Read turkana Apudunet 36 Bible Online

Apudunet 36 - turkana bible

Apudunet 36

¹“Besalel ka Oliab, ta ngikadukok luche daang lu ainaki Ekapolon Akuj achwaanu ka aosou na eyeneta akisub ibore daang ni edukere eam a Akuj, ejoikinit esubete ibore daang loger lo edungunitor Ekapolon Akuj.”

²Tanyarau Musa Besalel, ka Oliab, ta ngikadukok luche daang lu ainakini Ekapolon Akuj achwaanu nabo tasakete akingarakin luche akiduk. Abu Musa tolimok kesi atamar kisiakis akiduk.

³Nak Musa kesi ngadekon daang na ayaunete Ngisirael eraakasi ngaduket eam a Akuj. Nakaneni torubakis Ngisirael eyaununete ngadekon nia Musa ataparach daang.

⁴Sodi toloto ngikunonoi lu asubete etich nia Musa

⁵tolimokis ngesi tamasi, “Alalaketa ngadekon noi na ayaut ngitunga kotere etich lokolong adunguni Ekapolon Akuj atamar tosubae.”

⁶Sodi todung Musa atamar tolimokinae ngitunga daang a adakar atamar tojongoto ayaunun ngadekon. Apot ngitunga tojongoto ayaunun ngadekon.

⁷Alalak noi ngiboro lusek ayaunete kesi adikino erumorete etich kidongo epewae.

⁸Itwaan daang ni arai ekunonoit noi ani eyakasi ngulu asubete etich, abu toduk eam a Akuj. Todukut kesi eam ngolo a ngawarui a ngatomon anakaanikak ajokak edonyunitoe anajul a ngamesekin anapusiek, ka napusiek-arengak, ta naarengak, sodi todonyokinoe asir totokokinoe ngiborei lua ngabeben.

⁹Ariyan ngawarui daang, arai aoyau ngamitae ngatomon ka ngaarei, tarai aurianut ngamitae ngaarei.

¹⁰Todonyokis kesi ngakan wapei toliworos atiaket apei, todonyokis nabo nache kan wapei loger lopei ngolo.

¹¹Tosubakis ngatoron a awaru anapus lokwaas loa anikalapatan a awaru ana a atiaket a apei.

¹²Kiwaakis kesi ngatoron ngatomwon-kan nawaru na a atiaket ana ekingaren, ta ngatoron ngatomwon-kan na ikwaan ka nguna nawaru na esal na a atiaket ana a ngaarei.

¹³Tosubakis ngikodo a egolit ngitomwon-kan lu eropakinere ngatiaket naarei toliworos apei.

¹⁴Tosubakis ngawarui ngatomon ka apei anajul a ngaanei toliworos kesi imukitere eam a Akuj.

¹⁵Tosubakis kesi ngawarui daang eriyan, erai aoyau ngamitae ngatomon ka ngauni, tarai aurianut ngamitae ngaarei.

¹⁶Todonyokis kesi ngakan wapei toliworos atiaket apei, todonyokis nache kan-kapei wapei toliworos atiaket ache.

¹⁷Kiwaakis kesi ngatoron ngatomwon-kan lokwaas a awaru ana esal a atiaket a apei, sodi kiwaakis ngatoron ngatomwon-kan lokwaas a awaru anache.

¹⁸Tosubakis kesi ngikodo ngitomwon-kan lua ngasua ananyangayek tokodakis natoron sodi toropakinere ngatiaket naarei toliworos akimuket apei.

¹⁹Tosubakis ngakimuket ngache ngaarei. Arai apei eleu a emesek lo emuritae torenger, tarai nache eleu lokaanikan ajokon. Toliworos kesi imukitere nikalapatan.

²⁰Tosubakis kesi ngakito na iteneneete na itoweito eam a Akuj. Tosubut kesi ngakito nguna anawo.

²¹Arai aoyau a akitoe a apei ana etowei eam kitenik, ngamitae ngoomwon, tarai aurianut keng ngasentimitae ngatomwon-kapei ka ngakan-kapei,

²²toyakas ngiwaitin ngiarei lu ajipito ibakito, lu araakasi kesi eropakinere ngakito a eam. Ayakasi ngajipet nguna nakito na itoweito eam.

²³Tosubakis ngakito na itoweito eam ngatomwon-arei lowae loa lokuju

²⁴ka ngakwangae ngatomwon-omwon na ewae alo a ngalup, pena kwap kech. Kwap akitoe apei pena ngakwangae ngaarei na ewae alo a ngalup, na etingete ngajipet keng naarei.

²⁵Tosubakis kesi ngakito na itoweito eam ngatomwon-arei lowae loa lokwap eam

²⁶ta ngakwangae na ewae alo a ngalup ngatomwon-omwon, epete ngaarei kwap akitoe apei.

²⁷Ani ewae loa lokamanakete eam, lo eyei lowae loa lotoo, tosubakis ngakito na itoweito eam ngakan-kapei,

²⁸ta ngakito na itoweito eam ngaarei na eyakasi lowaitin.

²⁹Ngakito na itoweito eam eyakasi lowaitin nguna, toropakinae alokwap sodi kimorikinos napei alokwap tanang kidiama. Ngakito naarei itoweito eam eyakasi lowaitin luarei, asubakinio loger ngolo.

³⁰Nakaneni pena ngakito na itoweito eam ngakan-kauni, erukito aapei ka ngasua nakwangae na ewae alo a ngalup ngatomon ka ngakan-kapei, erai ngaarei eyakasi kwap akitoe apei kech kadaang.

³¹Tosubakis kesi ngakito na iriwokina ngatomon ka ngakan na araakasi ngawo. Toliworos ngakan ngaka ngakito ana itoweito ewae epei a eam.

³²Toliworos ngakito na itoweito ewae loche a eam ngakan. Ani ngakito na itoweito ewae loa lotoo, lo erai kamanakete, toliworos ngakan.

³³Akitoe na iriwokina na eyei kiding, na awei anakidingos a ngakito ana itoweito eam, eriwokina lowae epei a eam, tanang lowae loche.

³⁴Tobutakis kesi ngakito na itoweito eam egolit sodi tokodakis nasua na iriamito na igangete ngakito na iriwokina. Tobutakinae ngakito na iriwokina nguna dang egolit.

³⁵Tosubakis kesi awaru nakaanikan ajokon esubunitae anajul a ngamesekin anapusiek, ka napusiek-arengak, ta naarengak. Todonyokinoe asir totokokinoe ngiborei lua ngabeben.

³⁶Tosubakis kesi ngapirio ngoomwon na ebutakinitae egolit, na eraakasi ngawo, kiganga awaru naajokon ngina. Tokodakinae ngikodo a egolit. Sodi tosubakis kesi ngakwangae a ewae alo a ngalup ngoomwon kiganga ngapirio.

³⁷Ani akituk a eam, kiwaakis kesi awaru nakaanikan ajokon edonyunitoe anajul a ngamesekin anapusiek, ka napusiek-arengak, ta naarengak. Todonyokinoe asir.

³⁸Tosubakis kesi awaru ngina ngapirio ngakan na araakasi ngawo, eyakasi ngikodo. Tobutakis kesi ngakito nguna egolit. Tosubakis kesi ngapirio nguna ngiwaitin lua ngalup ngikan a ngasua ananyangayek.