Read turkana Apudunet 16 Bible Online

Apudunet 16 - turkana bible

Apudunet 16

¹Torotokis Ngisirael daang ani enyaritae Elim. Ani enangi akolongit na ngatomon ka ngakan a elap alo a ngiarei arotokinioto kesi alo Misiri, tananga kesi nariet enyaritae Sin, na ayei nakidingos a Elim ka Sinai.

²Kisuburata kesi daang Musa ka Aron anariet kangina

³ tolimokis tamasi, “Arai bo kolong kitaar sua Ekapolon Akuj alo Misiri dang. Kibooyi sua kaina kinyami akiring ka akimuj cha daang nakisakit sua. Nakaneni kiyau tokona iyong sua daang nariet naga kitaar akoro.”

⁴Tolimok Ekapolon Akuj Musa tama, “Emiekini tokona ayong akimuj totep anadis loger a akiru kotere esi daang. Ejoikinit ngitunga eloseenete akolongit daang kideput akimuj na akolongit kangina. Aroi ayong kesi a erot kangolo atoyen kiwapete etal kang.

⁵Ani akolongit na ngakan-kapei, kideput akimuj ngakidepunet ngaarei ana etia napalem, tosubakis.”

⁶Sodi tolimokis Musa ka Aron Ngisirael daang tamasi, “Atabong naga, iyenunete esi atamar Ekapolon Akuj kolong kipuduni esi alo Misiri.

⁷Ianyungarete esi nataparach akicha naakwaan kea alongaren Ekapolon Akuj. Eira ngesi ngakiro na isuburaata esi ngesi. Erai ngesi isuburaate esi kainyo kiwapit sua dang ngakiro keng.”

⁸Sodi tolim Musa tama, “Ekapolon Akuj ngesi kiinakini esi akiring na inyamete ebong ka akimuj na isakete esi nataparach, kainyo eira ngesi eburas lo isuburaata esi ngesi. Nakisuburaata esi sua, erai Ekapolon Akuj isuburaate esi.”

⁹Tolimok Musa Aron tama, “Tolimok ngitunga daang pot towaa alongaren Ekapolon Akuj, kainyo eira ngesi eburas kech.”

¹⁰Ani na esuruorea Aron ngitunga daang, kingoliasi kesi nariet. Tatakanu akwangis naakwaan kea a Ekapolon Akuj atipei alodou.

¹¹Tolimok Ekapolon Akuj Musa tama,

¹²“Eira ayong eburas a Ngisirael. Tolimok kesi atamar ani ipiripiruuni, eanyunete kesi akiring na enyamete. Ani enangi ebong, eanyunete kesi akimuj daang na esakete. Sodi toyena kesi atamar ayong Ekapolon Akuj ngesi arai Akuj kech.”

¹³Ani enangi ebong, toporut ngalurui nakaalak toburuchiasi ni alomitae neni. Ayakasi ngakop wadaang a adakar na anangea nataparach.

¹⁴Ani na akutareta ngakop, min ibore nikawarawaran tononok kidiama ngalup anariet. Awariwari ngesi loger a eloch.

¹⁵ Ani eanyungarete Ngisirael, peayenete atamar erai nyo, sodi kingitanaros make tamasi, “Nyoni en?” Tolimok Musa kesi tama, “Akimuj naga ngesi kiinak esi Ekapolon Akuj tanyama.

¹⁶ Adungu Ekapolon Akuj atamar kidepu ipei kus daang etiae lo esaki ngesi, ngakitemiet ngaarei kotere itwaan ipei a awi a apei.”

¹⁷Tosuba Ngisirael kongina. Kideput ngiche nakaalak, kideput ngiche nadikidio.

¹⁸Ani itemio, ngulu edepunito nakaalak, pealalak nakech noi. Ani ngulu edepunito nadikidio, peakidioko nakech noi. Edepunit itwaan daang na etemokino.

¹⁹Tolimok Musa kesi tama, “Nyejoikinit itwaan imiekini akimuj eperi kiwalak.”

²⁰Nakaneni towout ngiche akiirar ngakiro na alimuni Musa, kikachakis akimuj ache kimiekis eperi kiwalak. Pena ngikur nakimuj ngina tobos, sodi tongoik Musa kesi.

²¹ Ataparach daang, kidepu itwaan daang akimuj na etemokino, ani erirauni akolong, tokeia akimuj na edongit nalup.

²²Ani akolongit na a ngakan-kapei, kideput kesi akimuj ngakidepunet ngaarei ana etia nache palem, toliworos ngakitemiet a itwaan a ipei ngoomwon. Pot ngikarikok daang a ngitunga tolimokis Musa ngakiro nguna.

²³Tolimok Musa kesi tama, “Adungu Ekapolon Akuj atamar erai akolongit nakamoi na italeuno iangarere, na erai akwaar na italeunitoe a Ekapolon Akuj. Kitaatana a akim akolongit naga ibore ni isakete akitaatan, kipoto ni isakete akipore. Ani ibore daang ni idongi, ejoikinit ikachakinio toliwor ika moi.”

²⁴Kikachakis kesi akimuj na edongi kiwalak loger lo adungokinitor Musa. Nyebosa akimuj ngina kori nyepena ngikur.

²⁵Tolim Musa tama, “Tanyama naga akolongit naga, kainyo erai tokona akolongit naga na enyaritae Sabato, na erai akolongit a Ekapolon Akuj nakitaleuno, na emamakar akimuj ianyunete esi anikalapatan a adakar.

²⁶Ejoikinit esi idepunete akimuj a ngirwa a ngikan-kapei. Nakaneni ani akolongit nakiangaret engopi akimuj.”

²⁷Ani akolongit na ngakan-kaarei toloto ngitunga ngiche akidepun akimuj, nakaneni tongopik kesi akimuj.

²⁸Sodi kingit Ekapolon Akuj Musa tama, “Ewounete ngitunga lugu akiwap ngitalio kang tanang ori?

²⁹Toyena atamar kainak ayong Ekapolon Akuj esi akolongit nakiangaret. Ngakiro nguna kesi eraakar ani enangi akolongit na ngakan-kapei, kainakini ayong esi jiik akimuj nakitemokin a ngirwa a ngiarei. Ejoikinit itwaan daang iboikin ni ibooyo akolongit na ngakan-kaarei, nyeerotok anawi keng.”

³⁰ Apot ngitunga kiangasi akolongit na ngakan-kaarei.

³¹Tanyarata Ngisirael akimuj ngina manna. Ekwaan akimuj ngina ka ekinyamit loakwaan, tobob loger a ngabisikutio ana iwaakinitae akimiet a ao.

³²Tolim Musa tama, “Edungunit Ekapolon Akuj atamar kingadaasi manna ache kotere ngalesea yok, sodi taanyungareta kesi akimuj nakiinakini ngesi ngoni atanyama anariet nakipudunio ngesi ngoni alo Misiri.”

³³Tolimok Musa Aron tama, “Tolem amot kitemok ngakitemiet ngaarei a manna tooma, sodi kiwaak ngaren Ekapolon Akuj toliwor ingadaaritae kotere ngalesea yok.”

³⁴Kiwaak Aron ngaren asaduku a Achamunet toliwor ingadakinitae neni, loger lo kolong adungokinea Ekapolon Akuj Musa.

³⁵Tanyama Ngisirael manna a ngikaru a ngitomwon-omwon, tanang na anangeta nakwap a Kanaan ni alomete kesi. (

³⁶ Arai akitemiet napalem sek itemeenere na eriyan ka ngalitae ngatomwon-arei.)