Read turkana Apudunet 32 Bible Online

Apudunet 32 - turkana bible

Apudunet 32

¹ Ani eyenunete ngitunga atamar atineniki Musa nikooyen awou atiyaun alomoru, tochunakinos wapei toloto nia Aron tolimokis tamasi, “Nyikiyeni sua ngakiro kiriamunotor itwaan be Musa en, nikolong kipuduni ngoni alo Misiri. Tosubakinae tokona sua akuj[27] nakiriki.”

²Tolimok Aron kesi tama, “Talachutu ngamaritoi a egolit na enapito ngaberu kus ka talokookus, ka tanakookus anaki kiinut ayong.”

³Sodi talachut ngitunga daang ngamaritoi na anapito anaki inut Aron.

⁴ Kidiau Aron ngamaritoi na ngaki sodi kinom tokeiasi, tobukok niborosit, sodi tosubak, itaok nikile. Tolimut ngitunga tamasi, “Ngisirael, akuj yok naga, nakolong kipuduni ngoni alo Misiri!”

⁵Ani ingolikini Aron ngakiro nguna, todukok ekeno a ngakipeyos ngaren itaok ngini sodi tama, “Emini moi esukukuu lo kirimar Ekapolon Akuj.”

⁶ Ani nataparach elilim, yaut kesi ngibaren lu eraakasi ngakipeyos na inomio, luche lunyamat lu araakasi ngakipeyos a ekisil. Kiboikinos ngitunga akinyam akimuj a esukukuu, ani erumor tolomakis akimat epurot ka akidongare emerasi.

⁷Tolimok Ekapolon Akuj Musa tama, “Totiyaar atipei kainyo ngitunga kon lu ngoon irikuni iyong alo Misiri, asecha kangero ayong.

⁸Aisikis erot lokolong adungokini ayong kesi atamar kiwapa. Asubakis kesi itaok nikile alogolit alo etekeiarete, ani erumor kilipa ka akipeyokin ngakipeyos. Ebalasi kesi erai ibore ngini akuj kech, nakolong epuduni kesi alo Misiri.

⁹Ayeni ayong atamar ichanaka ngitunga lugu noi.

¹⁰Kimiekinae tokona ayong nyikiratak. Angoikinit ayong kesi, asaki atomunya, sodi ketiliwo iyong ka ngalesea kon ebukut lo eyenikinitae.”

¹¹Nakaneni kimaima Musa Ekapolon Akuj na erai Akuj keng tolimok tama, “Ekapolon Akuj, nyo ingoikinitor iyong ngitunga kon kona, tarai kolong iyuuni iyong alo Misiri a agogongu anaationon?

¹²Isaki iyong Ngimisiri tamasi irikuni iyong ngitunga kon alo Misiri akiar alomoru sodi tomunya anakwap a? Toisik angoit, kimiek ngakiro nguna, nyiiyau ngichan luaronok ngulu lotunga kon.

¹³Kitamu ngikasubak etich kon Aburaam, ka Isaka, ta Yakobo. Ichikakini kolong iyong kesi tolimok atamar italalae iyong ngalesea kech loger a alalau a ngikanyer alu eyakasi nadis. Kichikak iyong kesi nabo atamar iinakini ngalesea kech akwap ngina toliwor akech jik.”

¹⁴ Nakaneni abu Ekapolon Akuj kimiek ngakiro nguna, nyeeyau ngichan luaronok lotunga keng loger losek abalar ayauni.

¹⁵Totiyaar Musa alomoru ekodit ngamoru nadapal naarei na egiritae ngitalio lowaitin luarei.

¹⁶Akuj alope asubi ngamoru nadapal naarei nguna, sodi kigirak ngitalio lutomon.

¹⁷Kiira Yochua ngitunga echalasi tolimok Musa tama, “Apupi ayong echale a ejie anadakar.”

¹⁸Tolim Musa tama, “Abe esibit bo meere echale lo idwangitere ngimoe, kori akigoro na idwangitotor ngimoe kesi. Erai echale ngolo eka aeo.”

¹⁹Ani eapuuni Musa diyete adakar, taanyunga itaok ngini ka ngitunga lu edongaate, abu tongo. Kimasak ngesi ngamoru naarei nadapal nguna kwap eringa eyei nakeju a emoru, tobwang ngesi ngamoru nguna.

²⁰Tolem ngesi itaok nisek asubakinete kesi kinom, ani erumor kirie tonyapidid, sodi kimorik ka ngakipi. Abu ngesi kitamat ngitunga.

²¹Tolimok ngesi Aron tama, “Anukiro nugu kisubeta iyong ngitunga lugu, itusubea iyong kesi akisech naaronon ikoni naga?”

²²Tatachak Aron tama, “Nyikingoik ayong. Iyeni iyong eger lo imuitor ngitunga lugu akisub naaronok.

²³Kalimokinete kesi ayong tamasi, ‘Nyikiyeni sua ngakiro asubakinosi anitwaan be Musa kaen, ani kolong kirikuni sua alo Misiri. Kotere ngakiro nguna tosubakinae sua akuj nakiriki.’

²⁴Atolimok ayong kesi atamar yaut asir kech na egolit. Apot lu anapito asir ngina talachut kainut ayong. Atachakak ayong asir ngina nakim sodi tatakanu itoak nikile en!”

²⁵Kingolik Musa atamar abu Aron kimiek ngitunga emerakinosi a abangaanut, tokienatar ngimoe kech kesi.

²⁶Sodi towo ngesi alokidor a adakar kirema tama, “Itwaan daang ni ibakit alowae a Ekapolon Akuj, bu nege!” Apot ngitunga a ekitela a Lawi daang tochunun kiriama ngesi.

²⁷Tolimok ngesi kesi tama, “Edungunit Ekapolon Akuj, na erai Akuj a Isirael atamar toting ipei kus daang ekileng, sodi kitor kiding adakar napei alokidor kalo tanang loche, taar ngikaitotoi keng, ka ngipaalon, ta ngikidunyet keng.”

²⁸Kiwapakis ngitunga a ekitela a Lawi ngakiro nguna, sodi taara ngitunga ngabunge ngauni akolongit ngina.

²⁹Tolimok Musa ngitunga a ekitela a Lawi tama, “Italeunosi esi[28] akolongit naga tarata ngimurok lu isubete etich a Ekapolon Akuj ani iareta talokookus ka ngikaitotoi kus. Kotere ngakiro nguna kipia esi Ekapolon Akuj.”

³⁰Ani iwalari tolimok Musa ngitunga tama, “Isuba esi akisech naaronon noi. Nakaneni adoki tokona ayong nabo emoru atobongo nia Ekapolon Akuj atoro kapedori aanyun arimakino a akisech kus.”

³¹Tobongo Musa nia Ekapolon Akuj tolimok tama, “Asuba ngitunga lugu akisech naaronon noi. Asubakinete kesi akuj alogolit sodi kilipa.

³² Torimak kare akisech kech. Ani pekirimak iyong akisech kech, kikisa ekiro kang anakitab ana igirit iyong ngirora a ngitunga kon.”

³³Tatachak Ekapolon Akuj tama, “Ngulu kasechakis ayong kesi ekisari ayong ngirora kech anakitab kang.

³⁴Kape tokona. Toriko ngitunga nikolong kalimokini ayong iyong. Toyen atamar kiriki iyong emalaikat kang, nakaneni enangi akolongit na eriraa ayong ngitunga lugu kotere akisech kech.”

³⁵Sodi yau Ekapolon Akuj edeke lotunga ani etusubeta kesi Aron itoak alogolit.