Read turkana Apudunet 27 Bible Online

Apudunet 27 - turkana bible

Apudunet 27

¹“Todukok ekeno a ngakipeyos a Ekapolon Akuj a ngakito a ewoi. Eliwor lo eriyan ngiwaitin daang, erai aoyau keng ngamitae 2.2, tarai aurianut keng ngamitae 2.2. Toliwor aoyau na alokidiama amita 1.3.

²Kiwaak ngajipet kidiama ngiwaitin luomwon. Imorikinosi kesi toliwor ngipei ka ekeno a ngakipeyos, sodi toburuchiarae a asuat ananyang.

³Isubakini iyong ngakaparaparae na ikamete ekuron, ka ngakalobochio nawadet ngalup, ka ngatubwae, ka ngikodo, ta ngataritarea na elemere ngatotol anakim. Esubio ngiboro ngulu daang a ngasua ananyangayek.

⁴Tosubak ngiriko anasua ananyangayek sodi kiwaak ngasua na iriemito ngoomwon lowaitin toliworos ngatinget.

⁵Kiwaak ngiriko ngulu kwap atorosit na ekeno a ngakipeyos, sodi tanang kiding ekeno.

⁶Tosubak ngakito natinget anakitoe a ewoi, toburuchia a asuat ananyang.

⁷Kirepak kesi daang nasua na iriemito na eyakasi lowaitin daang a ekeno a ngakipeyos, pena neni esaa lo ilepilepitere kesi.

⁸Tosubak ekeno a ngakipeyos a ngakito ana etemem, kimiek eororete, itemem ka eger lokolong kedodikini ayong iyong alomoru.

⁹“Tosubak alaar a eam kang a ngawarui anakaanikak ajokak. Ani alowae alo alokuju, toliwor aoyau a ngawarui kanguna ngamitae ngatomwon-omwon ka ngoomwon.

¹⁰Kiganga ngapirio ngatomwon-arei na ngasua ananyangayek ana eyakasi ngiwaitin lua ngalup ngitomwon-arei lua ngasua ananyangayek, ta ngikodo ka ngasua kech na esubunitae anasua anakwangae.

¹¹Tosubae kongina tani alowae alo alokwap alaar.

¹²Ani ewae loa lotoo, pena ngawarui na eraakasi aoyau kech ngamitae ngatomwon-arei ka ngaarei, toyakas ngapirio ngatomon ka ngiwaitin lua ngalup ngitomon.

¹³Ani ewae loa lokide lo eyei ekidor, toliwor aurianut a alaar ngamitae ngatomwon-arei ka ngaarei.

¹⁴Ngawarui na epete lowae epei eliworosi ngamitae 6.6, toyakas ngapirio ngauni ka ngiwaitin lua ngalup nguuni.

¹⁵Ani ewae loche, epete ngawarui na eraakasi ngimitae 6.6, toyakas ngapirio ngauni ka ngiwaitin lua ngalup nguuni.

¹⁶Ani akituk a eam, emini awaru na erai aoyau keng ngamitae ngakan-koomwon na edonyunitoe anawaru anakaanikan ajokon a ngajul a ngamesekin anapusiek, ka napusiek-arengak, ta naarengak, todonyokinoe asir. Igangio a ngapirio a ngoomwon alowaitin a nguomwon alu a ngalup.

¹⁷Ngapirio daang na iriemito alaar, eropakinio a ngasua anakwangae. Esubunio ngikodo keng anakwangat, sodi tosubunae ngiwaitin kech lua ngalup anasuat ananyang.

¹⁸Eliwor aoyau na ngalup a alaar ngamitae ngatomwon-omwon ka ngoomwon, eliwor aurianut ngamitae ngatomwon-arei ka ngaarei, tarai aoyau na alokidiama ngamitae 2.2. Esubunio ngawarui anawaru anakaanikan ajokon, tosubunae ewae loa ngalup a ngasua ananyangayek.

¹⁹Ngiboro daang lu esubere etich aloeam ka ngakito daang na itoweito eam, ka alaar, esubunio anasuat ananyang.

²⁰“Todungok Ngisirael kiinut iyong akimiet naajokon a ngikito sodi kinokakinere ataa ebong.

²¹Iwaakinete Aron ka talokookeng ataa loeam kang, lowae lo anikalapatan a awaru ana eyei ngaren asaduku a Achamunet. Enoki ataa ngina alongaren kang kaneni ebong tanang nataparach. Irichakinete Ngisirael ka ngalesea kech ngitalio ngulu jik.