Read turkana Apudunet 29 Bible Online

Apudunet 29 - turkana bible

Apudunet 29

¹“Ikokini iyong nege italeuni Aron ka talokookeng toliworos ngimurok lu esubete etich kang. Tolem emong losorokit ka ngimesekin ngiarei lu emam ni ichwangakina.

²Tolem ngakiria a ngakanoi naajokak nakaneni nyiiwaak ekitoe lo itubui, sodi tosubak ngamugati ngache kiwaak akimiet, ani ngache nyiiwaak akimiet. Ani ngache tosubak eraakasi ngabisikutio na imorikinitae ka akimiet.

³Kiwaak kesi nakikap sodi kipeyoo ayong na ilemunea iyong emong ka ngimesekin luarei eraakasi ngakipeyos.

⁴“Toriku Aron ka talokookeng nakituk a eam kang, sodi kitaleu kesi kilotaros a ngakipi.

⁵Ani erumor kitanap Aron ngiboro lu eraakar emuron a Akuj. Ngiboro ngulu kesi echat, ka akaluwat na emuron a Akuj, ka eworu lokooyen lo iporit akaluwat, ka eboli lo enapitae alorarum, ta aruba.

⁶Kitanap ngesi achaat sodi tokodak lomachar lo italeunitoe lo igiritae ngakiro nugu, ‘Italeunitoe toliwor ika Ekapolon Akuj’.

⁷Ani erumor tolem akimiet na etal sodi kidokak nakou keng kitaleu ngesi.

⁸“Toriku talokookeng a Aron sodi kitanap ngichetea.

⁹Kitanap kesi ngarubae anaaborin, ani erumor tobutok ngapukoto nakies kech. Ikokini iyong neni italeuni Aron ka talokookeng. Esubete kesi ka ngalesea kech etich kang eraakasi ngimurok jik.

¹⁰“Toriku emong ngaren eam kang sodi tolimok Aron ka talokookeng atamar kidokokis ngakan kech nakou a emong.

¹¹Taara emong alongaren kang anakituk a eam kang.

¹²Tomietu ngaakot a emong ngadi a ekimoin kon sodi kiwasak najipet a ekeno a ngakipeyos. Ani erumor tobukok ngaakot nache lowae loa ngalup a ekeno.

¹³Ani erumor tolem asepae daang, ka ewae loajokon a emany, ta ngingalur luarei imorikina aapei ka asepae kech, sodi topee alokeno toliworos ngakipeyos nakipeyokinit iyong ayong.

¹⁴Ani eliwor akiring a emong ka eleu, ta ngiboro a akook ka ngikujit, topee anikalapatan a adakar toliworos ngakipeyos na elemarete ngasechesea a ngimurok a Akuj.

¹⁵“Tolem emesek epei tolimok Aron ka talokookeng kidokokis ngakan kech nakou a emesek kangolo.

¹⁶Taar emesek ngolo towatak ngaakot keng lowaitin daang luomwon a ekeno a ngakipeyos.

¹⁷Totubutubu nginerin a emesek, kilota ngiboro a akook ka ngamuroi sodi kidokok kidiama akou ka nginerin luche.

¹⁸ Topee emesek daang alokeno toliwor akipeyos a akiriket. Kajoikinit ayong akukuny a akipeyos kangina.

¹⁹“Tolem emesek loche, sodi tolimok Aron ka talokookeng kidokokis ngakan kech nakou a emesek kangolo.

²⁰Taar emesek ngolo sodi kiwasak ngaakot keng ngache lobonibon a ngaki ana aloteten a Aron ka talokookeng. Kiwasak tani lomoyo luapolok a ngakejen ana aloteten. Ani ngaakot na idongete, torwatak lowaitin daang a ekeno a ngakipeyos.

²¹Tolem ngaakot ngache alokeno a ngakipeyos, tolem tani akimiet a etal, sodi kiteraterak nia Aron ka ngiworui keng, ani erumor kiteraterak talokookeng ka ngiworui kech. Italeunosi kesi ka ngiworui kech toliworos ngika Ekapolon Akuj.

²²“Kipachu nikatoronon alomesek, ka asonyok, ka asepae, ka ewae loajokon alomany, ka ngingalur luarei imorikina aapei ka asepae kech, ta akalokiding a amuro anakitalio.

²³Anakikap a ngamugati ana kepeyokinitoe ayong, tolem ngamugati ngapei-pei nagelagelae. Tolem apei kanguna iwaakinitae akimiet, tolem apei na nyiwaakinitae akimiet, ta abisikut apei.

²⁴Kiwaak akimuj naga daang nakan a Aron ka talokookeng tolimok kesi atamar kitaleut, kainakis ayong erai akipeyos na iwakiwakio.

²⁵Ani erumor tolema iyong anakan kech sodi topee alokeno alo ipeyonokinere Akuj imorikina ka akiring na inomio, toliworos ngakipeyos a akiriket. Kajoikinit ayong akukuny a akipeyos kangina.

²⁶“Tolem atorobu a emesek kalo kitaleu, kiinak ayong erai akipeyos na iwakiwakio. Eliwor ekiner ngolo anibarasit ekon.

²⁷“Ani italeunio emuron toliwor eka Akuj, elemunio atorobu ka akalokiding a amuro anakitalio a emesek alo a ngakipeyos a ana iwakiwakio kainakin ayong toliwor akipeyos na iwakiwakio, sodi kitegeliarae toliwor aka ngimurok a Akuj.

²⁸Ngirwa daang lu elemuneta ngitunga kang ngakipeyos a ekisil, eliworosi atorobu ka akalokiding a amuro anakitalio a ibarasit ngaka ngimurok. Nginerin ngulu eliworosi kesi kainanakinete ayong Ekapolon Akuj.

²⁹“Irumete talokookeng a Aron ngiworui keng lu eraakar emuron a Akuj, na etoanea ngesi. Ani na italeunere kesi tarata ngimurok, tanapa ngiworui ngulu.

³⁰Lokookeng a Aron lo ilunyokin nados keng ngesi eliwor emuron, enapi ngiworui ngulu a ngirwa a ngikan-kaarei. Lokookeng a Aron ngolo ngesi lo elomari lowae lo italeunitoe, akisub etich kang alotooma eam kang.

³¹“Tolem akiring a emesek alo italeunere Aron ka talokookeng sodi kipoo alowae alo italeunitoe.

³²Enyamete Aron ka talokookeng akiring a emesek ka ngamugati na eyakasi nakikap anakituk a eam kang.

³³Ani akiring na arai ngakipeyos na arimakinere ngasechesea a ngimurok na etaleunere, enyamete kesi. Ngimurok a Akuj make enyamete akiring ngina kainyo erai na italeunitoe.

³⁴Ani kiwalak akiring kori ngamugati ngache, ejoikinit inomio, nyechamit enyamio, kainyo eraakasi na italeunitoe.

³⁵“Tosubea Aron ka talokookeng ngakiro daang nakadungok ayong iyong. Kitaleu kesi toliworos ngika Akuj a ngirwa a ngikan-kaarei.

³⁶Akolongit daang ejoikinit iyong ilemuni emong toliwor akipeyos na erimakinere akisech. Italeuni akipeyos ngina ekeno a ngakipeyos. Ani erumor kiwasak akimiet na etal toliwor lo italeunitoe.

³⁷Tosubeene kongina akolongit daang, a ngirwa a ngikan-kaarei. Ani kikok iyong neni, eliwor ekeno a ngakipeyos lo italeunitoe. Sodi ani itwaan daang kori ibore daang ni etapi ekeno ngolo, eliwor ni italeunitoe.[25]

³⁸“Akolongit daang, kipeye jiik alokeno ngimesekin luuchik ngiarei lu eraakasi ekaru epei.

³⁹Kipeye imesek ipei nataparach, sodi kipeye niche ebong.

⁴⁰Ani imesek ni ekingaren, tolem akilo apei a ngakiria a ngakanoi naajokak, kimorik ka alita apei a akimiet ana etal. Kidokak alita apei a emuna alo epuritoe toliwor akipeyos.

⁴¹Kipeye imesek niche ebong, sodi tolem aapei ka ngakiria, ka akimiet, ta emuna lo epuritoe, loger alo a ataparach. Eliworosi ngakipeyos a akiriket kang, ayong Ekapolon Akuj. Kajoikinit ayong akukuny a akipeyos kangina.

⁴²Ngirwa daang, eliworosi ngakipeyos nugu na ipeyeo alongaren kang, anakituk a eam kang. Neni ngesi kiriamiriami ayong ka ngitunga kang, kesuruor iyong.

⁴³Kiriamiriami ayong ka Ngisirael neni. Itiliwori akwangis kang neni ni italeuno.

⁴⁴Etiliwori ayong eam ka ekeno a ngakipeyos kang lu italeuno. Etaleuni ayong Aron ka talokookeng tosuba etich kang eraakasi ngimurok.

⁴⁵Amini ayong ni eyakasi Ngisirael, sodi atoliwor Akuj kech.

⁴⁶Eyenunete kesi atamar ayong Ekapolon Akuj arai Akuj kech, nakolong epuduni kesi anakwap a Misiri, amin ni eyakasi kesi. Ayong Ekapolon Akuj arai Akuj kech.