Read turkana Apudunet 4 Bible Online

Apudunet 4 - turkana bible

Apudunet 4

¹Sodi tatachak Musa Ekapolon Akuj tama, “Ani ejok bo nyeenupa Ngisirael ngakiro kang sodi towout akiirar ngakiro na alimokini ayong. Ekokini ayong ai erai ketamasi kesi nyebuno iyong nikang?”

²Sodi kingit Ekapolon Akuj ngesi tama, “Nyoni ngini itingit iyong?” Tatachak Musa tama, “Aburo.”

³Tolim Ekapolon Akuj tama, “Tachakak kwap.” Ani echakakini Musa aburo kwap, kiloch toliwor emun, sodi kipungar Musa kaneni.

⁴Abu Ekapolon Akuj tolimok Musa tama, “Tokudokin sodi kirum ekosim.” Abu Musa tokudokin kirum ekosim a emun toliwor emun aburo nabo.

⁵Tolim Ekapolon Akuj tama, “Tosub nugu kidodikinea Ngisirael atamar Ekapolon Akuj na erai Akuj kata apaakech, Akuj a Aburaam, ka Isaka, ta Yakobo, ngesi abuni nikon.”

⁶Tolimok nabo Ekapolon Akuj Musa tama, “Kirepak akan tooma loworu kon.” Kirepak Musa akan tooma loworu, ani eutuni, torukau keting enomokere, ekwang kea.

⁷Sodi tolim Ekapolon Akuj tama, “Kirepak akan kon tooma loworu kon nabo.” Kirepak ngesi akan keng loworu, ani eutuni, torukau ejok ikoni akwaan niche.

⁸Tolim Ekapolon Akuj tama, “Ani pekenupa kesi ngakiro kon, kori ani pekenupa kotere akitoodikinet nakailiilon na ekingaren, enupete kotere naga.

⁹Ani pekenupa kesi ngakiro kon kotere ngakitoodikinet naarei nugu, nabo towout akiirar ngakiro na ilimokini iyong, tooku ngakipi anangolol a Nili sodi tobukok nalup. Ilochosi ngakipi toliworos ngaakot.”

¹⁰Nakaneni tolim Musa tama, “Wae, Ekapolon, nyikimea ayong. Nyeruorono ayong, nabo eringa ayong nyeyenuna ekiruor napei kolong isiakinea iyong akisuruor ayong. Kakuruworit ayong ekiruor nabo eyagayaga eruoro.”

¹¹Kingit Ekapolon Akuj ngesi tama, “Ngae asubi akituk a itwaan? Ngae itikinimani ngesi kori peisuruorikini? Ngae isitee ngesi akwap kori itumudukani? Ikwa meere ayong Ekapolon Akuj a?

¹²Kape tokona! Kengarakini ayong iyong kiruorik, nabo kalimokini ayong iyong ngakiro na ilimuni.”

¹³Nakaneni tatachu Musa tama, “Emam kare Ekapolon, tomea kare itwaan iche.”

¹⁴Kotere ngakiro nguna, tongoik Ekapolon Akuj Musa tolim tama, “Ani bo lokaatokon Aron loa ekitela a Lawi? Ayeni ayong atamar iruorono ngesi. Tani tokona dang ebunit ngesi akisiriam iyong nabo elakar kianyungari iyong.

¹⁵Kisuruor iyong ngesi sodi tolimok ngakiro na elimuni. Kengarakini ayong esi luarei daang kiruorikineta, sodi katolimok esi luarei daang nguna isubete.

¹⁶Eliwor ngesi iruoro ngakiro kon kisuruor ngitunga. Sodi kikok iyong Akuj, tolimonok ngesi ngakiro na elimuni.

¹⁷Toting aburo naga, kainyo aburo naga ngesi isubea iyong ngakitoodikinet nakailiilok.”

¹⁸Sodi tobongo Musa nia lokamuran keng alo anyaritae Yesiro tolimok tama, “Kimiekinae kare ayong atobongo Misiri ataanyu ngiyenet kang keringa eyarete.” Tacham Yesiro tolimok ngesi atamar tolot niajokon.

¹⁹Ani eringa Musa eyei nakwap a Midian, tolimok Ekapolon Akuj ngesi tama, “Tobongo Misiri kainyo atoaka daang lu kolong asakete akiar iyong.”

²⁰Sodi kitonyou Musa aberu keng ka talokookeng kidokok kidiama esikiria, kirukosi ka ngesi Misiri. Atingit ngesi aburo na alimokini ngesi Akuj atamar toting.

²¹Sodi tolimok Ekapolon Akuj Musa tama, “Ani ibongi Misiri, tosub alongaren ekapolon a Misiri ngakitoodikinet nakailiilok daang nguna kainak ayong iyong agogongu atamar tosub. Nakaneni etiliwori ayong ekapolon lo ichanana noi, sodi nyiimiek ngesi ngitunga toloto.

²²Ejoikinit ilimokini iyong ngesi atamar, ebala Ekapolon Akuj kona, ‘Erai Isirael lokookang lo ekingaren.

²³ Kalimokini ayong iyong atamar kimiek lokookang tolot akipeyokin ayong nakaneni towou iyong. Aari tokona ayong lokookon lo ekingaren.’ ”

²⁴Ani enangi ni aperi ngesi alorot elosi Misiri, kiriamun Ekapolon Akuj ka Musa tasak akiar.

²⁵Sodi tolem aberu keng Sipora amoru nakakwanan kilengerea lokookeng, sodi tolem amuny ngina tatapea ngakejen[6] a Musa ebala, “Irai iyong ekile loa ngaakot anikang!”

²⁶Sodi kimiek Ekapolon Akuj Musa. Sodi tamarae abala Sipora, “Irai iyong ekile loa ngaakot anikang”, kotere akilengero.

²⁷Tolimok Ekapolon Akuj Aron tama, “Kape nariet kiriama ka Musa.” Sodi tolot Aron kiriama ka Musa alomoru a Akuj. Ani na eriameta ngesi ka Musa, tonuak.

²⁸Abu Musa tolimok Aron ngakiro daang na alimuni Ekapolon Akuj na abalar ngesi tobongo Misiri. Tolimok ngesi tani ngakiro a ngakitoodikinet anakailiilok ana adungokini ngesi Ekapolon Akuj atamar tosub.

²⁹Sodi toloto Musa ka Aron Misiri tochunakis ngikarikok a Ngisirael daang wapei.

³⁰Tolimok Aron kesi ngakiro daang na alimokini Ekapolon Akuj Musa. Sodi tosub Musa ngakitoodikinet nakailiilok daang alongaren ngitunga.

³¹Tonupa ngitunga, ani iirarete atamar abu Ekapolon Akuj nikech engolik eger lo eboliare kesi niaronon, kijuuruoto kesi sodi kilipa.