Read turkana Apudunet 37 Bible Online

Apudunet 37 - turkana bible

Apudunet 37

¹Tosub Besalel asaduku a Achamunet a ngakito anawo. Arai aoyau a ewae alo alokwap a asaduku ngasentimitae amiat apei ka ngatomon, tarai aurianut ngasentimitae ngatomwon-kapei ka ngakan kapei, tarai aoyau na alokidiama ngasentimitae ngatomwon-kapei ka ngakan-kapei.

²Tobutak ngesi egolit tooma ka nikalapatan, sodi kiwaak atorosit a egolit kiriam.

³Tosubak ngesi ngasua a egolit na iriemito ngoomwon, tokodak nakejen keng naomwon, pena ngasua ngaarei na iriemito lowae epei.

⁴Tosubak ngakito na etingitere a ngakito anawo, tobutak ngakito nguna egolit,

⁵sodi kirepak kesi nasua na iriemito na eyakasi lowaitin a asaduku.

⁶Tosubak ngesi apukenit na erai egolit bon. Arai aoyau keng ngasentimitae amiat apei ka ngatomon, tarai aurianut keng ngasentimitae ngatomwon-kapei ka ngakan-kapei.

⁷Tosubak ngesi ngiborei lua ngabeben[33] ngiarei lu asubunitae alogolit,

⁸min ipei lowae epei a apukenit. Tosubak ngesi kesi toliworos ngipei ka apukenit.

⁹Tokienyikinos ngiborei lua ngabeben ngulu anapukenit, kimuko ngabeben kech na apetara apukenit.

¹⁰Tosubak ngesi emeesa a ngakito anawo, arai aoyau keng ngasentimitae ngatomwon-kauni ka ngakan-kauni tarai aurianut keng ngasentimitae ngatomwon-omwon ka ngoomwon, tarai aoyau keng na alokidiama ngasentimitae kapei ka ngakan-kapei.

¹¹Abu ngesi tobutak egolit bon sodi kiwaak egolit lowaitin kiriam.

¹²Kiwaak ngesi atorosit na arai ngamilimitae ngatomwon-kaarei ka ngakan, sodi kisiriam egolit lowaitin a atorosit.

¹³Tosubak ngesi ngasua a egolit na iriemito ngoomwon, kiwaak kesi lowaitin luomwon lu ayakasi ngakejen.

¹⁴Kiwaakinae ngasua na igangito ngakito na etingere emeesa diyete atorosit.

¹⁵Tosubak ngesi ngakito na araakasi ngawo sodi tobutak egolit.

¹⁶Tosubak ngesi ngatubwae nabeleny, ka ngikopoi, ka ngichupae, ta ngatubwae nachukul toliworos elemuunere emuna lo epuritoe. Tosubunae ngiboro ngulu daang a egolit bon.

¹⁷Tosubak ngesi ni esipor ataa a egolit bon. Tosubak ngesi ewae loa ngalup ka ngaten keng a egolit alo itiekitae. Ani ngatur keng nakebuseak, ka nilemu, ta ni epukiarit, kimorikinos daang toliworos ibore ipei.

¹⁸Toruput ngaten ngakan-kapei alowaitin keng, pena ngauni lowae epei.

¹⁹Apei a ngaten anakan-kapei kanguna, ayakasi ngatur nakebuseak ngauni na ikote ngatur a ekitoe alo ikwaan ka engoomo na eyakasi nilemu ka ni epukiarit.

²⁰Ayakasi ngaten ani esipor ataa ngatur nakebuseak ngoomwon na ikote ngatur a ekitoe alo ikoni engoomo, na ayakasi nilemu ka ni epukiarit.

²¹Ayei nilemu kwap ngaten ngaarei a ngaten anakan-kapei kanguna.

²²Ngalemuyek, ka ngaten, ka ni esipor ataa, araakasi daang na itiakunitae aapei, a egolit bon.

²³Tosubak ngesi ngataae ngakan-kaarei, ka ngasua naridet ngatotol, ta ngikaparaparae kech. Asubunitae ngiboro ngulu daang a egolit bon.

²⁴Alemunit ngesi ngakiloi ngatomwon-uni ka ngakan a egolit bon tosubakinere ni esipor ataa ka ngiboro keng daang.

²⁵Tosubak ngesi ekeno lo inomanakinere Akuj emitina a ngakito anawo. Ariyan ngiwaitin daang arai lokooyen ngasentimitae ngatomwon-omwon ka ngakan, arai louriyen ngasentimitae ngatomwon-omwon ka ngakan, tarai aoyau na alokidiama ngasentimitae ngatomwon-koomwon. Emorikina ngajipet na ayakasi lowaitin luomwon araakasi ngapei.

²⁶Abutakinit ngesi egolit lowae lo alokidiama, ka lowaitin luomwon, ta ngajipet keng, ani erumor kiwaak atorosit a egolit kiriam.

²⁷Tosubak ngesi ngiriko ngiarei a egolit lu ilepilepere, sodi toinik kwap atorosit a egolit alowaitin aluarei ibakito, tokoda ngakito na ilepilepere.

²⁸Tosubak ngesi ngakito nguna anakito ana araakasi ngawo, sodi tobutak egolit.

²⁹Abu ngesi tani tosubak akimiet a etal, ka emitina lo inomio, imorikina loger a akimiet anakaakunyon.