Read turkana Apudunet 35 Bible Online

Apudunet 35 - turkana bible

Apudunet 35

¹Tochunak Musa Ngisirael daang wapei tolimok tama, “Ngakiro nugu kesi kidungok esi Ekapolon Akuj atamar tosuba.

²Isubete esi etich a ngirwa a ngikan-kapei, nakaneni eliwor akolongit na ngakan-kaarei nakiangaret, na italeunitoe kotere ayong, Ekapolon Akuj. Itwaan daang ni esubi etich akwaar ngina, eario.

³ Nyiinokakis tani akim anawiyei kus akolongit na Sabato.”

⁴Tolimok Musa Ngisirael daang tama, “Ngakiro nugu kesi adungu Ekapolon Akuj.

⁵Yautu ngadekon nia Ekapolon Akuj. Itwaan daang ni esaki, echamit eyauni ngadekon a egolit, ka akwangat, ta ngasua nanyangayek,

⁶ngiworui lukaanikak ajokak, ta ngajul a ngamesekin napusiek, ka napusiek-arengak, ta naarengak, ta ngiworui lu edonyunitoe anajul a ngaanei.

⁷Ngileui a ngimesekin lu emuritae torengeta, ngileui lukaanikak ajokak, ta ngakito a ngiwo.

⁸Akimiet a ngataae, ekitoe lokaakunyon lo imorikinio ka akimiet na etal, ta emitina.

⁹Ngamoru naarengak, ka asir a ngasua na iwaanakinio nakaluwat[32] na erai aka emuron aloapolon, nabo iwaakinio tani loboli lo enapit ngesi alorarum.

¹⁰“Ngitunga daang lukunonoi anikus, ejoikinit epote tosuba ibore daang loger lo edungunitor Ekapolon Akuj.

¹¹Tosubakisi eam ka ibore ni imukere ewae loa anikalapatan, ka ngikodo, ta ngakito na igurorere, ta ngakito na iriwokinio, ka ngapirio, ta ngiwaitin lua ngalup.

¹²Tosubakisi asaduku a Achamunet, ka ngapirio keng, ka apukenit keng, ka awaru na erapere.

¹³Tosubakisi emeesa ka ngakejen keng, ka ngiboro keng daang, ta ngamugati na ipeyoore Akuj.

¹⁴Tosubakisi tani ni esipokinio ibore ni inwakuni neni, ka ngiboro keng daang. Tosubakisi ngataae ka ngamieta kech.

¹⁵Tosubakisi ekeno lo inomere emitina, ka ngakito keng, ka akimiet na etal, ka emitina, ta awaru na akituk a eam.

¹⁶Tosubakisi ekeno a ngakipeyos ekodakina ka ngasua keng nanyangayek na iriwokina, ka ngapirio keng, ka ngiboro keng daang, ta ateger ka ewae loa ngalup.

¹⁷Tosubakisi ngawarui a alaar, ngapirio keng ka ngiwaitin lua ngalup. Tosubakisi awaru na ekidor a alaar.

¹⁸Tosubakisi ngiriko ka ngaunoi a eam ka na alaar,

¹⁹ta ngiworui luajokak enapete ngimurok a Akuj na esubeta etich alowae alo italeunitoe. Ngiworui lua etal lu eraakasi ngika Aron alo erai emuron a Akuj, ka talokookeng.”

²⁰Torotokis Ngisirael daang ani ayei Musa,

²¹ani itwaan daang ni asakit, abu yau ngadekon nia Ekapolon Akuj, todukere eam a Akuj. Yaut kesi ibore daang ni asakitae kotere akipeyore Akuj ka adonyio ngiworui a ngimurok.

²²Ngitunga daang lu asakito, napei alokiliok tanang naberu, yaut ngimutuin lua asir, ka ngamaritoi, ka ngikabaabae, ta asir a egolit daang, sodi kitaleut toliworos ngika Ekapolon Akuj.

²³Itwaan daang ni atingit ngiworui lukaanikak ajokak, ka ngajul a ngamesekin napusiek, ka napusiek-arengak, ta naarengak. Ngiworui lu edonyunitoe anajul a ngaanei. Ngileui a ngimesekin lu emuritae torengeta, ta ngileui luajokak, apot kesi yaut.

²⁴Ngitunga daang lu atingito ngasua nakwangae kori nanyangayek, apot yaut nia Ekapolon Akuj eraakasi ngadekon. Ani ngulu atingito ngakito a ngiwo na adikino esubere etich, apot yaut.

²⁵Apot ngaberu nakunonoi daang yaut ngiunoi lukaanikak ajokak, ta ngiunoi a ngajul a ngamesekin lupusiek, ka lupusiek-arengak, ta luarengak lu aoyiunito kesi.

²⁶Apot tani tooyiut ngiunoi ludonyet anajul a ngaanei.

²⁷Yaut ngikapolok a ngitunga ngamoru naarengak ka asir nache a ngasua ana iwaanakinio nakaluwat na emuron a Akuj, ta eboli lo enapit emuron alorarum.

²⁸Yaut tani ekitoe lokaakunyon, ka akimiet a ngataae, ka akimiet a etal, ta emitina.

²⁹Ngisirael daang lu asakete, apot yaut ngadekon kech nia Musa kotere etich lo adungokini Ekapolon Akuj Musa atamar tosub.

³⁰Tolimok Musa Ngisirael tama, “Aseu Ekapolon Akuj Besalel lokookeng a Uri, lo erai etatait a Uri, alo erai eka ekitela a Yuda.

³¹Elelebik Akuj ngesi agogongu keng, etaanyu achwaanu ka aosou, ta ekunonoonu lo eyenea akisub ngiboro daang,

³²ka arere ngiboro daang niajokon tosub a egolit, ka akwangat, ta asuat nanyang.

³³Tokul ngamoru na esubere ngiboro, kichie ngakito, ka akisub ibore niche ni esaki ekunonoonu daang.

³⁴Ainaki Ekapolon Akuj ngesi ka Oliab lokookeng a Aisamak, lo erai eka ekitela a Dan aosou na itatameta ngitunga luche ekunonoonu.

³⁵Ainaki ngesi kesi aosou na esubeta etich daang lo esubete ngikunonoi lukakulak ngamoru, ka ngikegerok a adukuoru, ta ngikunonoi a akidony ngiworui lukaanikak ajokak, ka ngajul a ngamesekin napusiek, ka napusiek-arengak, ta naarengak, ka ngiworui luche. Eyenete kesi akisub etich daang nabo eraakasi ngikegerok a adukuoru.