Read turkana Apudunet 21 Bible Online

Apudunet 21 - turkana bible

Apudunet 21

¹“Kidodik Ngisirael ngitalio lugu.

²Ani kigielu iyong ekedalan lo erai Eburaniait, kimiek tosub etich kon a ngikaru a ngikan-kapei. Ani ekaru loa ngikan-kaarei, talakak ngesi tolot emam ibore itatachio.

³Ani kolong pekiutarit ngesi na aliworor ekedalan kon, nyerikori aberu keng na erotokinio. Nakaneni ani kiutarit kolong sek ngesi eringa nyeliworo ekedalan kon, erikori ngesi aberu keng.

⁴Ani kirumakinit ngesi ekile a awi aberu na idouni ngide lusapa ka lupesur, erai aberu ngina ka ngide keng ngika ekile a awi, nakaneni erotokini ekedalan ngolo bon.

⁵Ani kelimu ekedalan ngolo atamar amina ekile a awi ka aberu keng, ta ngide keng, nakaneni nyasaki katalakakin atolot,

⁶ ejoikinit ekile a awi erikori ngesi ni ilipeenere. Itowei ngesi ekedalan keng kaneni, kitowo alokidor kori anakitoe a ekidor sodi torub akit keng. Nakaneni eliwor ngesi ekedalan keng jik.

⁷“Ani kegiela itwaan nakookeng toliwor akedalan, nyelakakinio ngesi tolot loger lo elakakinere ngikedalak luche lukiliok.

⁸Ani kegielar ngesi nitwaan ni esaki akitiliwor ngesi aberu keng, nakaneni toronik ekile ngolo akedalan ngina, ejoikinit akedalan ngina ebuario togiel nabo apakeng. Nyegielari ekile a awi kangina ngesi lotunga a akwap anache kainyo aboliar ngesi akedalan ngina.

⁹Ani kegiel itwaan akedalan esaki akirumakin lokookeng, ejoikinit ngesi itusubuni akedalan ngina nakookeng.

¹⁰Ani kiut itwaan aberu na ngaarei, ejoikinit ngesi erubakini ainanakin aberu na ekingaren akimuj ka ngiworui lu etia lukolong ainanakini ekingaren, nabo tosubea ngesi ngakiro nakolong asubea ekingaren.

¹¹Ani pekesubea ngesi kongina, ejoikinit elakakini ngesi tolot emam ibore imichat.

¹²“Itwaan cha daang ni erami itwaan totoan, eario.

¹³Nakaneni ani kerai ibore nipeeyechakini ngesi, pearai abuchakin peesaki, edokini ngesi tolot nakwap na aseuni ayong Ekapolon Akuj, nakaneni iboikin neni niajokon.

¹⁴ Nakaneni ani kengo itwaan kiyechak akiar niche, ejoikinit ngesi eario, tani kematar ngesi lokeno a ngakipeyos tasak ayuun kaneni.

¹⁵“Itwaan cha daang ni erami apakeng kori itiokeng, ejoikinit eario.

¹⁶ “Itwaan cha daang ni ekokoyari itwaan niche, erai esaki agielar kori akitiliwor ekedalan, ejoikinit eario.

¹⁷“Itwaan cha daang ni iruoror apakeng kori itiokeng ngakiro naaronok, ejoikinit eario.

¹⁸“Ani kejikin ngitunga sodi kimas itwaan niche a amoru kori kilulungik akan, nakaneni nyear, nyirirao ngesi. Ani kerai akiper bon eperi itwaan ni ewanitae,

¹⁹ani ekisidi tonyou tolot akilare anikalapatan ichogae a akitoe, etachi itwaan ni arami ngesi ngisaa lu aperio itwaan ngini ewanan, ani erumor kitedek ngesi tanang ejoker.

²⁰“Ani kelemu itwaan aburo kidet ekedalan keng, kerai nikile kori niberu, sodi totoan ekedalan ngolo kaneni, irirao itwaan ngini.

²¹Nakaneni ani peketoana ekedalan ngolo akolongit na ekingaren kori na ngaarei, nyirirao itwaan a awi kangina. Itemokinosi ngiboro lu abukorosi loriras keng.

²²“Ani kejwoto ngitunga ngiarei sodi towana aberu na epoti kiyes, nakaneni nyewana ngesi a erot a eche, itubukio itwaan ni awani ngesi ngaropiyae etiae locha elimuni ekile a aberu kangina, erai kechamut ngikatubok ngakiro.

²³Ani kewanitae aberu ngina, eliwor eriras lo etachakinere akiyar nakiyar nache,

²⁴akongu nakongu nache, ekelae lokelae loche, akan nakan nache, akeju nakeju nache,

²⁵ anomat nanomat nache, ajeme najeme nache, ni ebutoro ni eyei niche ebutoro.

²⁶“Ani keram itwaan akedalan keng kori ekedalan keng nakongu sodi tojongo akitere akwap, ejoikinit ngesi elakakini ekedalan ngolo toliwor ibore ni etachit akongu keng ngini.

²⁷Ani keram todoto ekelae, ejoikinit elakakini ekedalan ngolo toliwor ibore ni etachit ekelae keng ngini.

²⁸“Ani kigum emong itwaan a ngaamwar totoan, imasio emong ngolo a ngamoru. Emam itwaan enyami akiring keng, nakaneni nyirirao elope a emong.

²⁹Ani sek kegiranakin emong ngitunga sodi kichikichikae elope a emong dio towou akien emong, ani kigum itwaan a ngaamwar totoan, imasio emong a ngamoru, sodi taarae ilope a emong dang.

³⁰Nakaneni ani kechamun atamar eremio ilope a emong kibusere itwaan nikatoan, ejoikinit ngesi ipotori ibore ni itemokino toyuunor.

³¹Ani kear emong edia kori apese, esubio ngakiro napei nguna.

³²Ani kear emong ekedalan kori akedalan, etachi ilope a emong ilope a ekedalan ngaropiyae ngatomwon-uni, ani erumor kimasae emong a ngamoru totoan.

³³“Ani kimiek itwaan adui engaara, kori kebok itwaan adui nyeerap, sodi tachakakin emong kori esikiria tooma,

³⁴etachi itwaan ngini ibarasit ngini. Etachakini ngesi ilope a ibarasit ngaropiyae sodi toting ngesi ibarasit nikatoan.

³⁵Ani kear emong a itwaan emong a itwaan aniche, egielarete ngitunga luarei ngulu emong lo eyari totiaka ngaropiyae. Emorete kesi tani akiring a emong alokatoan.

³⁶Ani keyenio atamar igumono sek emong nakaneni towou ilope akien, etachakini ngesi itwaan nia emong alokatoan emong lo eyari, sodi toliwor lokatoan ekeng.