Read turkana Apudunet 19 Bible Online

Apudunet 19 - turkana bible

Apudunet 19

¹Ani enangi akolongit na ekingaren a elap alo a nguuni alo arotokinioto Ngisirael alo Misiri, apot tanangut nariet enyaritae Sinai.

²Ani enyounete kesi alo Repidim enangunete nariet a Sinai, toloma kesi nakeju a emoru a Sinai.

³ Todoka Musa kidiama emoru aanyun ka Akuj. Tanyara Ekapolon Akuj ngesi alomoru tolimok atamar tolimok Ngisirael lu araakasi ngalesea a Yakobo tama,

⁴“Ingolikis esi ngakiro na asubea ayong Ekapolon Akuj Ngimisiri, ka eger lo kewokea ayong esi loger lo iwokea egole ngitak keng a ngabeben keng. Abu ayong kayau esi nikang nege.

⁵Ani tokona kiwap esi ngakiro kang kirichakis achamunet kang, iliworosi esi ngitunga kang a alope. Erai akwap daang akang, nakaneni iliworosi esi ngitunga kang luseuna,

⁶ngitunga kang lu aliworosi lu italeunitoe, lu esubete etich eraakasi ngimurok kang.”

⁷Sodi totiyaar Musa tanyarau ngikarikok daang a ngitunga tochunak wapei tolimok kesi ngakiro daang na adungokini ngesi Ekapolon Akuj.

⁸ Sodi tatachut ngitunga daang aapei tamasi, “Kisubi sua ngakiro daang na alimu Ekapolon Akuj.” Tolimok Musa Ekapolon Akuj ngakiro nguna alimunete ngitunga.

⁹Tolimok Ekapolon Akuj Musa tama, “Abuni ayong nikon ayei lodou loapolon, sodi kiirasi ngitunga kiruoro ayong ka iyong, tonupeta ngakiro kon napei tokona jik.” Tolimok Musa Ekapolon Akuj ngakiro na alimunete ngitunga.

¹⁰Tolimok Ekapolon Akuj ngesi tama, “Kape tolimok ngitunga atamar kitaleunos akolongit naga ka moi sodi katolemikis ayong Ekapolon Akuj ngakipeyos. Ejoikinit kesi ilotarete ngiworui kech,

¹¹toliworos lu arumosi asubakin enangi akolongit na etupit namoi. Akolongit ngina, atiyaun ayong moru a Sinai nikaanyungareta ngitunga daang.

¹²Kiwaak ekukuor lo iriami emoru toliwor nyikalamete ngitunga neni. Tolimok ngitunga atamar nyeedokasi kidiama emoru kori nyeapiyasi diyete. Ani kichiak itwaan emoru, eario.

¹³ Echamit imasio itwaan ngini a ngamoru kori egumio a ngimalea a amod, nyeetap itwaan ngesi. Ngitunga ka ngibaren esubere ngakiro nguna, ejoikinit daang eario. Nakaneni ani na ekutakinere aburuch, edokarete ngitunga kidiama emoru.”

¹⁴Sodi totiyaun Musa alomoru tolimok ngitunga atamar tosubakinos kotere akipeyokin Akuj. Sodi kilotasi kesi ngiworui kech,

¹⁵ tolimok Musa kesi tama, “Ani enangi akolongit na etupit naka moi, toliworos lu irumosi asubakin, nakaneni nyeepero ngikiliok ka ngaberu ngirwa ngulu.”

¹⁶Ani enangi ataparach a akolongit ana ngauni, togirok akwap kimilea. Tatakanu edou loapolon alokidiama emoru. Kiirarae aburuch erukini lokojokon noi. Tamaranikis ngitunga daang lu ayakasi nadakar ebulit.

¹⁷Toriko Musa kesi daang topudosi anadakar eloose akiriamun ka Akuj, sodi towaa kesi anakeju a emoru.

¹⁸Toburuchia apuru wadaang a emoru a Sinai, kainyo abuni Ekapolon Akuj kidiama emoru eyei nakim. Kidiiri kidiama loger a apuru a adui ana erirae. Tamaranikis ngitunga daang lokojokon noi.

¹⁹Torubak eruye a aburuch iatanakin talalaar. Kiruorik Musa sodi tatachu Akuj ngakiro keng a akimilea.

²⁰Totiyaun Ekapolon Akuj min kidiama emoru a Sinai sodi tanyaraa Musa kidiama emoru. Todoka Musa kidiama

²¹sodi tolimok Ekapolon Akuj ngesi tama, “Totiyaar kichikichik ngitunga nyiikalama ekukuor pot kengolikis ayong. Ani kikokis neni, etoakete ngikaalak kech.

²²Tani ngimurok a Akuj lu eapuunete diyete kang, ejoikinit italeunosi, ani kemam erirae ayong kesi.”

²³Tolimok Musa Ekapolon Akuj tama, “Nyedokunete ngitunga ani kidungokinea iyong sua atamar italeunitoe emoru nabo tama kiwaakinae ekukuor kiriam emoru.”

²⁴Tatachak Ekapolon Akuj ngesi tama, “Totiyaar sodi tolot kirukut ka Aron. Nakaneni nyiikalam ngimurok ka ngitunga ekukuor pot nikang. Ani kikokis neni, erirae ayong kesi.”

²⁵Abu Musa totiyaar tolot nia ngitunga sodi tolimok kesi ngakiro na alimuni Ekapolon Akuj.