Read turkana Apudunet 14 Bible Online

Apudunet 14 - turkana bible

Apudunet 14

¹Sodi tolimok Ekapolon Akuj Musa tama,

²“Tolimok Ngisirael tobongosi toloma ngaren Piairos, nakidingos a Migidol ka anam a Chamu, diyete ni enyaritae Baal Sepon.

³Etamari ekapolon a Misiri kori ewowooto Ngisirael anakwap, eratak ariet.

⁴Etiliwori ayong ekapolon lo ichanana noi, sodi kiwapu esi. Nakaneni aanyuni ayong ekipur na edwangea ekapolon ka ngasigerea keng. Sodi toyenut Ngimisiri atamar ayong arai Ekapolon Akuj.” Tosubakis Ngisirael ngakiro nguna loger lo alimokinitere.

⁵Ani elimokinio ekapolon a Misiri atamar asiiwakis ngitunga, kibeleto ngesi ka ngitunga keng ngitamen kech tamasi, “Anukiro kisubak ngoni? Kimiek ngoni Ngisirael esiyete, nakaneni nyeringa tokona kesi eraakasi ngikedalak yok nabo!”

⁶Kitonyou ekapolon aurukuk keng a ejie na irit angole, ta ngasigerea keng.

⁷Kirukosi ngesi ka ngaurukukui keng daang na irito ngangolei, imorikina aapei ka ngaurukukui naajokak erito ngangolei na araakasi ngamiae ngakan-kapei na ameto ngikarikok a ngasigerea.

⁸Kitiliwo Ekapolon Akuj ekapolon a Misiri lo ichanana noi, sodi kiwap Ngisirael lu aloose ikileenikinit.[11]

⁹Ngasigerea a Ngimisiri daang, ka ngangolei kech, ka ngaurukukui na irito ngangolei, ta ngikameak ngangolei, kiwapa kesi todolo ani alomito alokwaas a anam a Chamu, alo diyete Piairos ka Baal Sepon.

¹⁰Ani ingolikinete Ngisirael ekapolon a Misiri ka ngasigerea keng iwapuunito kesi, tobul kesi noi sodi kikaloikis Ekapolon Akuj esakete kingarak kesi.

¹¹Kingita Musa tamasi, “Amam kolong ngalielin alo Misiri a? Nyo kiyaunea iyong sua nege atotoaka anariet? Kingolik tokona ngakiro na isub iyong ani kipudunio sua alo Misiri!

¹²Pekilimokinit kolong sua iyong eringa nyerotokino atamar esubakinosi nugu a? Kilimokinit sua iyong atamar kimiek sua ebooyoto alo Misiri kirai ngikedalak a Ngimisiri. Ejok aliwor ngikedalak kaina akidwang atoakere kane anariet.”

¹³Tatachak Musa kesi tama, “Warasi nyikibul! Toweikisi sodi taanyungasi ngakiro na esubakini Ekapolon Akuj kitoyuunea esi akolongit naga. Nyianyungarete esi Ngimisiri lugu nabo jiik.

¹⁴Ekapolon Akuj ngesi eji alowae kus, nabo emam ibore isubakinete esi.”

¹⁵Tolimok Ekapolon Akuj Musa tama, “Nyo kigoronokinio iyong ayong? Tolimok Ngisirael toloto ngaren.

¹⁶Tolem aburo kon sodi kikea min kidiama anam. Epakasi ngakipi sodi kitoro Ngisirael nikoonon alokiding anam.

¹⁷Etiliwori ayong Ngimisiri lu ichanaka noi kiwapakis Ngisirael. Nakaneni aanyuni ayong ekipur ani edwangea ekapolon a Misiri, ka ngasigerea keng, ka ngaurukukui keng na irito ngangolei, ta ngikameak a ngaurukukui ana irito ngangolei.

¹⁸Ani na edwangea ayong kesi, eyenunete Ngimisiri atamar arai ayong Ekapolon Akuj.”

¹⁹Abu emalaikat a Akuj losek engareni ajore a Ngisirael, tobongo naabor kech. Torotok apir a edou dang alongaren kech, tamana naabor kech,

²⁰ min nakidingos a Ngimisiri ka Ngisirael. Kitiribok edou ewae loa Ngimisiri, nakaneni kiwaak akicha lowae loa Ngisirael. Nakaneni akwaar daang kiiya kiwala, nyeapikina ngajorei a ngasigerea a Ngimisiri ka na Ngisirael.

²¹Kikea Musa akan keng min kidiama anam, sodi kitukut Ekapolon Akuj ekuwam loapolon alo kide kijuka ngakipi a anam naabor. Tokut ekuwam ngolo kiiya kiwala, sodi kibele anam toliwor ngalup nakoonok. Tapakas ngakipi,

²²kitoro Ngisirael nalup nakoonok alokiding anam, kibakito ngitoroi a ngakipi alowaitin kadaang.

²³Kiwapakis Ngimisiri Ngisirael sodi tolomasi nanam aapei ka ngangolei kech, ka ngaurukukui na irito ngangolei, ta ngikameak a ngaurukukui ana irito ngangolei.

²⁴Ani eapikini akwap akiwalar, kingoliu Ekapolon Akuj anapir a akim ka apir a edou, tokienyik ajore a ngasigerea a Ngimisiri sodi kitubul kesi.

²⁵Kisipok ngesi ngaurukukui kech na irito ngangolei, toliwor epotikinit kesi alosit. Tolimut Ngimisiri tamasi, “Ibakit Ekapolon Akuj alowae a Ngisirael kitiji ngoni. Atorotokisi kane!”

²⁶Tolimok Ekapolon Akuj Musa tama, “Kikea akan kon min kidiama anam, tobongut ngakipi ni eyakasi Ngimisiri ka ngaurukukui kech na irito ngangolei, ta ngikameak a ngaurukukui ana irito ngangolei.”

²⁷Sodi kikea Musa akan keng min kidiama anam, ani echili nanyang tobongosi ngakipi nisek ayakasi. Tasaka Ngimisiri amatar kilanya ngakipi, nakaneni tachakak Ekapolon Akuj kesi daang nanam.

²⁸Tobongut ngakipi toburuchiasi ngaurukukui na irito ngangolei, ka ngikameak ngaurukukui na irito ngangolei, ta ngasigerea daang a Ngimisiri na ewapete Ngisirael tolomasi nanam. Emam tani ipei kech ni abu kidong.

²⁹Nakaneni kitoro Ngisirael nalup nakoonok na ayakasi kiding anam, kibakito ngitoroi a ngakipi alowaitin kadaang.

³⁰Akwaar ngina, toyuu Ekapolon Akuj Ngisirael ani a Ngimisiri, taanyungasi Ngisirael kesi eperete alokwaas a anam etoakito.

³¹Ani ingolikinete Ngisirael agogongu naationon edwangea Ekapolon Akuj Ngimisiri, tokera kesi Ekapolon Akuj. Tonupa kesi ngakiro a Ekapolon Akuj ka Musa lo arai ekasuban etich keng.