Read turkana Apudunet 23 Bible Online

Apudunet 23 - turkana bible

Apudunet 23

¹“Warasi nyiipetasi ngakiro na eraakasi alioko, nabo nyiingarakis itwaan nikasechan a ngakiro ana eraakasi alioko.

²Nyiiwap ngakiro a ngitunga alukaalak na esecheta kori na iruorotor ngakiro na nyeraakasi ngaka ateneanut.

³Nyiiliworosi lu ipakarito lu iboosit esaa lo ititaare.

⁴Ani kianyut esi aite kori esikiria a emoit kus lo echakar, tobuakisi ngesi.

⁵ Ani kepotikis esikiria keng ngasaaja, kingarakisi kitowaa nyiirotokis kimiekis kaneni.

⁶“Nyiisikis atiakakin itwaan ni iboosit ngakiro na eriyan na erikorere nitubet ngakiro.

⁷Nyiititata ngitunga a ngakiro ana eraakasi alioko. Nabo nyiar itwaan ni nyesechit, kainyo erirae ayong itwaan daang ni ikoni neni.

⁸ Warasi nyiidiaut ibore ni kidiekitere kainyo itumudukani ibore ngini itwaan, sodi nyiiwap itwaan ngini ngakiro na iyookino, kinyasu eboyor a ngitunga alu emam ibore esechito.

⁹“Nyiiboliatar itwaan a akwap anache, ani iyeneta esi eboyor a itwaan ani nyerai akwap akeng, kainyo iraakasi kolong esi dang ngitunga a akwap anache na iyakatar Misiri.

¹⁰“Kitata ngamanat kus a ngikaru a ngikan-kapei sodi tolema ngalemet na ekoniunete.

¹¹ Ani ekaru loa ngikan-kaarei kimiekis kiangasi, nakaneni nyiilema ibore ni erupuni anamanat kanguna. Kimiekisi ngitunga lu iboosit tanyama ibore ni erupunit kaneni, ani ibore ni idongi, tanyama ngitieng a moding. Tosubeta tani ngamanat a ngimusabib kongina ka na ngikito a akimiet.

¹²“Tosuba etich a ngirwa a ngikan-kapei, nakaneni warasi nyiisuba etich akolongit na ngakan-kaarei, sodi kiangareta ngikedalak ka ngitunga a akwap anache lu esubete etich kus, ta ngibaren kus dang.

¹³“Kiirasi ngakiro daang nakalimok ayong Ekapolon Akuj esi. Nyiilipa ngakujo ngache, nyiilimut tani ngirora kech.

¹⁴“Tosubakisi ngisukukui nguuni alokaru a epei toliworos lu kidodikinitotor esi ayong arimatoi.

¹⁵ Ani enangi elap lo enyaritae Abib, lo erai ngesi kolong ipudunioto esi alo Misiri, tanyama akimuj a esukukuu alo a ngamugati anapadok loger lokolong kadungokinitor ayong esi. Ngirwa lukan-kaarei a esukukuu kangolo, nyiinyam ngamugati na iwaakinitae ekitoe lo itubui. Warasi nyiipot akilip ayong peiyaunito akipeyos.

¹⁶“Tanyama akimuj a esukukuu a ngalemet napei isiakineta esi akilem. “Ani enangi adaunet a ekaru, tanyama akimuj a esukukuu a ngikalea na igerioto esi ngikito lu eyakasi namanat kus.

¹⁷Ekaru daang na enangea ngirwa a ngisukukui aluuni kalu, ejoikinit ngikiliok daang epote akipeyonokin ayong Ekapolon Akuj na arai Akuj kus.

¹⁸“Nyiilemut ngamugati na eyei ekitoe lo itubui nakipeyonokinioto esi ayong a ibarasit. Nyiimiekis nikatoronon a ngibaren alu kepeyoore ayong ngirwa lu esukukuu lugu eperi kiwalak.

¹⁹ “Ekaru daang, yaunutu ngalemet na ekingaren kai a Ekapolon Akuj ana erai Akuj kus. “Nyiidorokis imesek kori ikale a ngakile a itiokeng.

²⁰“Ameari ayong emalaikat kingarenik esi, sodi kiyok esi alorot, kiyau ni asubak ayong.

²¹Topupo ngesi kiwapa ngakiro keng. Nyiingero ngesi, kainyo amea ayong ngesi, nakaneni nyakarimakini ayong esi erai kingero ngesi.

²²Ani kiwapa esi ngakiro keng sodi tosuba daang nakadungok ayong esi, etiji ayong ngimoe kus daang.

²³Kingarenikini emalaikat kang esi, kiyaa nakwap a Ngiamor, ka Ngiiti, ka Ngiperes, ka Ngikanaan, ka Ngiipi, ta Ngiebus, nakaneni amunyari ayong kesi.

²⁴Warasi nyiiriedikokis ngakujo kech kori nyiilipa. Warasi nyiiwapa eger lo ilipitotor kesi. Kinyasutu ngakujo kech sodi tobwanga ngapirio kech na ngamoru anakitaleuno.

²⁵Ani kipeyonokis esi ayong Ekapolon Akuj na arai Akuj kus, kapiari ayong esi kainak akimuj ka ngakipi, nabo alemari ayong ngidekesinei kus daang.

²⁶Emam aberu na akwap kus na iyesi kori na ekolupani. Etalalae ayong ngirwa lu iyareta esi.

²⁷“Kaemete ayong ngitunga lu kitopegete esi. Ayauni ayong ngibiler lotunga lu kitijiete esi, nakaneni aree ayong ngimoe kus daang kipungaros anikus.

²⁸Etubuli ayong ngimoe kus noi.[20] Etwarakini ayong Ngiipi, ka Ngikanaan, ta Ngiiti eringa esi iponito.

²⁹Nyetwarakini ayong kesi a ekaru a epei kainyo ani kekok neni, iboikin akwap kongin, sodi talalaketa ngitieng a moding kichana esi.

³⁰Nakaneni etwarakini ayong kesi a ngalooso a ngadikidio tanang ni ilalakearotor esi kiruma akwap.

³¹Etiliwori ayong ekukuor a akwap kus lo isiakini anapas a Akaba tanang nangolol a Eupurate, kisiak loche ananam a Mediterenian tanang nariet. Kainakini ayong esi agogongu na ireuneta ngitunga a akwap kangina sodi kitwarakis esi kesi alongaren kus.

³²Nyiichamakinosi ka kesi kori ngakujo kech.

³³Nyiimiekis ngitunga ngulu elomete nakwap kus, ani kimiekis esi kesi, kitosechete kesi esi etal kang. Ani kilipa esi ngakujo kech, eliworosi elokit loaronon anikus.”