Read turkana Apudunet 30 Bible Online

Apudunet 30 - turkana bible

Apudunet 30

¹“Tosubak ekeno a ngakipeyos a ngakito ana eraakasi ngawo, kinomere emitina.

²Echamit ngiwaitin daang eriyan, ewae lokooyen erai ngasentimitae ngatomwon-omwon ka ngakan, ewae loche louriyen erai ngasentimitae ngatomwon-omwon ka ngakan, ani aoyau na alokidiama erai ngasentimitae ngatomwon-koomwon. Ngajipet na eyakasi lowaitin luomwon, ejoikinit imorikinosi ka ekeno ngolo tarata ngipei.

³Tobutak egolit lowae lo alokidiama ka lowaitin luomwon, ta ngajipet keng ani erumor tosil a atorosit a egolit kiriam.

⁴Tosubak ngiriko ngiarei a egolit lu ilepilepere, sodi toinik kwap atorosit na egolit alowaitin aluarei ibakito, tokoda ngakito na ilepilepere.

⁵Tolem ngakito nguna anakito ana eraakasi ngawo sodi tobutak egolit.

⁶Kiwaak ekeno ngolo lowae loa anikalapatan a awaru ana ineno alongaren asaduku a Achamunet. Neni ngesi kiriamiriami ayong ka iyong.

⁷Ataparach daang na ebunio Aron akisutar ngataae, inomi ngesi emitina alokeno kangolo.

⁸Inomi Aron emitina tani ebong na ebunio akinokakin ngataae. Akipeyos na inomeenere emitina naga, ejoikinit esi ka ngalesea kus ilemuunete jiik.

⁹Nyiipeo alokeno kangolo ibore nikitengeritoe ipeyoo, kerai akipeyos a ibarasit, kori akipeyos a ngalemet, nabo nyiidokak emuna lo epuritoe toliwor akipeyos.

¹⁰Akolongit apei alokaru, elemuni Aron akipeyos na italeunio ekeno ngolo, kiwasak ngaakot a ibarasit ani erai akipeyos na erimakinere akisech, kiwasak najipet naomwon a ekeno. Esubio kongina ekaru daang, jiik. Ejoikinit ekeno ngolo eliwor lo italeuno noi ayei ayong Ekapolon Akuj.”

¹¹Tolimok Ekapolon Akuj Musa tama,

¹²“Ani imari iyong Ngisirael, ejoikinit itwaan daang elemuni ngaropiyae na eyuunea akiyar keng, sodi nyeanyunotor ngesi ka ngakiro naaronok na imarunere.

¹³Itwaan daang ni imarunio, ejoikinit elemuni ngaropiyae na itemokino, itemitoe a eger alosek itemeenere. Ejoikinit itwaan daang elemuni toliworos ngadekon kang.

¹⁴Itwaan daang ni ejoikinit imarunio ni eraakasi ngikaru keng ngitomwon-arei, ka lu iporito ngikaru keng ngitomwon-arei elemuni ngaropiyae nguna.

¹⁵Nyeelem ekabaran nakaalak na idwangito nguna, nyeelem ni iboosit na nyitemokino, esaa lo elemuneta kesi ngaropiyae nguna toyuuneta akiyar kech.

¹⁶ Kidiau ngaropiyae nguna ani a Ngisirael sodi tosubea etich aloeam kang. Eliwor echur ngolo lo elemunete kesi etachitotor akiyar kech, sodi etamunea ayong akiyok kesi.”

¹⁷Tolimok Ekapolon Akuj Musa tama,

¹⁸“Tosubak ateger a ngasua ananyangayek ana erai ewae loa ngalup ngasua nanyangayek. Kiwaak nakidingos a eam ka ekeno a ngakipeyos kang, kiwaak ngakipi nateger.

¹⁹Kilotanareta Aron ka talokookeng ngakan ka ngakejen a ngakipi kanguna,

²⁰eringa nyelomara loeam kori na eponeta kesi lokeno apeikin Akuj ngakipeyos a akiriket. Ani kikokis neni, nyeario kesi.

²¹ Ejoikinit kesi ilotarete ngakejen kech ka ngakan kech sodi nyeetoaka. Irichakinete kesi ka ngalesea kech etal logo jik.”

²²Tolimok Ekapolon Akuj Musa tama,

²³“Tolem ngikito lukaakunyok kitem ngakiloi ngakan-kapei a ekinyaate alokaliwan ekukuny todwar, ka ngakiloi ngauni a ekitoe aloongor-nyang itukukunyi akimuj, ka ngakiloi ngauni a ngakasirim anakaakunyok.

²⁴Kitem nabo ngakiloi ngakan-kapei a ekitoe alo ikwaan ka loongor-nyang itukukunyi akimuj, (kitemoi daang itemem ka eger lopalem sek itemeenere). Kiatak ngalitae ngoomwon a akimiet,

²⁵sodi kitaleu akimiet nakiwasakina ngina, kimorikinae loger a akimiet anakaakunyon.

²⁶Kiwasak akimiet ngina loeam kang, ka asaduku a Achamunet,

²⁷ka emeesa, ka ngiboro keng daang, ka ni esipor ataa ka ngiboro keng, ka ekeno lo inomere emitina,

²⁸ta ekeno a ngakipeyos ka ngiboro keng daang. Kiwasak atubwa na ilotare, kiwasak tani ewae keng loa ngalup.

²⁹Kitaleu ngiboro ngulu a eger kangolo, nakaneni eliworosi lu italeuno noi. Itwaan daang kori ibore daang ni etapi kesi, ewani agogongu na eraakatar kesi lu italeuno.[26]

³⁰Ani erumor kiwasak Aron ka talokookeng akimiet, sodi kitaleu kesi toliworos ngimurok lu esubete etich kang.

³¹Tolimok Ngisirael tama, ‘Erai akimiet na etal ngina esubere etich keng jiik analesea kus kadaang.

³²Nyechamit esi iwasakinete ngitunga lu nyitaleunitoe, kori warasi nyiiwap ekitetemes lopei ngolo tosubeta akimiet ache na imorimoritae loger ngolo. Erai akimiet ngina na etal, nakaneni ejoikinit esi itiliworete na italeunitoe.

³³Itwaan cha daang ni esubakini akimiet ache na ikoni ngina, kori itwaan daang ni iwasakini itwaan ni nyerai emuron a Akuj, nyeringa imarunitae atamar erai ipei a ngitunga kang.’ ”

³⁴Tolimok Ekapolon Akuj Musa tama, “Tolem ngikito lu itukukunyete akimuj lugu lu eriyan, lu enyaritae ngitapi, ka ngichekeles, ka ngikelibena, ta lo erai ekinyaate bon.

³⁵Tosubakinea kesi emitina lo inomio, kimorikinae loger a akimiet anakaakunyon. Kiatak amakat kitoseg ngesi ka akitaleun.

³⁶Kirie epewae keng tonyapidid, sodi yaa tooma eam kang. Ani erumor kipurupurak ngaren asaduku a Achamunet. Kitiliwo emitina lo inomio ngolo lo italeuno noi.

³⁷Warasi nyiiwap ekitetemes logo tosubuneta emitina eche lo inomio lo erai ekus. Kitiliwosi emitina ngolo lo etaleun toliwor ekang.

³⁸ Ani kesubaki itwaan emitina lo ikoni ngolo kitiliwo akimiet nakaakunyon na iwasa, nyeringa ngesi imarunitae atamar erai ipei a ngitunga kang.”