Read turkana Apudunet 25 Bible Online

Apudunet 25 - turkana bible

Apudunet 25

¹Tolimok Ekapolon Akuj Musa tama,

²“Tolimok Ngisirael katolemikis ayong ngadekon. Kidiau ngadekon daang nacha esaki itwaan alemun.

³Ngadekon nguna, ejoikinit eliworosi egolit, ka ngasua nakwangae, ta ngasua nanyangayek.

⁴Ngiworui lukaanikak ejokak, ka ngajul a ngamesekin napusiek, ka napusiek-arengak, ta naarengak. Ngiworui lu edonyunitoe anajul a ngaanei.

⁵Ngileui a ngimesekin lu emuritae torengeta. Ngileui luajokak, ta ngakito a ngiwo.

⁶Ngamieta a ngataae, ekitoe lokaakunyon lo imorikinio ka akimiet a etal, ka eminae lokaakunyon ikwaan ka emitina.

⁷Ngamoru naarengak ka asir a ngasua na iwaakinio nakaluwat[22] na erai aka emuron aloapolon a Akuj, ta eboli lo enapit ngesi alorarum.

⁸Ejoikinit ngitunga kadukokinete ayong eam, sodi eboikin ayong kiding kech.

⁹Todukokisi sodi kiwaakis ngiboro keng daang itemem ka eger lokedodikini ayong esi.

¹⁰“Tosubutu asaduku anakitoe a ewoi ana erai aoyau keng na alokwap ngasentimitae amiat apei ka ngatomon, tarai aurianut ngasentimitae ngatomwon-kapei ka ngakan-kapei, tarai aoyau na alokidiama ngasentimitae ngatomwon-kapei ka ngakan-kapei.

¹¹Toburuchia nikalapatan ka tooma a egolit, sodi kiwaak egolit lokwaasea keng daang.

¹²Tosubak ngasua a egolit na iriamito ngoomwon, tokodakis nakejen keng naomwon, pena ngasua ngaarei na iriamito lowae epei.

¹³Tosubak ngakito na etingitere anakitoe a ewoi, tobutak ngakito nguna egolit,

¹⁴sodi kirepak kesi nasua na iriemito eyakasi lowaitin a asaduku.

¹⁵Ejoikinit ngakito nguna imiekinio anasua ana iriemito, nyechamit eutunio.

¹⁶ Kiwaak ngamoru nadapal naarei kainakini ayong iyong tooma nasaduku. Ngamoru nadapal nguna kesi na igiritae ngitalio.

¹⁷“Tosubak apukenit na erai egolit bon. Toliwor aoyau keng ngasentimitae amiat apei ka ngatomon, tarai aurianut keng ngasentimitae ngatomwon-kapei ka ngakan-kapei.

¹⁸Tosubak ngiborei lua ngabeben*g** ngiarei lu itiekunitae alogolit.

¹⁹Min ipei lowae epei a apukenit. Tosubak kesi toliworos ngipei ka apukenit.

²⁰Ekienyikinosi ngiborei lua ngabeben anapukenit. Ngabeben kech na epetara, kimuko apukenit.

²¹Kiwaak ngamoru nadapal tooma asaduku sodi kiwaak apukenit kidiama.

²²Kianyun ayong ka iyong kaina. Amini ayong kidiama apukenit, nakidingos a ngiborei aluarei a ngabeben, kainak iyong ngitalio daang lu adungokini ayong Ngisirael.

²³“Tosubak emeesa anakitoe a ewoi lo erai aoyau keng na alokwap ngasentimitae ngatomwon-kauni ka ngakan-kauni, tarai aurianut keng ngasentimitae ngatomwon-omwon ka ngoomwon, tarai aoyau keng na alokidiama ngasentimitae ngatomwon-kapei ka ngakan-kapei.

²⁴Toburuchia a egolit bon sodi kiwaak atorosit a egolit lowaitin kiriam.

²⁵Kiwaak atorosit na erai ngamilimitae ngatomwon-kaarei ka ngakan, sodi kisiriam egolit lowaitin a atorosit.

²⁶Tosubak ngasua a egolit na iriemito ngoomwon, kiwaak kesi lowaitin luomwon eyakasi nakejen.

²⁷Ngasua na igangito ngakito na etingitere emeesa, iwaakinio diyete atorosit.

²⁸Tosubak ngakito anakitoe a ewoi toburuchia a egolit.

²⁹Tosubak ngatubwae nabeleny ka ngikopoi, ka ngichupae, ta ngatubwae nachukul toliworos elemuununere emuna lo epuritoe. Esubio ngiboro ngulu daang a egolit bon.

³⁰ Iwaakinio emeesa ngaren asaduku a Achamunet. Emini amugati na italeunitoe na kepeyoore ayong kidiama emeesa jiik.

³¹“Tosubak ni esipor ataa a egolit bon. Tosubak ewae loa ngalup ka ngaten keng a egolit alo itiekitae. Ani ngatur keng nakebuseak, ka nilemu, ta ni epukiarit, imorikinosi daang toliworos ibore ipei.

³²Erupunete ngaten ngakan-kapei alowaitin keng, epete ngauni lowae epei.

³³Apei a ngaten anakan-kapei kanguna, epete ngatur nakebuseak ngauni na eraakasi auk a ngatur a ekitoe alo ikwaan ka engoomo, na eyakasi nilemu, ka ni epukiarit.

³⁴Epete ngaten ani esipor ataa ngatur nakebuseak ngoomwon na ikote ngatur a ekitoe alo ikwaan ka engoomo, ni eyakasi nilemu ka ni epukiarit.

³⁵Emini nilemu kwap ateni apei a ngaten anakan-kapei kanguna.

³⁶Ngalemuyek, ka ngaten, ta ni esipor ataa, eliworosi daang na itiekunitae aapei, a egolit bon.

³⁷Tosubak ngataae ngakan-kaarei kotere ni esipokinitae, sodi kiwaak kesi toliworos echayete alowae alo alongaren.

³⁸Tosubak ngasua naridet ngatotol ka ngikaparaparae keng a egolit bon.

³⁹Tolem ngakiloi ngatomwon-uni ka ngakan a egolit bon tosubakinea ni esipor ataa ka ngiboro luche eyakasi neni.

⁴⁰ Tochoik asubakin kesi itemem ka eger lokedodikini ayong iyong alomoru.