Read turkana Apudunet 39 Bible Online

Apudunet 39 - turkana bible

Apudunet 39

¹Apot kesi todonyokis ngiworui luajokak anapeenete ngimurok a Akuj na esubeta etich alowae alo italeunitoe. Adonyunitoe ngiworui ngulu a ngiunoi alupusiek, ka lupusiek-arengak, ta luarengak. Todonyokis kesi Aron ngiworui lu eraakar emuron a Akuj, loger lo adungokinitor Ekapolon Akuj Musa.

²Tosubut kesi akaluwat a emuron anawaru anakaanikan ajokon a ngajul a ngamesekin ana eraakasi ngapusiek, ta napusiek-arengak, ta naarengak, ta ngiunoi a egolit.

³Kitiekunae egolit lodapal ani erumor kididiunae ngiunoi tosubunere awaru nakaanikan ajokon napus, ka napus-arengan, ta naarengan.

⁴Tosubakis kesi ngaunoi ngaarei na eananakinere akaluwat a emuron losegeta sodi toropakis lowaitin keng, minio kona eenikinere.

⁵Ani aruba na edonyunitoe niajokon na asubunitae aloboro alupei kangulu, aropakinitae nakaluwat kimorikinos toliworos awaru apei, loger lo adungokinitor Ekapolon Akuj Musa.

⁶Tosubakis kesi ngamoru naarengak kirepakis logerin a egolit. Namoru nguna, apon kigerokinoe niajokon ngirora a talokookeng a Yakobo lutomon ka ngiarei.

⁷Kiwaakis kesi ngamoru nguna kidiama ngaunoi na eananakinere akaluwat a emuron a Akuj losegeta, toliworos kesi eweikinito ngitela lutomon ka ngiarei a Ngisirael, loger lo adungokinitor Ekapolon Akuj Musa.

⁸Todonyut kesi eboli lo enapio alorarum aloboro alupei asubuneta akaluwat a emuron a Akuj. Todonyokis tani asir na ekwaan ka na akaluwat.

⁹Ariyan ngiwaitin daang tobilakinitetei ngaarei. Arai aoyau keng ngasentimitae ngatomwon-arei ka ngaarei, tarau aurianut ngasentimitae ngatomwon-arei ka ngaarei.

¹⁰Tatapakis kesi ngangedakinet ngoomwon a ngamoru anakaalak a ngaropiyae kidiama keng. Angedakinet na ekingaren, tatapakis ngamoru nakaalak a ngaropiyae na eraakasi naarengak puu, ka na enyaritae topas, ta napus-aliban toreng.

¹¹Ani angedakinet na ngaarei, tatapakis ngamoru napus-aliban, ka napus-arengan, ta na enyaritae alumas.

¹²Ani angedakinet na ngauni, tatapakis ngamoru na na enyaritae yasinito, ka nakaagongon noi, ta na enyaritae amesisto.

¹³Ani angedakinet na ngoomwon, tatapakis ngamoru na na enyaritae berili, ka naarengan, ta auk ana enyaritae alumas. Atapakinitae ngamoru na elalak ngaropiyae nguna daang logerin a egolit.

¹⁴Ngamoru natomon ka ngaarei nguna daang, egerokinitoe ekiro epei namoru apei, a ngirora alutomon ka ngiarei a talokookeng a Yakobo. Ekokinio neni sodi toweikis kesi ngitela lutomon ka ngiarei a Ngisirael.

¹⁵Tolugurikis ngiriko a egolit bon loger a loikit, loboli lo enapitae alorarum.

¹⁶Tosubakis ngigerin a egolit ngiarei ka ngiriko a egolit ngiarei sodi toropakis ngiriko luarei ngulu lochileta lu alokidiama a eboli alo enapitae alorarum.

¹⁷Toinikis kesi taloikit luarei loriko luarei.

¹⁸Sodi toinikis ngiwaitin luche arei a taloikit logerin luarei. Kotere erot ngolo toropakis kesi alowae alo alongaren naunoi na eananakinere akaluwat a emuron a Akuj losegeta.

¹⁹Tosubakis kesi ngiriko ngiarei a egolit sodi toropakis lowaitin lua lokwap a eboli alo enapitae alorarum. Arai ni aropakinio neni ekeli lo alotooma akaluwat a emuron.

²⁰Tosubakis kesi nabo ngiriko ngiarei a egolit sodi toropakis lowae loa ngalup a ngaunoi anaarei eananakinere akaluwat a emuron losegeta. Aropakinitae ngiriko ngulu diyete etoro a awaru, tarai kidiama aruba na edonyitoe niajokon.

²¹Ani ngiriko a eboli alo enapitae alorarum, toinikis kesi loriko a akaluwat a auno anapus, sodi min eboli kidiama aruba, nakaneni abu nyiilajalajakin. Tosuba kesi kongina loger lo adungokinitor Ekapolon Akuj Musa.

²²Tosubunae eworu lo iporit akaluwat a emuron a awaru anapus ana esubunitae anajul a ngamesekin bon.

²³Apon totokoi apedot na irepanakinio akou kiratakinere nyeechil.

²⁴Apot kesi kitokoriana kwap keng a ngalukan ana ikwaan ka ngalam napusiek, ka napusiek-arengak, ta naarengak, aapei ka eworu lokaanikan ajokon.

²⁵Tongichanakis ngichoroi lu esubunitae a egolit nakidingos kech.

²⁶Loworui lu esubere etich, kiwaakinae ngalukan na ikwaan ka ngalam loger lo adungokinitor Ekapolon Akuj Musa.

²⁷Todonyokis kesi Aron ka talokookeng ngichetea.

²⁸Todonyokis ngesi tani achaat, ka ngapukoto, ka ngisurualei lukaanikak,

²⁹ka aruba nakaanikan ajokon edonyokinitoe asir a ngiunoi alupusiek, ka lupusiek-arengak, ta luarengak. Asubete kesi kongina loger lo adungokinitor Ekapolon Akuj Musa.

³⁰Apot kesi tosubakis akaparaparat a egolit toliwor emachar lo italeunitoe lo idodiuni atamar erai ngesi eka Ekapolon Akuj. Kigirakis ngakiro nugu kidiama keng, “Italeunitoe toliwor ika Ekapolon Akuj.”

³¹Toinikis kesi akaparaparat ngina kidiama achaat a awaru anapus, loger lo adungokinitor Ekapolon Akuj Musa.

³²Apon torumoroe etich daang a eam a Akuj. Tosubakis Ngisirael ibore daang loger lo adungokinitor Ekapolon Akuj Musa.

³³Apot kesi inut Musa eam ka ngiboro a eam lu ikote ka ngikodo ka ngakito na igurorere eam, ka ngakito na iriwokinio, ka ngapirio, ta ngiwaitin lua ngalup.

³⁴Yaut ngileui a ngimesekin lukimuket lu amuritae torengeta, ka ngileui lukaanokak lukimuket, ta awaru natiaket eam.

³⁵Yaut asaduku a Achamunet aapei ka ngiboro keng lu eraakasi ngamoru nadapal, ka ngapirio, ta apukenit.

³⁶Yaut emeesa erukito ka ngiboro keng daang, ta ngamugati na ipeyonokinio Akuj.

³⁷Yaut ni esipor ataa na erai aka egolit bon, ka ngataae keng, ka ngiboro keng daang, ta akimiet a ngataae.

³⁸Yaut ekeno a ngakipeyos lo erai eka egolit. Yaut akimiet na etal, ka emitina, ta awaru na akituk a eam.

³⁹Yaut ekeno a ngakipeyos lo esubunitae anasuat ananyang, ka ngasua na iriwokina na esubunitae anasuat ananyang, ka ngapirio, ta ngiboro keng daang. Yaut ateger ka ewae loa ngalup.

⁴⁰Yaut ngawarui na alaar, ka ngapirio, ta ngiwaitin lua ngalup. Yaut awaru na ekidor a alaar ka ngaunoi keng. Yaut ngakito na itoweito eam. Yaut ngiboro daang lu esubere etich aloeam.

⁴¹Yaut ngiworui lu enapete ngimurok a Akuj alowae alo italeunitoe. Ngiworui lu italeunitoe a Aron alo erai emuron a Akuj, ka talokookeng.

⁴²Asubito Ngisirael etich daang loger lo adungokinitor Ekapolon Akuj Musa.

⁴³Kiseme Musa ibore daang sodi kingolik atamar esubito kesi loger lo adungunitor Ekapolon Akuj. Abu Musa topia kesi.