Read turkana Apudunet 26 Bible Online

Apudunet 26 - turkana bible

Apudunet 26

¹“Tosubak tooma eam kang lo italeunitoe, a ngawarui a ngatomon ana edonyunitoe anajul a ngamesekin anakaanikak ajokak pusiek, ka napusiek-arengak, ta naarengak. Todonyokinoe kesi asir totokokinoe ngiborei lua ngabeben.

²Tosubak ngawarui daang eriyan, erai aoyau ngamitae ngatomon ka ngaarei, tarai aurianut ngamitae ngaarei.

³Todonyok ngakan wapei toliworos atiaket apei, todonyok nache kan dang wapei kongina.

⁴Tosubak ngatoron a awaru anapus alokwaas alo anikalapatan a awaru ana a atiaket a apei.

⁵Kiwaak ngatoron ngatomwon-kan nawaru na atiaket ana ekingaren, ta ngatoron ngatomwon-kan na ikwaan ka kesi na eyakasi nawaru na esal na a atiaket ana ngaarei.

⁶Tosubak ngikodo a egolit ngitomwon-kan lu iropakinea iyong ngatiaket naarei toliworos apei.

⁷“Tosubak ngawarui ngatomon ka apei anajul a ngaanei toliworos kesi imukitere eam kang.

⁸Tosubak ngawarui daang eriyan, erai aoyau ngamitae ngatomon ka ngauni, tarai aurianut ngamitae ngaarei.

⁹Todonyok ngakan wapei toliworos atiaket ache. Tobilak awaru na ngakan-kapei ngabilakinet ngaarei alongaren eam kang.

¹⁰Kiwaak ngatoron ngatomwon-kan lokwaas a awaru ana esal a atiaket a apei, sodi kiwaak ngatoron ngatomwon-kan lokwaas a awaru ana atiaket anache.

¹¹Tosubak ngikodo ngitomwon-kan lua ngasua ananyangayek, tokodak natoron toropakinotor ngatiaket naarei toliworotor akimuket apei.

¹²Kinenek epewae a awaru a apei kamanakete eam.

¹³Ngasentimitae nache tomwon-kan eyakasi lokwaasea a ewae alokooyen, inenekinosi lokwaasea a eam kimuko.

¹⁴“Tosubak ngakimuket ngache ngaarei, toliwor apei aka eleu a emesek alo emuritae torenger, tarai nache aka eleu aloajokon, toliwor imukere nikalapatan.

¹⁵“Tosubak ngakito na igangito eam eraakasi na eteneenete. Tosub anakitoe a ewoi.

¹⁶Toliwor akitoe na igangit eam daang na erai aoyau keng ngamitae ngoomwon, tarai aurianut keng ngasentimitae ngatomwon-kapei ka ngakan-kapei.

¹⁷Pena ngiwaitin ngiarei lu ejipito, ibakito, toliworos kesi eropakinere ngakito na igangito eam aapei. Pena ngajipet nguna nakito na igangito eam daang.

¹⁸Tosubak eam a Akuj ngakito na igangito ngatomwon-arei lowae loa lokuju

¹⁹pena ngasua na eraakasi ngakwangae ngatomwon-omwon kwap kech. Kwap akitoe apei, pena ngakwangae ngaarei na etingete ngajipet naarei.

²⁰Tosubak ngakito na igangito eam ngatomwon-arei lowae loa lokwap eam.

²¹Pena ngasua na eraakasi ngakwangae ngatomwon-omwon, lowae loa ngalup a ngakito anaarei igangito eam.

²²Ani ewae loa lokamanakete eam lo eyei too, tosubak ngakito na igangito eam ngakan-kapei,

²³ka ngakito na igangito eam ngaarei na eyakasi lowaitin.

²⁴Ngakito na igangito eam eyakasi lowaitin nguna, eropakinio alokwap sodi kimorikinos aapei tanang kidiama. Ngakito naarei igangito eam eyakasi lowaitin luarei, esubakinio loger ngolo.

²⁵Nakaneni epete ngakito na igangito eam ngakan-kauni, imorikina ka ngasua na eraakasi ngakwangae ngatomon ka ngakan-kapei na eyakasi lowae loa ngalup, eyakasi ngaarei kwap akitoe na igangit eam apei.

²⁶“Tosubak ngakito na iriwokina ngatomon ka ngakan anakitoe a ewoi. Toliworos ngakan ngaka ngakito ana igangito ewae epei a eam.

²⁷Toliworos ngakan ngaka ngakito ana igangito ewae loche a eam. Toliworos ngakan ngaka ngakito ana igangito ewae loa lotoo, lo erai eka lokamanakete.

²⁸Akitoe na iriwokina na eyei kiding, na ewei anakidingos a ngakito ana igangito eam, emini lowae epei a eam, tanang lowae loche.

²⁹Toburuchia ngakito na igangito eam a egolit sodi tokodak ngasua na iriemito na igangete ngakito na iriwokina. Eburuchiario ngakito na iriwokina nguna dang a egolit.

³⁰Todukok eam itemem ka eger lokolong kedodikini ayong iyong alomoru.

³¹“Tosubak awaru nakaanikan ajokon edonyunitoe anajul a ngamesekin anapusiek, ka napusiek-arengak, ta naarengak. Todonyokinoe kesi totokokinoe ngiborei lua ngabeben.

³²Kinenek kesi napirio ngoomwon na eburuchiaritae a egolit, na eraakasi ngawo, na ekodakinitae lokodo, sodi kitowae alowaitin a nguomwon alu a ngalup eyakasi ngasua nakwangae.

³³Kinenek awaru kwap angedakinet a ngikodo na eyei lowae loa alokidiama eam kang. Ani asaduku a Achamunet na eyakasi ngamoru nadapal ngaarei tooma, kiwaak naabor a awaru. Etiaki awaru ngina ewae lo italeuno ka ewae lo italeuno noi.

³⁴Tonikenik apukenit nasaduku a Achamunet.

³⁵ Nikalapatan a ewae alo italeuno noi, kiwaak emeesa lowae loa lokwap eam kang, ka ni esipor ataa lowae loa lokuju.

³⁶“Ani akituk a eam, kiwaak awaru nakaanikan ajokon edonyunitoe anajul a ngamesekin anapusiek, ka napusiek-arengak, ta naarengak. Todonyokinoe asir.

³⁷Tosubak awaru naga ngapirio ngakan na esubunitae anakitoe a ewoi, toburuchiarae a egolit, ka akodakin ngikodo ngikan a egolit. Tosubak ngapirio nguna ngiwaitin lua ngalup ngikan a ngasua ananyangayek.