Read turkana Apudunet 17 Bible Online

Apudunet 17 - turkana bible

Apudunet 17

¹Torotokis Ngisirael daang anariet ana enyaritae Sin. Toliworos kesi ewoose awapei toloto wache, loger lo adungokinitor Ekapolon Akuj. Toloma kesi ni enyaritae Repidim, nakaneni tongopikis ngakipi kaneni namatan.

²Kisuburata kesi Musa tolimokis tamasi, “Nakinae sua ngakipi atamata.” Tatachak Musa kesi tama, “Nyo iburaata esi? Nyo iningitotor esi Ekapolon Akuj?”

³Nakaneni anyamit ngitunga akure noi, sodi torubakis isuburaate Musa kingita tamasi, “Nyo ngoon kipudunio iyong sua alo Misiri? Isaki iyong akure kitaar sua, ka ngide kosi, ta ngibaren kosi a?”

⁴Kilip Musa kikaloik Ekapolon Akuj tama, “Ekokini ayong ngitunga lugu ai? Ekoto kesi akimas ayong a ngamoru.”

⁵Tolimok Ekapolon Akuj Musa tama, “Toriko ngikarikok a Ngisirael ngiche, kingarenikis ngitunga. Toting aburo nakolong iramea iyong ngakipi anangolol a Nili.

⁶Awei ayong alongaren kon anataaba ana eyei moru lo enyaritae Sinai. Taram ataaba, nakaneni elomunete ngakipi kaneni na emaase ngitunga.” Tosubak Musa ngakiro nguna alongaren ngikarikok daang a Ngisirael.

⁷Tanyarae neni Masa ka Meriba,[13] kainyo eburaate Ngisirael kiningo Ekapolon Akuj na engitatar ebalasi, “Kirukit sua ka Ekapolon Akuj kori emam?”

⁸Pot Ngiamalek sodi toremo Ngisirael alo Repidim.

⁹Tolimok Musa Yochua tama, “Toseu ngikiliok ngidi toloto tojwoto ka Ngiamalek moi. Awei ayong alokidiama emukura atingit aburo nakalimokini Akuj atamar toting.”

¹⁰Kiwapak Yochua ngakiro na alimokini Musa tolot akitijwore Ngiamalek. Toloto Musa ka Aron, ta Ur todokasi kidiama emukura.

¹¹Esaa daang lo ekearitor Musa ngakan keng, kidwanga Ngisirael Ngiamalek. Ani esaa lo etiyaunea Musa ngakan keng kwap, kidwanga Ngiamalek Ngisirael.

¹²Ani eburuni ngakan a Musa, yaut Aron ka Ur amoru na icholongi Musa, towo epei alokedieny, towo loche aloteten, kiganga ngakan keng, tanang na adooyorea akolong.

¹³ Kotere ni ekoneta kesi neni, kidwang Yochua Ngiamalek jik.

¹⁴Sodi tolimok Ekapolon Akuj Musa tama, “Kigir ngakiro a ejie alo idwangeta esi Ngiamalek kalo, toliwor itamuununio. Tolimok Yochua atamar enyasuni ayong Ngiamalek jik.”

¹⁵Todukok Musa ekeno a ngakipeyos sodi tanyara ekiro keng “Ekapolon Akuj erai abendera kang.”

¹⁶Tolim ngesi tama, “Kikea abendera a Ekapolon Akuj! Erubakini Ekapolon Akuj itiji Ngiamalek jik!”