Read turkana Apudunet 40 Bible Online

Apudunet 40 - turkana bible

Apudunet 40

¹Tolimok Ekapolon Akuj Musa tama,

²“Akolongit na ekingaren a elap alo ekingaren, kiguro eam kang.

³Kiwaak tooma keng asaduku a Achamunet na eyakasi ngitalio lutomon tooma, ani erumor kiwaak awaru na iriwokina ngaren keng.

⁴Yau emeesa tooma sodi kiwaak ngiboro kidiama keng. Yau tani ibore ni esipotor ngataae sodi kiwaak ngataae kidiama.

⁵Kiwaak ekeno loa egolit lo inomere emitina ngaren asaduku a Achamunet sodi kinenek awaru na akituk a eam.

⁶Kiwaak ekeno a ngakipeyos ngaren eam.

⁷Kiwaak ateger nakidingos a eam ka ekeno a ngakipeyos, sodi kilelebik ngakipi.

⁸Kiwaak alaar na iriami sodi kinenek awaru na ekidor keng.

⁹“Sodi kitaleu eam ka ngiboro keng daang toliworos ngikang kiwasak akimiet na etal, toliworos lu italeunitoe.

¹⁰Ani erumor kitaleu ekeno a ngakipeyos ka ngiboro keng daang, kiwasak akimiet na etal, toliworos lu italeunitoe.

¹¹Kitaleutu ateger dang ka ewae keng loa ngalup loger lopei ngolo.

¹²“Toriku Aron ka talokookeng nakituk a eam, sodi tolimok kesi atamar kilotaros tosegeta.

¹³Kitanap Aron ngiworui lu eraakar emuron a Akuj, kiwasak akimiet na etal sodi kitaleunor toliwor ekang, tosubea etich kang erai emuron.

¹⁴Toriku talokookeng sodi kitanap ngichetea.

¹⁵Ani erumor kiwasak kesi akimiet na etal, loger lokolong iwasakinea iyong apakech akimiet, sodi tosubeta kesi etich kang eraakasi ngimurok. Iwasakinio kesi akimiet na etal toliworotor ngimurok jiik.”

¹⁶Tosubak Musa ibore daang loger lo adungokinitor Ekapolon Akuj.

¹⁷Ani akolongit na ekingaren a elap alo ekingaren a ekaru alo a ngiarei arotokinioto Ngisirael alo Misiri, apon kiguroroe eam a Akuj.

¹⁸Abu Musa kiguro ngiwaitin lua ngalup, kitowo ngakito na igangito eam, toropak ngakito na iriwokina, ani erumor kitowo ngapirio.

¹⁹Topetak ngesi ibore nikimuket kidiama eam, ani erumor kiwaak ibore iche nikimuket kidiama, loger lo adungunitor Ekapolon Akuj.

²⁰Sodi tolem ngamoru nadapal naarei kiwaak nasaduku a Achamunet. Kiwaak ngesi ngakito tooma nasua na iriemito na arai ngaka asaduku, sodi kiwaak apukenit alokidiama.

²¹Ani erumor kiwaak ngesi asaduku loeam, sodi kinenek awaru na erapit. Kotere erot ngolo abu ngesi tarap asaduku a Achamunet, loger losek adungokinitor Ekapolon Akuj.

²²Kiwaak ngesi emeesa tooma loeam, lowae lo ingoliarit kwap kamanakete awaru.

²³Tolem ngamugati na ipeyokinitoe Ekapolon Akuj kiwaak kidiama emeesa, loger lo adungokinitor Ekapolon Akuj.

²⁴Kiwaak ngesi ibore ni esipor ataa tooma loeam, lowae loa alokuju, ekienyikina ka emeesa.

²⁵Kinokak ngataae alongaren Ekapolon Akuj loger lo adungokinitere.

²⁶Kiwaak ngesi ekeno a ngakipeyos lo erai eka egolit, kiwaak loeam, ngaren awaru.

²⁷Ani erumor kinom emitina loger losek adungokinitor Ekapolon Akuj.

²⁸Kinenek ngesi awaru na akituk a eam.

²⁹Kiwaak ekeno a ngakipeyos ngaren awaru. Tolem ngesi akipeyos ka ngalemet topee loger lo adungokinitor Ekapolon Akuj.

³⁰Kiwaak ngesi ateger nakidingos a eam ka ekeno a ngakipeyos, sodi kilelebik ngakipi.

³¹Kilotasi Musa ka Aron ka talokookeng a Aron ngakan kech ka ngakejen anateger kangina,

³²nacha elomareta kesi loeam, kori na elooso lokeno a ngakipeyos, loger lo adungunitor Ekapolon Akuj.

³³Todukok Musa alaar kisiriam eam ka ekeno a ngakipeyos kinenek awaru na ekidor a alaar. Sodi torumo ngesi etich daang.

³⁴Sodi kimuk edou eam a Akuj, kilelebun akwangis naakwaan kea a Ekapolon Akuj loeam.

³⁵Tongopik Musa kona elomari loeam ani emukitor edou.

³⁶Araakasi Ngisirael nyenyounete awosit wache mati kikeun edou aloeam.

³⁷Ani esaa daang lo emukitor edou eam, peachamakinitae Ngisirael eramakinete.

³⁸ Ngirwa daang lu elatotor kesi, eteete edou a Akuj imukit eam naparan, ani nakwaare kiteto akim enoki alokidiama eam.