Read turkana Apudunet 33 Bible Online

Apudunet 33 - turkana bible

Apudunet 33

¹Tolimok Ekapolon Akuj Musa tama, “Tonyoutu kane, iyong ka ngitunga lu irikuni iyong alo Misiri. Toloto nakwap nakolong echikakini ayong ainakin Aburaam, ka Isaka, ka Yakobo, ta ngalesea kech.

²Ameuni ayong emalaikat kitorik iyong, sodi etwarak ayong Ngikanaan, ka Ngiamor, ka Ngiiti, ka Ngiperes, ka Ngiipi, ta Ngiebus.

³ Iloose esi nakwap na ileleba ngakile ka akimiet a ao. Nakaneni nyikirukori ayong ka esi kainyo iraakasi esi ngitunga lukechanak noi. Ani kiruko ayong ka esi, kamunyakini ayong esi lorot.”

⁴Ani iirarete ngitunga ngakiro nguna, tolomakis akigoro nakaneni nyenapa nabo asir a ngasua.

⁵Adungokinit sek Ekapolon Akuj Musa atamar tolimok kesi tama, “Iraakasi esi ngitunga lu ichanaka noi. Ani kiruko ayong ka esi, tani wadiochichi, kamunyari ayong esi. Talachutu tokona asir kus sodi atotiaku ayong ngakiro nakasubakinea esi.”

⁶Ani erotokinete ngitunga alomoru a Sinai, nyenapa nabo kesi asir a ngasua jik.

⁷Abu toliwor na elometa Ngisirael ni elomete, tolem Musa eam lo italeunitoe, kiwaak ni echadakina anadakar. Apon tanyarae eam a Akuj. Ani itwaan daang ni ayei akiroit asaki ani a Ekapolon Akuj, tolot loeam.

⁸Ani nacha elosio Musa inaa, towaa ngitunga anakituk a ngieman kech kiteosi Musa tanang elomari loeam ngolo.

⁹Ani elomari Musa tooma, totiyaun apir a edou min nakituk a eam, sodi kisuruor Ekapolon Akuj Musa.

¹⁰Napei ingolikineta ngitunga apir a edou anakituk a eam, toriediko.

¹¹Eruoronosi Ekapolon Akuj ka Musa ekobanakinosi ngakiro, loger lo iruorotor itwaan ka lopae keng. Ani erumor tobongo Musa nadakar. Nakaneni esorokit lo engarakinit ngesi lo anyaritae Yochua lokookeng a Nun, eboyeene aloeam.

¹²Tolimok Musa Ekapolon Akuj tama, “Kilimok iyong ayong dir atamar toriko ngitunga lugu nakwap ngina, nakaneni nyelimokina iyong ayong atamar ngae imeari iyong erukosi ka ayong. Ibala iyong kiyeni ayong lokojokon nabo kijoikinito ngakiro kang.

¹³Ani tokona kijoikinito ngakiro kang, tolimokinae ngakiro na isaki iyong akisub, sodi atosub ayong etich kon, atorubak ketalakarit iyong. Toyen nabo dang atamar iseu iyong ebukut logo toliwor ekon a alope.”

¹⁴Tolim Ekapolon Akuj tama, “Kirukori ayong ka iyong, sodi kesianga ayong iyong.”

¹⁵Tatachak Musa tama, “Ani pekiruko sua ka iyong, nyikitorotok sua kane.

¹⁶Ikokinio eyenio atamar ilakara iyong kotere ngitunga kon, ka ayong dang ai, erai pekiruko sua ka iyong? Erukitene kon ka sua ngesi kitiakit sua ka ngitunga luche daang anakwap.”

¹⁷Tolimok Ekapolon Akuj Musa tama, “Kotere nikayenea ayong iyong lokojokon, nabo kitalakarit iyong ayong, asubakini ayong ngakiro nguna loger lo ilimunio iyong.”

¹⁸ Kimaima Musa ngesi tolimok tama, “Kimiekinae kare ayong ataanyunga akwangis kon naakwaan kea.”

¹⁹Tatachak Ekapolon Akuj ngesi tama, “Esitoruni ayong apolou kang daang ngaren kon, sodi atanyara ayong ekiro kang ipupi iyong. Ayong arai Ekapolon Akuj, nakaneni edodiuni ayong ajokis kang ka ngisien ani eyakasi ngulu aseu ayong.

²⁰Nyeketaanyungari ayong iyong ereet kang, kainyo emam itwaan kaanyungari ayong kidong eyari.

²¹Nakaneni diyete kang nege eyei ataaba na ipedorea iyong akiwo.

²²Ani itoruni akwangis kang naakwaan kea neni, ewaakini ayong epuke nataaba, sodi katarap iyong a akan kang, etor mono ayong neni torumor.

²³Ani erumor atolema ayong akan kang, sodi taanyunga iyong akau kang, nakaneni nyianyungari ereet kang.”