Read turkana Apudunet 38 Bible Online

Apudunet 38 - turkana bible

Apudunet 38

¹Tosubak Besalel ekeno a ngakipeyos ana inomio a ngakito anawo. Ariyan ngiwaitin keng daang arai aoyau ngamitae 2.2, tarai aurianut ngamitae 2.2, arai nabo aoyau na alikidiama amita 1.3.

²Kiwaak ngesi ngajipet kidiama ngiwaitin luomwon, sodi kimorikinos kesi toliworos ngipei ka ekeno a ngakipeyos. Tobutak ngesi kesi daang asuat nanyang.

³Tosubak ngesi tani ngiboro daang a ekeno, lu eraakasi ngamoti, ka ngikodo, ta ngataritarea na elemere ngatotol anakim. Asubunitae ngiboro ngulu daang anasua ananyangayek.

⁴Tosubak ngesi ngasua na iriwokina anasua ananyangayek sodi kiwaak ngasua na iriwokina nguna kwap atorosit na ekeno, sodi tananga ngasua na iriwokina nguna kiding ekeno.

⁵Tosubak ngesi ngasua na iriemito ngoomwon sodi kiwaak kesi lowaitin luomwon.

⁶Tosubak ngesi ngakito natinget anawo, tobutak asuat nanyang,

⁷sodi kirepak kesi daang nasua na iriemito na eyakasi lowaitin daang a ekeno. Asubunitae ekeno anakito anadapal kaabenak, nabo araakasi na aororete.

⁸Tosubak ngesi ateger a ngasua ananyangayek, ka ewae loa ngalup lo arai ngasua nanyangayek, tosub anakiyoi ana inwakare ana araakasi ngaka ngaberu ana asubete etich anakituk a eam a Akuj.

⁹Tosubak ngesi alaar a eam a Akuj a ngawarui anakaanikak ajokak. Ani alowae alo alokuju, arai aoyau a ngawarui kanguna ngamitae ngatomwon-omwon ka ngoomwon.

¹⁰Egangito ngapirio a ngasua ananyangayek eraakasi ngatomwon-arei, na ayakasi ngiwaitin lua ngalup ngitomwon-arei lua ngasua ananyangayek, ta ngikodo ka ngasua nakapisa kech na esubunitae anakwangat.

¹¹Ekoni alaar neni tani alowae alo alokwap.

¹²Ani alowae alo alo too, ayakasi ngawarui na araakasi aoyau kech ngamitae ngatomwon-arei ka ngaarei. Ayakasi tani ngapirio ngatomon ka ngiwaitin lua ngalup ngitomon, ta ngikodo ka ngasua kech na asubunitae anakwangat.

¹³Ani ewae loa lokide lo ayei ekidor, arai aurianut a alaar ngamitae ngatomwon-arei ka ngaarei.

¹⁴Lowae epei a ekidor ayakasi ngawarui na araakasi ngamitae 6.6, toyakas ngapirio ngauni ka ngiwaitin lua ngalup nguuni.

¹⁵Ani nabo ewae loche a ekidor, ayakasi ngawarui na araakasi ngamitae 6.6, toyakas ngapirio ngauni ka ngiwaitin lua ngalup nguuni.

¹⁶Ngawarui daang na eriemito alaar, asubunitae anawarui anakaanikak ajokak.

¹⁷Ngiwaitin lua ngalup a ngapirio, asubunitae anasuat ananyang. Ani ngikodo, ka ngasua nakapisa, ta ngiwaitin lu alokidiama a ngapirio, asubunitae anakwangat. Ngasua daang na eriemito alaar, aropakinitae anasua anakwangae.

¹⁸Awaru na ayei lokidor a alaar, asubunitae a awaru anakaanikan ajokon a ngajul a ngamesekin anapusiek, ka napusiek-arengak, ta naarengak. Todonyokinoe asir. Arai aoyau na alokwap ngamitae ngakan-koomwon, tarai aoyau na alokidiama ngamitae ngaarei, ekwaan ka ngawarui na alaar.

¹⁹Egangito ngapirio ngoomwon ekidor alowaitin aluomwon a ngalup. Asubunitae ngapirio nguna anasua ananyangayek. Asubunitae ngikodo kech ka ngiwaitin lua alokidiama anakwangae.

²⁰Ngakito daang na itoweito eam ka alaar, asubunitae anasua ananyangayek.

²¹Erai logo ekimar a ngiboro kadaang alu asubere etich aloeam a Akuj, ani ewaakinitae ngamoru naarei nadapal na egiritae ngitalio lutomon. Musa kolong adunguni ngakiro a ekimar kangolo, sodi apot ngitunga a ekitela a Lawi kimara ngiboro ngulu. Asubete ngitunga a ekitela a Lawi etich eweikinit Isamar lo arai lokookeng a Aron alo arai emuron a Akuj.

²²Abu Besalel lo arai lokookeng a Uri, tarai etatait a Uri, tosubak ngakiro daang loger lo adungunitor Ekapolon Akuj. Arai Besalel eka ekitela a Yuda.

²³ Ani erukitos keng lo anyaritae Oliab lokookeng a Aisamak, arai ekunonoit a adukuoru, ka ekegeron a adukuoru, ka ekunonoit a akidony ngiworui lukaanikak ajokak eraakasi ngipusiek, ka lupusiek-arengak, ta luarengak. Arai ngesi eka ekitela a Dan.

²⁴Egolit daang lo alemikinitae Ekapolon Akuj toliwor eka eam keng, arai ngakiloi abunget apei, itemitoe a eger alosek itemeenere.

²⁵Etiae a ngasua anakwangae ana ayaunete ngitunga lu emarunio arai ngakiloi 3,430, itemitoe a eger alosek itemeenere.

²⁶Ekimar ngolo alemunete ngitunga daang lu emarunio, tolem itwaan daang ngasua na asakitae, itemitoe a eger alosek itemeenere. Araakasi ngitunga daang lu emarunitae 603,550. Araakasi kesi ngitunga a ngikaru a ngitomwon-arei, ta lu eporito ngikaru kech ngitomwon-arei.

²⁷Ani anasua anakwangae, tolemunae ngakiloi 3,400, tosubakinere ngiwaitin lua ngalup amiat apei lu araakasi ngika eam a Akuj, tosubakinere tani awaru. Arai ngakiloi ngatomwon-uni ka ngoomwon asubakinere ewae loa ngalup epei.

²⁸Ani ngakiloi ngatomwon-uni a ngasua anakwangae, anache edongete, tosubakinea Besalel ngasua nakapisa, ka ngikodo lua ngapirio, ta ngiwaitin lua alokidiama a ngapirio.

²⁹Etiae a ngasua ananyangayek alemikinio Ekapolon Akuj, arai ngakiloi 2,425.

³⁰Kotere ngasua nanyangayek nguna, tosubak ngesi ewae loa ngalup a akituk a eam a Akuj. Tosubak tani ngasua nanyangayek a ekeno a ngakipeyos ka ngasua keng nanyangayek na iriwokina, ta ngiboro a ekeno daang.

³¹Tosubak tani ngiwaitin lua ngalup a alaar, ka ekidor a alaar, ta ngakito na itoweito eam, ta na itoweito alaar.