekingaren enyaritae Abib kalo.

⁵Ekongi kolong Ekapolon Akuj kichikak taapa kus atamar kiinakini esi akwap a Ngikanaan, ka Ngiiti, ka Ngiamor, ka Ngiipi, ta Ngiebus. Nakiyaunea ngesi esi nakwap na ileleba ngakile ka akimiet a ao, ejoikinit esi inyamete akimuj a esukukuu kangolo elap lo ekingaren a ekaru kadaang.

⁶Inyamete esi ngamugati napadok a ngirwa a ngikan-kaarei, ani akolongit na ngakan-kaarei, emini esukukuu lo idodikinere Ekapolon Akuj arimatoi.

⁷A ngirwa a ngikan-kaarei, nyiinyam ngamugati na iwaakinitae ekitoe lo itubui. Nyejoikinit ekitoe lo itubui ngamugati kori ngamugati na eyei ekitoe lo itubui epete nakwap kus.

⁸Ani isiakini esukukuu, kisisak talokookon atamar isubi iyong nguna daang kotere ngakiro nakisubea iyong Ekapolon Akuj na irotokinio iyong alo Misiri.

⁹Eliworosi ngakiro na iwapi iyong nguna emachar lo eenikinitae nakan kon kori loreet kon.[9] Kisitamuni iyong torubak isomae ka alimit etal a Ekapolon Akuj, kainyo kipuduni kolong ngesi iyong alo Misiri a agogongu anaationon.

¹⁰Tanyameene esukukuu ngolo ekaru daang, a esaa alo eseunitae.

¹¹“Kiyauni Ekapolon Akuj iyong nakwap a Ngikanaan nakolong ekongi ngesi nabo kichikak taapakon. Nakiinakinea ngesi iyong,

¹²ejoikinit iyong italeuni iuriuna ni ekingaren nikile toliwor ika Ekapolon Akuj. Ibarasit nikile daang ni euriunio ekingaren erai ika Ekapolon Akuj.

¹³Nakaneni ejoikinit iyong ilokonyuuni ani a Ekapolon Akuj itasikiria nikile ni ekingaren kilokony a imesek anikile. Ani pekisaki iyong akilokonyuun itasikiria, tobil emosiring keng. Ejoikinit iyong ilokonyuuni ikoku nisapat daang ni ekingaren.

¹⁴Ani monan kingit iyong lokookon atamar nyoni iwapitere ngakiro nugu, itachakini iyong ngesi tama, ‘Kipuduni ngoni Ekapolon Akuj alo Misiri a agogongu anaationon. Kirai kolong ngoni ngikedalak anakwap kangina.

¹⁵Ani na aliworor ekapolon a Misiri lo ichanana noi, towou akimiekin ngoni atoloto, taar Ekapolon Akuj iuriuna nikile ni ekingaren daang anakwap a Misiri napei anitwaan tanang nibarasit. Ngakiro nguna kesi kilemanakinea ngoni Ekapolon Akuj ibarasit nikile ni euriunio ekingaren, sodi elokonyuutu ngide yok lusapa.

¹⁶ Eliworosi ngakiro na kiwapi ngoni nguna emachar lo eenikinitae nakan yok ka loreetin yok.[10] Kisitamuni ngoni atamar kipuduni kolong ngoni Ekapolon Akuj alo Misiri a agogongu anaationon.’ ”

¹⁷Ani imiekini ekapolon a Misiri ngitunga toloto, abu Akuj nyiisitor kesi lorot lo itori lokwaas a anam a akwap a Ngipilisti, lo arai erot louriyen. Etamit Akuj kona, “Nyasaki ayong ngitunga kibeleto ngitamen kech sodi tobongosi Misiri na ingolikineta atamar kilomakini kesi ejie.”

¹⁸Nakaneni abu Akuj kisilod kesi kitoro lorot lo itori nariet na eteni nanam a Chamu. Atingito Ngisirael ngiboro a ejie.

¹⁹ Toting Musa akwaan a Yosep loger lokolong esikongio Yosep Ngisirael ichikichiki atamar kikokis neni. Alimuni Yosep tama, “Nakiyuunea esi Akuj, ejoikinit itingete akwaan kang tolemasi kane.”

²⁰Torotokis Ngisirael alo Sukos toloma nasalunet a ariet ni enyaritae Esam.

²¹Ani naparan, kingarenik Ekapolon Akuj kesi eyei napir a edou, kidodik kesi erot. Ani nakwaare, kingarenik Ekapolon Akuj kesi eyei napir a akim, nak kesi akicha. Asubi Ekapolon Akuj kongina sodi tolooso kesi naparan ka nakwaare.

²²Ayei apir a edou jiik ngaren ngitunga naparan, min apir a akim ngaren kech nakwaare.