Read turkana Apudunet 3 Bible Online

Apudunet 3 - turkana bible

Apudunet 3

¹Akolongit apei, eyoki Musa ngamesekin ka ngaanei alokamuran alo keng anyaritae Yesiro. Arai Yesiro emuron a ngakujo a akwap enyaritae Midian. Toruja Musa ngibaren kitoro nariet, tananga moru a Akuj enyaritae Sinai.

²Bu emalaikat a Ekapolon Akuj nikeng ikoni asarae a akim na anoki alotooma amoni. Etee Musa akim enomit amoni nakaneni nyenomiara.

³ Tolim Musa tama, “Abe kitalarete ngakiro nugu. Nyoni peenomiarea amoni naga? Erudar chene diyete engolik.”

⁴Ani ingolikini Ekapolon Akuj atamar erudun Musa diye, kiruorik alotooma amoni tanyara Musa tama, “Musa! Musa!” Kiki Musa tama, “Ayong lo.”

⁵Tolimok Akuj ngesi tama, “Tochoite iruduni nabo. Tobuto ngamuk kon kainyo iwei iyong analup ana italeunitoe.

⁶Ayong ngesi Akuj kata apaakon. Arai ayong Akuj a Aburaam, ka Isaka, ta Yakobo.” Sodi tarap Musa ereet keng, kainyo akerit ngesi aanyungar Akuj.

⁷Tolim Ekapolon Akuj tama, “Aanyunga ayong eger lo eboliare ngitunga kang alo Misiri. Eira ayong kesi igorosi, esakete kitoyuun alokasubak etich alu eweikinito kesi alotich. Ayeni ayong ngichan kech daang.

⁸Nakaneni abu ayong ayuun kesi ani eyakasi Ngimisiri, sodi epud kesi alo Misiri, elomak nakwap naajokon tololom. Akwap na ileleba ngakile ka akimiet a ao. Akwap a Ngikanaan, ka Ngiiti, ka Ngiamor, ka Ngiperes, ka Ngiipi, ta Ngiebus.

⁹Eira tokona ayong akigoro a ngitunga kang, nabo engolik ayong eger lo eboliatar Ngimisiri kesi.

¹⁰Kameari tokona ayong iyong nakwap a ekapolon a Misiri, sodi kipud iyong ngitunga kang anakwap keng.”

¹¹Nakaneni tolimok Musa Akuj tama, “Arai ayong dang ichetwaan a? Ekokini ayong alosi lokapolon a Misiri ai?”

¹²Tatachak Akuj tama, “Kiruki ayong ka iyong, ani na ipudunio iyong ngitunga alo Misiri, kipeyoote esi ayong alomoru kalo. Nguna kesi idodiunete atamar ayong kamearit iyong.”

¹³ Nakaneni tatachak Musa tama, “Na alosio ayong nia Ngisirael atolimok atama, ‘Akuj na kata apaakus kameuni ayong nikus’, kengisete kesi ayong tamasi, ‘Ngae ekiro keng?’ Alimokini ayong kesi atama ai?”

¹⁴Tolim Akuj tama, “Arai Ayong na arai Ayong. Ilimokini kesi ngakiro nugu, ‘Ngolo enyaritae Ayong[5] ngesi kameu ayong nikus.’ ”

¹⁵Tolimok nabo Akuj Musa tama, “Tolimok Ngisirael atamar Ekapolon Akuj na erai Akuj kata apaakech, Aburaam, ka Isaka, ta Yakobo, ngesi kimeunit iyong nikech. Ekiro kang logo jik, kanyaraate ayong ngalesea daang na isidiunosi a ekiro kangolo.

¹⁶Kape tochunak ngikarikok daang a Ngisirael wapei tolimok atamar Ekapolon Akuj na erai Akuj kata apaakech, Aburaam, ka Isaka, ta Yakobo ngesi abuni nikon. Tolimok kesi atamar abu ayong nakaneni aanyunga na esubeta kesi Ngimisiri.

¹⁷Atiaku ayong atamar epuduni kesi alo Misiri, ani eboliare. Ayaari ayong kesi nakwap a Ngikanaan, ka Ngiiti, ka Ngiamor, ka Ngiperes, ka Ngiipi, ta Ngiebus. Akwap na ileleba ngakile ka akimiet a ao.

¹⁸“Iirarete ngitunga kang ngakiro na ilimokini iyong kesi. Sodi kirukosi iyong ka ngikarikok a Ngisirael nia ekapolon a Misiri, tolimokis tamasi, ‘Ekapolon Akuj, na erai Akuj a Ngieburaniae, ngesi edodiun anikosi. Kimiekinae tokona sua atoloto a ngirwa a nguuni nariet akipeyore Ekapolon Akuj, na erai Akuj kosi.’

¹⁹Ayeni ayong atamar nyikimiekini esi ekapolon a Misiri toloto mati kitingakin atamar kimiek toloto.

²⁰Nakaneni kotere agogongu kang, erirae ayong ngitunga a akwap a Misiri atosub ngakitoodikinet nakailiilok kaina. Ani ekisidi kanguna, kimiekini ngesi esi toloto.

²¹“Etiliwori ayong Ngimisiri lu kikerito esi sodi ani na erotokinioto ngitunga kang, nyeerotokis a ngakan anikirion.

²² Aberu daang na erai Asiraelit, elosi ni eyakasi ngakidunyet keng Namisiri, ka aberu cha daang Namisirit na ibooyete ka ngesi anawi keng, sodi kilip ngiworui, ka ngiboro a egolit, ta asir a ngasua. Itanapete Ngisirael ngide kech lusapa ka lupesur ngiboro ngulu sodi tolemasi ebari a Ngimisiri.”