Read turkana Apudunet 31 Bible Online

Apudunet 31 - turkana bible

Apudunet 31

¹Tolimok Ekapolon Akuj Musa tama,

²“Kingolik a, aseu ayong Besalel, lokookeng a Ur, lo erai etatait a Uri, alo erai eka ekitela a Yuda.

³Elelebik ayong ngesi agogongu kang. Etaanyu ayong ngesi achwaanu, ka aosou, ta ekunonoonu lo eyenea akisub ngiboro,

⁴ka arere ngiboro lokojokon tosub a egolit, ka akwangat, ta asuat nanyang,

⁵tokul ngamoru na esubere ngiboro, kichie ngakito, ka akisub ibore niche esaki ekunonoonu daang.

⁶Aseu ayong tani Oliab lokookeng a Aisamak, lo erai eka ekitela a Dan, tosuba ka ngesi etich. Ainak ayong tani ngikunonoe a adukuoru luche aosou, sodi tosubeta kesi ibore daang ni kadungok ayong iyong atamar tosubae.

⁷Esubunete kesi eam kang, ka asaduku a Achamunet ka apukenit keng, ta ngiboro daang a eam,

⁸emeesa ka ngiboro keng, ni esipor ataa erai egolit bon esubunitere ka ngiboro keng daang, ekeno lo inomere emitina,

⁹ekeno a ngakipeyos ka ngiboro keng daang, ta atubwa ka ewae keng loa ngalup.

¹⁰Esubunete kesi ngiworui luajokak enapete Aron ka talokookeng esubete etich kang lo eraakatar ngimurok.

¹¹Esubunete akimiet na etal ka emitina, lu eyakasi lowae lo italeunitoe. Ani esubete kesi ngiboro ngulu daang, ejoikinit esubakinete iyookino loger lo kadungok ayong iyong.”

¹²Todungok Ekapolon Akuj Musa atamar,

¹³tolimok Ngisirael tama, “Kirichakisi akolongit a Sabato na erai akolongit eangaritor ayong, kainyo erai ibore ni idodiuni anikus ka ayong jiik atamar ketiliwo ayong Ekapolon Akuj esi ngitunga kang.

¹⁴Kirichakisi akolongit a Sabato kainyo erai na italeunitoe. Nakaneni itwaan cha daang ni ewouni akirichakin, dio tosub etich akolongit ngina, eario.

¹⁵Eyakasi esi ngirwa ngikan-kapei lu echamit isubeta etich kus. Nakaneni erai akolongit na ngakan-kaarei na italeunitoe toliwor akang. Itwaan cha daang ni esubi etich akolongit ngina, eario.

¹⁶Irichunete Ngisirael akolongit ngina toliwor itamunitotor achamunet.

¹⁷ Eliwor akolongit ngina kitamunitor ayong ka Ngisirael jik atamar asubi ayong Ekapolon Akuj adis ka akwap a ngirwa a ngikan-kapei. Ani akolongit na ngakan-kaarei, eanga.”

¹⁸Ani kiruor Akuj ka Musa alomoru a Sinai kerumor, nak ngesi Musa ngamoru nadapal ngaarei na egirit ngesi alope ngitalio.