Read turkana Apudunet 5 Bible Online

Apudunet 5 - turkana bible

Apudunet 5

¹Ani ekisidi toloto Musa ka Aron nia ekapolon a Misiri tamasi, “Ebala Ekapolon Akuj na erai Akuj a Isirael kona, ‘Kimiek ngitunga kang toloto nariet tosuba esukukuu lo karimatar ayong.’ ”

²Kingis ekapolon ngolo tama, “Ngae erai Ekapolon Akuj? Nyo eirarea ayong ngakiro keng emiek Ngisirael toloto? Nyayeni ayong Ekapolon Akuj, kotere ngakiro nguna, nyemiekini ayong Ngisirael toloto.”

³Tatachut Musa ka Aron tamasi, “Akuj a Ngieburaniae edodiun anikosi. Kimiekinae sua atoloto a ngirwa a nguuni nariet akipeyore Ekapolon Akuj, na erai Akuj kosi. Ani pekikok sua neni, kiari ngesi sua a edeke kori alojie.”

⁴Kingit ekapolon a Misiri Musa ka Aron tama, “Nyo isaketa esi ngitunga kipasakis etich kech? Kimiekisi ngikedalak ngulu tosuba etich!

⁵Ilalaketa esi noi idwang Ngimisiri. Nakaneni isakete tokona esi apalikin etich!”

⁶Akolongit napei ngina, todungok ekapolon a Misiri ngikasubak etich lu araakasi Ngimisiri ta Ngisirael lu aweikinito etich tama,

⁷“Tojongoto ainanakin ngitunga nginyia lu esubeta ematapar. Kimiekisi kesi ngikulepek toloto tasakut.

⁸Nakaneni kitusuba kesi ngimataparea lu eriyan ka lusek esubete, nyiitun tani epei. Emam kesi etich lo esubete, ngakiro nguna kesi ebalatar ayong emiek kesi toloto kipeyokis Akuj kech ngakipeyos!

⁹Kitusuba ngitunga lugu etich loationon kitumo kesi, sodi tongopik kona epupete ngakiro na eraakasi alioko.”

¹⁰Toloto ngikasubak etich lu araakasi Ngimisiri ka Ngisirael lu aweikinito etich sodi tolimokis Ngisirael tamasi, “Ebala ekapolon nyeringa kainakini esi nginyia.

¹¹Ebala ngesi kapesi esi ngikulepek tasakut ani cha ianyuneta, nakaneni isubete esi ngimataparea lu eriyan ka lusek isubete.”

¹²Sodi toloto ngitunga lowaitin daang a Misiri esakete nginyia.

¹³Kitinganakis ngikasubak etich lu aweikinito etich kesi akisub akolongit daang ngimataparea lu eriyan ka lusek asubeenete kesi ngirwa lu ainanakinere nginyia.

¹⁴Kibungata Ngimisiri lu aweikinito etich Ngisirael lu erumunito kesi aweikin etich. Kingita ebalasi, “Nyo peesubeta ngitunga kus ngimataparea lu eriyan ka lusek esubeenete?”

¹⁵Sodi toloto Ngisirael lu aweikinito etich nia ekapolon kingitas tamasi, “Nyo kisubea iyong sua ngakiro na ikote nege ekapolon?

¹⁶Emam nginyia kiinanakinio sua, nakaneni eringa sua kidesikinitae akisub ngimataparea! Kidesio tokona sua tarai ngitunga kon esechito.”

¹⁷Tatachak ekapolon kesi tama, “Ikalanyaka esi nyisakete akisub etich, ngakiro nguna kesi ibalatar esi ayong kemiek esi toloto akipeyore Ekapolon Akuj.

¹⁸Tobongosi tokona akisub etich! Nyikiinakinio esi nginyia, nakaneni isubete esi ngimataparea lu eriyan ka lusek isubete.”

¹⁹Toyena Ngisirael lu aweikinito etich atamar kiya kesi lochan na alimokinere atamar tosuba akolongit daang ngimataparea lu eriyan ka lusek esubete.

²⁰Ani erotokinete kesi, torukaut Musa ka Aron ewaasi alorot idarito kesi.

²¹Tolimokis kesi Musa ka Aron tamasi, “Engolik Ekapolon Akuj na isubete esi nakaneni kirirae esi ani kiteremokinioto esi sua ekapolon ka ngikasubak etich keng. Ipwatakis tokona esi kesi erot lo kiareta sua.”

²²Sodi tobongo Musa nia Ekapolon Akuj nabo tama, “Ekapolon Akuj, nyo iboliar iyong ngitunga kon? Nyo kolong tani kimeunea iyong ayong nege?

²³Napei ngoon alosio ayong akisuruor ekapolon a Misiri ngakiro kon, aboliar ngesi ngitunga niaronon. Nakaneni iwou iyong ayuun kesi jik!”