Read turkana Apudunet 15 Bible Online

Apudunet 15 - turkana bible

Apudunet 15

¹ Sodi toeokis Musa ka Ngisirael Ekapolon Akuj eeos logo ebalasi, “Aeokini ayong Ekapolon Akuj, kainyo asubaki ngesi na ipuroi noi edwang ngimoe. Achakaki ngesi ngangolei ka ngikameak kech tooma nanam.

²Ekapolon Akuj erai agogongu kang, ngesi ekusi ayong, ngesi kayuu ayong. Erai ngesi Akuj kang, epuruuni ayong ngesi, Akuj a apakang, aeo ayong ngakiro a apolou keng.

³Erai Ekapolon Akuj akajwon, Ekapolon Akuj ngesi erai ekiro keng.

⁴“Achakakini ngesi ngasigerea a Misiri ka ngaurukukui na irito ngangolei tooma nanam. Ngikarikok a ngasigerea kech nakajwok, tanyam anam a Chamu.

⁵Toburuchiasi kesi ngakipi a anam natuluk. Kilikosi kesi ngakipi tananga kwap loger a amoru.

⁶“Ekapolon Akuj, akan kon na aloteten, eyei apolou nakitimi. Ebilibilaari emoit kinyada.

⁷Idwangeene iyong ngimoe kon a apolou anaationon noi. Iniapanari angoit kon tonom kesi loger a nginyia.

⁸Ikutakini iyong anam sodi kiliirakin ngakipi. Towaa kiteneneto loger a awas. Togogonger ewae a anam lotuluk.

⁹Tolim emoit tama, ‘Ewapi ayong kesi erum. Atiaki ayong ebari kech, atolema daang lo asaki. Atingi ayong ekileng kang, sodi atomunya kesi.’

¹⁰Nakaneni Ekapolon Akuj, na ikutakinea iyong akutakinet apei bon, tanyam Ngimisiri daang anam. Tolomasi kesi nakipi natuluk, loger a asuat anaapotion.

¹¹“Ee Ekapolon Akuj, anikuj mono ikwaanatar iyong anakujo? Ngae ejok akitaleun keng, loger kon? Ngae asubi ngakitoodikinet nakailiilok, ka nakatalarak loger kon?

¹²Itorwaari iyong akan kon na aloteten, sodi kilikosi ngalup ngimoe kosi.

¹³Iyookini iyong akichikakinet kon, torik ngitunga lu iyuuni iyong. Iriki iyong kesi a agogongu kon, tananga nakwap kon na italeuno.

¹⁴Eirasi ngibukui, aema kesi amaranikis. Abul Ngipilisti.

¹⁵Abul ngikapolok a akwap a Edom. Emaranete ngikiliok lukajwok a akwap a Moab. Alilimiyosi ngitunga a Kanaan daang.

¹⁶Amin ebuloi ka akurianu nikech. Ekapolon Akuj, iteete kesi agogongu kon, nakaneni ewaasi eemito emam ibore esubakinete, tanang ngitunga kon, Ekapolon Akuj, epote kitorut neni. Ngitunga kon lu ilachakini iyong anaenanot.

¹⁷Iyauni iyong kesi kiwaak moru kon. Neni iseu iyong Ekapolon Akuj, aliwor awi kon. Akai na idukok iyong alope.

¹⁸Ekapolon Akuj, iliwor iyong ekapolon lokajik.”

¹⁹Etorete Ngisirael nikoonon alokiding anam. Nakaneni ani elomarete ngaurukukui na irito ngangolei ka ngangolei kech ta ngikameak ngangolei tooma nanam, tobuu Ekapolon Akuj ngakipi sodi toburuchiasi kesi daang.

²⁰Tolem akadwaran a Akuj na anyaritae Miriam, na arai nakaatokeng a Aron aekiek, sodi kiwapakis ngesi ngaberu daang ideese ngaekieke, kidongaate.

²¹Toeok Miriam kimaranak ebala, “Toeonokisi Ekapolon Akuj, kainyo edwang ngesi ngimoe niajokon. Achakaki ngesi ngangolei, ka ngikameak kech tooma nanam.”

²²Abu Musa toriko Ngisirael nanam a Chamu tananga nariet na enyaritae Chur. Toloto kesi anariet ngirwa nguuni, nakaneni tongopikis ngakipi.

²³Tanangut kesi ni enyaritae Mara. Nyemata kesi ngakipi na ayakasi Mara kainyo adwarak tel. Ngakiro nguna enyaritere neni Mara.[12]

²⁴Kisuburata ngitunga Musa kingita tamasi, “Nyoni kimasi sua?”

²⁵Kilip Musa Ekapolon Akuj kikaloik, sodi kidodik Ekapolon Akuj ngesi akitoe na achakakini ngesi nakipi, sodi tojoketa ngakipi toliworos namatan. Nak Ekapolon Akuj kesi kaneni ngitalio lu iwapete, sodi nabo kining ngesi kesi kaneni.

²⁶Tolim ngesi tama, “Ani kiwap esi ngakiro kang lokojokon tosuba na abala ayong iyookino ka akirichun ngitalio kang, nyekerirae ayong esi a ngidekesinei alu ayauni ayong nia Ngimisiri. Arai ayong Ekapolon Akuj naketedeki esi tangalekis.”

²⁷Ani erumor tanangut kesi ni enyaritae Elim. Ayakasi neni ngileleae ngitomon ka ngiarei ta ngingolea ngitomwon-kaarei. Toloma kesi diyete ngakipi kaneni.