Read turkana Apudunet 24 Bible Online

Apudunet 24 - turkana bible

Apudunet 24

¹Tolimok Ekapolon Akuj Musa tama, “Todokutu kidiama emoru ni ayei ayong, iyong ka Aron, ka Nadab, ka Abiu, ta ngikarikok a Ngisirael ngitomwon-kaarei. Ani eringa esi iloka, kijuuruoto kilipa.

²Nyeapuunete luche nikang, iyong bon iapuuni. Nyeedokut ngitunga kidiama emoru.”

³Tolot Musa tolimok ngitunga ngitalio daang ka ngakiro na adungunit Ekapolon Akuj. Sodi tatachut ngitunga daang aapei tamasi, “Kisubi sua ngakiro daang na alimu Ekapolon Akuj.”

⁴Kigir Musa ngakiro na adungunit Ekapolon Akuj daang. Ani nataparach elilim, todukok ngesi ekeno a ngakipeyos nakeju a emoru sodi kitowo ngamoru ngatomon ka ngaarei na aweikinito ngitela lutomon ka ngiarei a Ngisirael.

⁵Sodi tomea ngesi ngisorok lu epeyonokinete Ekapolon Akuj ngakipeyos na inomio, ka akipeyore ngaatuk ngache na eraakasi ngakipeyos a ekisil.

⁶Totiak Musa ngaakot a ngibaren alokiding sodi kiwaak ngache natubwae nachukul, ani nache towatak lokeno a ngakipeyos.

⁷Ani erumor tolem akitab na achamunet, na egiritae ngakiro na adungunit Akuj, sodi kikeu etoil isomae kiirareta ngitunga. Tolimut ngitunga tamasi, “Kiwapi sua ngakiro a Ekapolon Akuj, atosuba daang na adungu ngesi.”

⁸ Tolem Musa ngaakot na ayakasi natubwae nachukul towatak ngitunga. Tolim tama, “Ngaakot nugu iyookinete achamunet na ichamunotor esi ka Ekapolon Akuj nakolong kidungokinea esi ngakiro nugu daang.”

⁹Apot Musa ka Aron, ka Nadab, ka Abiu, ta ngikarikok a Ngisirael daang lutomwon-kaarei todokasi moru,

¹⁰sodi taanyungasi Akuj a Isirael. Kwap ngakejen keng ayei ibore ni atokokino loger a amoru anapus-arengan, topuseana loger a adis.

¹¹Nyewana Akuj ngikarikok a Ngisirael ngulu. Aanyungarete kesi Akuj, ani erumor kimuja, sodi tamata.

¹²Tolimok Ekapolon Akuj Musa tama, “Todoku kidiama emoru ni ayei ayong nege. Ani na ibunio iyong nege, kainakini ayong iyong ngamoru ngaarei nadapal na igiritae ngitalio daang lu itatamio ngitunga.”

¹³Tonyout Musa ka Yochua lo engarakinit ngesi. Kisiak[21] Musa adokar kidiama emoru a Akuj.

¹⁴Tolimok Musa ngikarikok a Ngisirael tama, “Kiboikinos nadakar nege kidarut sua kibonguni. Irukete esi ka Aron ta Ur kane. Itwaan cha daang ni eyei akiroit na engolopatar ka niche, tolot nikech totiaka.”

¹⁵Todoka Musa moru a Sinai, sodi toburuchia edou emoru.

¹⁶Min akwangis a Ekapolon Akuj kidiama emoru. Toburuchia edou emoru a ngirwa a ngikan-kapei. Ani akolongit na ngakan-kaarei, tanyara Ekapolon Akuj Musa alotooma edou.

¹⁷Ani a Ngisirael, ekoni akwangis ngina akim na enoki alokidiama emoru.

¹⁸ Sodi toloma Musa lodou na adokea emoru. Kiboi ngesi alokidiama emoru ngirwa ngitomwon-omwon, akwaar ka apaaran.