Read turkana Apudunet 22 Bible Online

Apudunet 22 - turkana bible

Apudunet 22

¹“Ani kekokoya itwaan aite kori emesek sodi taar kori togiela, ejoikinit ngesi etachakini ngaatuk ngakan naite apei sodi tatachak ngamesekin ngoomwon namesek apei.

²“Ani kirumun ekokolan nakwaare ekokoi sodi taramae totoan, nyepaikinio ilope a ibore ngakiro a akitu keng.

³Nakaneni ani kesubakin nguna[17] kipiripiru akolong, epaikinio ilope a ibore ngakiro a akitu keng. Ejoikinit ekokolan etachi ibore ni ekokoyari. Ani kemam ngesi ibore eyei, ejoikinit ngesi egielario toliwor ekedalan sodi tatachere ibore ni akokoyari ngesi.

⁴Ani keriamun ibarasit ni akokoyari ngesi eringa emeat ngesi, kerai aite kori esikiria, kori amesek, etachakini ngesi ngibaren ngiarei nibarasit ipei.

⁵“Ani kimiek itwaan ngibaren keng edakasi anaro kori alomana sodi toloto kesi adaka amana[18] a itwaan aniche, ejoikinit ngesi etachi ngalemet nguna ana ngaroatin keng kori ana ngamanat keng.

⁶“Ani kinokak itwaan akim anaro keng sodi kiniapar alodoan tanang naro a itwaan aniche sodi tonom ngimomwa lu ewaasi kori lu atub tosenokinoe, etachi itwaan ni enokak akim ibore ni inyasun.

⁷“Ani kechamu itwaan akiratakin ngaropiyae kori ngiboro a itwaan aniche sodi tokokoearae alokai keng, ani keanyun ekokolan ngolo, etachakini ngiboro ngiarei nibore ipei.

⁸Ani kengop ekokolan ngolo, erikunio itwaan nikolong eratakinit ngiboro, torikunoe ni ilipitere Akuj sodi kikong kaneni atamar nyelemara ngesi ibore a itwaan aniche.

⁹Ibore daang ni engolopatar ngitunga kerai ngaatuk, kori ngisikiria, kori ngamesekin, kori ngiworui, ta ibore cha daang ni echakara, ngitunga luarei lu esakete ibore ngini, ejoikinit erikorio ni ilipeenere Akuj. Itwaan ni idodiuni Akuj atamar ngesi esechit, etachakini itwaan niche ngiboro ngiarei tatachak nibore ipei.

¹⁰Ani kechamu itwaan akiratakin esikiria, kori aite, kori emesek, kori ibarasit cha daang a itwaan aniche, sodi totoan ibarasit ngini, kori towan, kori toremoi. Ani kengopa ngikaanyunak,

¹¹ejoikinit itwaan ngini elosi ni ilipeenere Akuj sodi kikong atamar nyelemara ngesi ibarasit a itwaan aniche. Ani pekekokoyaritae ibarasit, ejali ilope ibarasit, nakaneni nyetachi itwaan nisek echikakinitae.

¹²Ani kekokoyaritae ibarasit, etachi itwaan ngini.

¹³Ani kenyamito ngibuin, eyauni itwaan ngini ibore ni idodiunit atamar enyamitae. Nyetachi ngesi ibarasit ni anyamete ngibuin.

¹⁴“Ani kijokok itwaan niche ibarasit sodi towan kori totoan emam ilope kaneni, ejoikinit itwaan ngini etachi.

¹⁵Nakaneni ani kesubakin nguna eyei ilope neni, nyetachi itwaan ngini. Ani kerai ibarasit ngini ni elemuununi ilope ngaropiyae nak itwaan ni ijokokinit ngesi ibarasit, itemokinosi ngaropiyae nguna nados a ibarasit kangini.

¹⁶“Ani kepero itwaan ka apese na nyepero ka ekile a ache, tarai emam itwaan enerit akiut, ejoikinit ngesi idesi ngibaren kiut.

¹⁷ Ani kenger apakeng a apese ngesi iusi apese ngina, ejoikinit ekile ngolo idesi ngibaren lu aperioto ka apese ngina.

¹⁸“Taara aberu daang na erai akasuban.

¹⁹ “Taara itwaan daang ni eperete ka ibarasit.

²⁰“Kirirata taara itwaan daang ni ipeyonokini akuj ache mati ayong Ekapolon Akuj.

²¹“Nyiiboliar kori nyiichiakia itwaan ni erai ika akwap a ache kainyo iraakasi kolong esi dang ngitunga a akwap a ache na iyakatar Misiri.

²²Nyiiboliar apuserut kori ikoku nikoki.

²³Ani kiboliatar esi kesi kekaloikis ayong, eirari ayong dir akigoro kech,

²⁴ sodi atongo kataar esi alojie. Eliworosi ngaberu kus ngapuseru, sodi toliworos ngide kus lu emam ta apakech.

²⁵“Ani kimichaarito ngitunga lu iboosit ngaropiyae kus, nyiikokis anikech ngitunga lu imichato isakete kiatakis ngaropiyae ngache ni eyakasi nakus.

²⁶Ani kilemasi esi eworu a itwaan toliwor ngesi imichaata esi ngesi, kinyiakakisi ngesi eringa akolong nyedooyoro,

²⁷ kainyo erai eworu ngolo bon imukokin ngesi kiratakinea akatorot. Nyo nabo iche eperio ngesi? Ani na ikalounio ngesi ebala kingarakinae, eirari ayong ngakiro keng kainyo arai ayong na ngisien.

²⁸ “Nyiimor Akuj[19] kori nyiilam ekarikon a ngitunga kus.

²⁹“Nakinae ayong ngakipeyos a ngalemet kus, ka emuna lo epuritoe, ta akimiet a ngikito na enangea ngirwa lu echamit elemunere. “Nakinae ayong ngide kus lusapa lu ekingaren.

³⁰Nakinae ayong ngiuriuna lu ekingaren anaatuk ka ngamesekin kus. Kimiekisi ngiuriuna lu ekingaren kiruko ka ta itiokech a ngirwa a ngikan-kaarei. Ani akolongit na ngakan-kauni, kipeyokis ayong.

³¹ “Iraakasi esi ngitunga kang, kotere ngakiro nguna, nyejoikinit esi inyamete akiring a ibarasit ani earete ngibuin, pearai nakisi ngingokwo.