Read turkana Apudunet 28 Bible Online

Apudunet 28 - turkana bible

Apudunet 28

¹“Tanyarau Aron ka talokookeng lu enyaritae Nadab, ka Abiu, ka Eleasar, ta Isamar. Totiaku iyong kesi ani a Ngisirael, sodi tosuba etich kang eraakasi ngimurok.

²Todonyok lokaatokon Aron ngiworui lu eraakar emuron a Akuj, sodi taanyunea ngesi ekipur ka arimatoi.

³Tanyarau ngikadonyok daang lu etaanyu ayong ekunonoonu a akidony, tolimok kesi atamar todonyo ngiworui a Aron sodi toliworor ngesi emuron kang.

⁴Tolimok kesi todonyokis eboli lo erarum, ka akaluwat[23] a emuron a Akuj, ka eworu lokooyen, ka echat lo edonyokinitoe asir, ka achaat, ta aruba. Esubakinete kesi lokaatokon Aron ka talokookeng ngiworui ngulu, sodi tosubeta kesi etich kang eraakasi ngimurok kang.

⁵Edonyioto ngikadonyok ngajul a ngamesekin napusiek, ka napusiek-arengak, ka naarengak, ta awaru nakaanikan ajokon, a auno a egolit.

⁶“Esubakinete akaluwat a emuron a Akuj anajul a ngamesekin anapusiek, ka napusiek-arengak, ta naarengak. Esubakinete tani a auno a egolit, ta awaru nakaanikan ajokon edonyokinitoe asir.

⁷Lokwaasea a awaru, eropakinio ngaunoi ngaarei na eenikinere losegeta.

⁸Aruba na etokitoe niajokon na esubunitae aloboro alupei kangulu, eropakinio akaluwat a emuron a Akuj kimorikin toliworos awaru apei.

⁹Tolem ngamoru naarengak ngaarei sodi kigerok ngirora lutomon ka ngiarei kata lokookeng a Yakobo namoru nguna,

¹⁰itutupakinit a eger alo kolong edounere. Pena ngikan-kapei namoru apei, pena ngikan-kapei namoru nache.

¹¹Toseu itwaan ni ekulana, kigerok ngamoru naarei nguna ngirora kata lokookeng a Yakobo, kitowo ngamoru a ngiriko a egolit.

¹²Kiwaak kesi kidiama ngaunoi na eananakinere akaluwat a emuron a Akuj losegeta, toliworos kesi itamunitere ngitela lutomon ka ngiarei a Ngisirael. Ani kikokin neni, enapi Aron ngirora kech alosegeta keng, sodi etamuununea ayong Ekapolon Akuj ngitunga kang jiik.

¹³Tosubak nginerin a egolit ngiarei

¹⁴ta ngiriko a egolit bon lu eluguritoe loger a loikit sodi toropak logerin.

¹⁵“Todonyok emuron loapolon a Akuj eboli lo enapi alorarum toyeneenea ngakiro na esaki Akuj. Edonyunio aloboro alupei ikote lu asubere akaluwat na emuron a Akuj. Todonyok tani asir na ikwaan ka na akaluwat a emuron a Akuj.

¹⁶Eliwor eboli ngolo lo eriyan ngiwaitin daang, tobilakinitetei ngaarei. Eliwor aoyau keng ngasentimitae ngatomwon-arei ka ngaarei.

¹⁷Tatapak ngangedakinet ngoomwon a ngamoru ana elalak ngaropiyae kidiama keng. Angedakinet na ekingaren, kirepak ngamoru nakaalak a ngaropiyae naarengak-puu, ka na enyaritae topas, ta napus-aliban toreng.

¹⁸Ani angedakinet na ngaarei, kirepak ngamoru nakaalak a ngaropiyae na eraakasi napus-aliban, ka napus-arengan, ta na enyaritae alumas.

¹⁹Ani angedakinet na ngauni, kirepak ngamoru nakaalak a ngaropiyae na enyaritae yasinito, ka nakaagongon noi, ta na enyaritae amesisto.

²⁰Ani angedakinet na ngoomwon, kirepak ngamoru nakaalak a ngaropiyae na enyaritae berili, ka naarengan, ta auk ana enyaritae alumas. Irepakinio ngamoru na elalak ngaropiyae nguna daang logerin a egolit.

²¹Ngamoru natomon ka ngaarei nguna daang, kigerok ekiro epei namoru apei, a ngirora alutomon ka ngiarei a talokookeng a Yakobo. Ikokinio neni sodi toweikis kesi ngitela lutomon ka ngiarei a Ngisirael.

²²Tosubak ngiriko a egolit bon lu eluguritoe loger a loikit, kotere eboli lo enapitae alorarum.

²³Tosubak ngiriko a egolit ngiarei sodi toropak lochileta lu alokidiama eboli lo enapitae alorarum.

²⁴Toinik ta loikit luarei loriko luarei.

²⁵Toinik ngiwaitin luche arei ata loikit ni eyakasi ngigerin luarei. Kotere erot ngolo, toropak kesi alowae alo alongaren naunoi na eananakinere akaluwat na emuron a Akuj losegeta.

²⁶Ani erumor tosubak ngiriko ngiarei a egolit sodi toropak lowaitin lua lokwap a eboli alo enapitae alorarum. Eliwor ni eropakinio neni ekwaas lo alotooma a akaluwat ana emuron a Akuj.

²⁷Tosubak nabo ngiriko ngiarei a egolit sodi toropak lowae loa lokwap ngaunoi naarei eananakinere akaluwat a emuron losegeta. Aropakinitae ngiriko ngulu diyete etoro a eworu, tarai kidiama aruba na edonyunitoe niajokon.

²⁸Ani ngiriko a eboli alo enapitae alorarum, toinik loriko a akaluwat a emuron a Akuj a auno anapus, sodi min eboli lo enapitae alorarum kidiama aruba, nakaneni nyiilajalajakin.

²⁹“Ani elomari Aron lowae lo italeunitoe, enapi eboli lo enapeeneo alorarum. Epete ngirora a ngitela a Ngisirael loboli ngolo. Ikokini ngesi neni sodi etamuununea ayong Ekapolon Akuj ngitunga kang jiik.

³⁰ Kiwaak Urim ka Sumim[24] loboli lo enapitae alorarum sodi toting Aron na ebunio lowae lo italeuno lo ayei ayong. Esaa ngolo, ejoikinit ngesi enapeene eboli ngolo jiik topedorea ngesi akiyen ngakiro na asaki ayong ani a Ngisirael.

³¹“Esubunio eworu lo iporit akaluwat a emuron a Akuj a awaru anapus ana esubunitae a ngajul a ngamesekin bon.

³²Toped kiding eworu ngolo min ni ebutokinere akou, sodi totokok ngikwaasea a apedot kangina kiratakinere nyeechil.

³³Kitokorian kwap keng a ngalukan ana ikwaan ka ngalam napusiek, ka napusiek-arengak, ta naarengak, aapei ka eworu lokaanikan ajokon.

³⁴Tongichak ngichoroi lu esubunitae a egolit nakidingos kech.

³⁵Tanapeene Aron eworu ngolo na esubea etich erai emuron kang. Iirario eruye a ngichoroi kangulu esaa daang lo elomarea ngesi lowae lo italeuno lo ayei ayong Ekapolon Akuj, kori na erotokinio ngesi kaneni, sodi nyetoana ngesi.

³⁶“Tosub akaparaparat a egolit sodi kigirak ngakiro nugu kidiama, ‘Italeunitoe toliwor ika Ekapolon Akuj’.

³⁷Toinik akaparaparat ngina ngaren achaat a auno anapus.

³⁸Enapeene Aron akaparaparat ngina aloreet keng sodi atachamunea ayong Ekapolon Akuj ngadekon daang na italeunete Ngisirael toliworos ngakang, tani kichwangakinito kesi eger eche lo elemunere ngadekon nguna.

³⁹“Todonyok echat a Aron lo eninik tojok, sodi totokok achaat naajokon ka aruba na edonyokinitoe asir.

⁴⁰“Todonyok talokookeng a Aron ngichetea, ka ngarubae, ta ngapukoto, taanyuneta kesi ekipur ka arimatoi.

⁴¹Kitanap lokaatokon Aron ka talokookeng ngiworui ngulu. Ani erumor toseu kesi ka akitaleun kiwasak akimiet toliworos esubete etich kang eraakasi ngimurok.

⁴²Todonyok kesi ngisurualei lukaanikak lu enapete kesi anaaborin tananga nakalokidingo. Enapete kesi ngisurualei ngulu tojongoto ngawat kech atakanuu.

⁴³Ejoikinit Aron ka talokookeng enapeenete jiik ngisurualei ngulu na elomuneta loeam kang kori na eponeta kesi lokeno loa ngakipeyos esubete etich lo eraakatar ngimurok alowae alo italeuno. Ani kikokis neni, nyeario kesi kotere akitatakanuunit ngawat kech. Eliwor etal ngolo lo iwapete Aron ka ngalesea keng jik.