Read turkana Apudunet 18 Bible Online

Apudunet 18 - turkana bible

Apudunet 18

¹Kiira lokamuran a Musa lo anyaritae Yesiro ngakiro na asubea Akuj Musa ka Ngisirael na epudunio Musa kesi alo Misiri. Arai Yesiro emuron a ngakujo a akwap a Midian.

²Sodi bu ngesi nia Musa erikunit Sipora na arai aberu a Musa, nasek edongit,

³ka talokookeng luarei lu anyaritae Gerichom ka Elieser. (Alimuni sek Musa tama, “Arai ayong itwaan a akwap a ache ni ayei nakwap nagela.” Sodi tolimok ngesi edia epei ekiro keng Gerichom.[14]

⁴Tolim nabo ngesi tama, “Kengarakini ayong Akuj a apakang sodi katoyuu ayong nyakaar ekapolon a Misiri.” Sodi tolimok ngesi edia loche ekiro keng Elieser.[15])

⁵Pot Yesiro ka aberu a Musa ka talokookeng a Musa luarei tanangut nariet ni alomit Musa alomoru a Akuj.

⁶Amearit sek ngesi itwaan nia Musa alimokin atamar eponito kesi.

⁷Sodi tolot Musa akisiriam ngesi, kijuuru alongaren keng, kimala ngesi tonuak. Kianakis ngakiro a eboyor kech, ani erumor tolomasi loeam a Musa.

⁸Tolimok Musa Yesiro ngakiro daang na asubea Ekapolon Akuj ekapolon a Misiri ka ngitunga keng, toyuunea Ngisirael. Tolimok ngesi tani ngichan lu aanyunete ngitunga alorot ka eger lo ayuunea Ekapolon Akuj kesi.

⁹Ani iirari Yesiro ngakiro nguna daang, talakar

¹⁰sodi tama, “Kipuroe Ekapolon Akuj na kiyuuni esi ani a ekapolon a Misiri ka ngitunga a akwap keng! Kipuroe Ekapolon Akuj na ayuuni ngitunga keng ani araakatar ngikedalak!

¹¹Ayen tokona ayong atamar epolot Ekapolon Akuj noi idwangit ngakujo daang, kainyo asubi ngesi ngakiro nugu ngirwa lu emenyaritotor Ngimisiri Ngisirael.”

¹² Sodi yau Yesiro akipeyos kipeyoe nginerin daang, ta ngakipeyos ngache na epeyokinio Akuj. Sodi kirukosi Aron ka ngikarikok a Ngisirael toloto akinyam ka Yesiro akimuj na italeunitoe, na epeyokinitere Akuj.

¹³Ani iwalari akolongit nache, totub Musa ngikesio a ngitunga napei iwalari tanang nakwaare.

¹⁴Ani eanyungari Yesiro ibore daang ni asubi Musa, kingit ngesi tama, “Anukiro nugu isubea iyong ngitunga? Nyoni isubea iyong nugu daang alopei, towaas ngitunga kane napei nataparach tanang ebong esakete aanyun iyong?”

¹⁵Tatachak Musa ngesi tama, “Asubi ayong kona ani eponeeneta ngitunga aanyun ngakiro na echamit Akuj.

¹⁶Na engolopatar ngitunga ngiarei, pot nikang sodi atotiaku ayong atamar ngae anikech esechit, nabo atolimok ayong kesi ngakiro na edungunit Akuj ka ngitalio keng.”

¹⁷Sodi tolim Yesiro tama, “Nyejok ngakiro na isubi iyong.

¹⁸Kiburuni iyong ka ngitunga lugu aapei. Elal etich logo noi nyisubi iyong bon.

¹⁹Kimiek tokona katolimok iyong ngakiro naajokak na ejoikinit iyong iwapi, nabo irukete iyong ka Akuj. Ejoikinit erai iyong iweikinit ngitunga ani Akuj sodi yau ngikesio kech nikeng.

²⁰Ejoikinit iyong itatami kesi ngakiro na edungunit Akuj nabo kisisak kesi eger lo ejoikinit ibooyoto ka ngakiro na ejoikinit esubete.

²¹Ani ikoni neni dang, ejoikinit iyong iseuni ngitunga lu epedorete akisub etich kitiliwo kesi ngikarikok a ngitunga. Toliworos kesi ngikarikok a ngitunga alu eraakasi ngabunge, ka ngamiae, ka ngitomwon-kan, ta ngitomon. Ejoikinit kesi eraakasi ngitunga lu ekerito Akuj, tarai lu emunoi nabo nyepedorio akidiak nakinae ibore.

²²Kimiek kesi toliworos etubeenete ngikesio a ngitunga jiik. Toliworos eyaununete ngikesio luationok make nikon, nakaneni totubo kesi ngikesio lu nyetioko daang. Nyetioner etich ngolo anikon nakingarakineta kesi iyong.

²³Ani kisub iyong nguna kona edungunitor Akuj, nyikiburuni iyong noi, nabo eloose ngitunga lugu daang nawiyei ketub ngikesio kech kerumor.”

²⁴Kiwapak Musa ngakiro a Yesiro

²⁵sodi toseu ngitunga lu epedorete akisub etich ani eyakasi Ngisirael daang. Kitiliwo kesi ngikarikok a ngitunga alu eraakasi ngabunge, ka ngamiae, ka ngitomwon-kan, ta ngitomon.

²⁶Toliworos kesi etubeenete ngikesio a ngitunga jiik. Yaunut ngikesio luationok nia Musa, nakaneni totubo kesi ngikesio lupeatioko make.

²⁷Sodi tolimok Musa lokamuran keng atamar tolot niajokon. Abu lokamuran keng tobong nakwap keng.