Read turkana Apudunet 2 Bible Online

Apudunet 2 - turkana bible

Apudunet 2

¹Ngirwa ngulu, kiut itwaan a ekitela a Lawi aberu a ekitela keng.

²Topoti aberu ngina kidou ikoku nisapat. Ani ingolikini ngesi atamar arai ikoku niajokon, kidaa a ngilapio a nguuni.

³Ani engopikini kona idai ngesi nabo, tolem akikap na asubunitae a ngataagor sodi kilalak elaam tongop ngakipi kona elomarete tooma. Kiwaak ngesi ikoku nakikap, sodi kirepak tooma lonyia lukooyak ayakasi lokwaas a angolol.

⁴ Towo nakaatokeng a ikoku echadakina, esaki akiyen atamar anukiro esubakinosi anikoku.

⁵Bu nakookeng a ekapolon a Misiri akilotar anangolol, esaa lo alooso ngakasubak etich keng alokwaas a angolol. Taanyunga ngesi akikap alonyia, tomea akedalan keng alemun.

⁶Tangaa nakookeng a ekapolon a Misiri akikap sodi taanyunga ikoku nisapat ni egoro. Kisieni ngesi ikoku ngini tolim tama, “Erai ikoku en ipei a ngide a Ngieburaniae.”

⁷Sodi Tolimok nakaatokeng a ikoku kangini ngesi tama, “Kimiek atolot atanyarau aberu Naeburaniait toliwor akadakan ngesi.”

⁸Tatachak nakookeng a ekapolon ngesi tama, “Kape kare tanyarau.” Sodi tolot apese ngina toriku itiokeng a ikoku kangini.

⁹Tolimok nakookeng a ekapolon aberu ngina tama, “Tadaka ikoku nikang en kitan, nakaneni ketanyami ayong iyong ngaropiyae.” Sodi tadaka aberu ngina ikoku kitan.

¹⁰ Ani ekisidi epolouni ikoku, toriko ngesi nia nakookeng a ekapolon, tadaka ngina ikoku toliwor lokookeng. Tolim ngesi tama, “Eriuni kolong ayong ngesi anakipi, kotere ngakiro nguna, alimokini ayong ngesi ekiro be Musa.”[2]

¹¹Ani na apolounio Musa, tolot ngesi aanyun ngitunga keng lu araakasi Ngieburaniae. Taanyunga ngesi eger lo etingakinitere kesi akisub etich loationon. Taanyunga ngesi tani epei a Ngimisiri ibungae Eburaniait lo arai epei a ngitunga a Musa.

¹²Tongolengolek Musa ani eyenuni atamar emam itwaan ketee, taar Emisirit sodi kidaik akwaan keng nalup.

¹³ Ani akolongit na a ngaarei, tobongo ngesi torukau Ngieburaniae lukiliok ngiarei ejiete. Kingit ngesi lo asechit tama, “Nyo itijio iyong Eburaniait lo erai erukitos kon?”

¹⁴Kingit ekile ngolo ngesi tama, “Ngae kitiliwori iyong ekapolon ka ekatubon ngakiro kosi? Isaki iyong akiar ayong loger lobeen iarea Emisirit a?” Sodi toem Musa tolim tama, “Keyan ngitunga ngakiro nabeen asubi ayong.”

¹⁵ Ani na eirarea ekapolon a Misiri ngakiro nguna, tasak akiar Musa. Sodi todok Musa ani ayei ekapolon a Misiri, tolot akilom nakwap enyaritae Midian. Akolongit apei na ebooyo ngesi alodiyete akar,

¹⁶pot tanakookeng a Yesiro alo arai emuron a ngakujo a akwap a Midian. Araakasi tanakookeng a Yesiro ngakan-kaarei. Tookut kesi ngakipi kilelebikis nategerin tamata ngamesekin ka ngaanei a apakech.

¹⁷Nakaneni kiritasi ngikeyokok ngiche tanakookeng a Yesiro. Sodi tolot Musa toyuu kesi tookok ngibaren kech ngakipi.

¹⁸Ani ebongorete kesi ni ayei apakech, kingit ngesi kesi tama, “Nyo ibongunioto esi akolongit naga atipei kona?”

¹⁹Tatachakis kesi ngesi tamasi, “Emisirit ngesi kiyuuni sua ani eyakasi ngikeyokok, sodi kitookok ngesi sua ka ngibaren kosi ngakipi.”

²⁰Kingit ngesi tanakookeng tama, “Nyaali tokona ngesi? Nyo imiekineta esi itwaan ngini ewei anikalapatan? Kapesi tanyarautu ngesi bu emuja ka ngoni.”

²¹Tacham Musa akiboi ka itwaan ngini. Kipoto Yesiro nakookeng na enyaritae Sipora nak Musa kiut.

²²Kidou Sipora ikoku nisapat. Tolim Musa tama, “Arai ayong itwaan ni nyerai akwap naga akang, aloger kangolo, alimokini ayong ngesi ekiro be Gerichom.”[3]

²³Ani adaunet a ngikaru a ngikaalak, totoan ekapolon a Misiri. Nakaneni aringa Ngisirael eriabasi kotere etich loationon edesikinitae kesi. Egorosi kesi esakete ayuuno. Tanang akigoro kech nia Akuj.

²⁴Sodi kiira Akuj akigoro kech kitam achamunet na achamakin ngesi ka Aburaam, ka Isaka, ta Yakobo.

²⁵ Taanyunga Akuj eger lo aboliare Ngisirael, toliwor itee kesi.[4]