Read turkana Apudunet 6 Bible Online

Apudunet 6 - turkana bible

Apudunet 6

¹Sodi tolimok Ekapolon Akuj Musa tama, “Ingolikini tokona iyong ibore ni asubakinea ayong ekapolon a Misiri. Etingakini ayong ngesi kimiek ngitunga kang toloto. Etingakini ayong ngesi kitwarak kesi anakwap keng.”

²Kisuruor Akuj Musa tolimok tama, “Arai ayong Ekapolon Akuj.

³Abuni kolong ayong nia Aburaam, ka Isaka, ta Yakobo arai Akuj Naationon, nakaneni abu ayong nyeeteyen kesi a ekiro kang alo erai Ekapolon Akuj.[7]

⁴Eyook ayong tani achamunet nakichamakin ka kesi, echikak kesi atamar ainakini akwap a Kanaan, akwap nakolong ebooyoto kesi peerai akech.

⁵Eira tokona ayong akunua na igorotor Ngisirael, alu etiliwosi Ngimisiri ngikedalak, nabo etamu ayong achamunet kang.

⁶Tolimok Ngisirael atamar abala ayong kona, ‘Arai ayong Ekapolon Akuj. Kayuuni ayong esi sodi katalachak ani eyakasi Ngimisiri alu kitiliworito esi ngikedalak. Kayuuni ayong esi a eger aloationon noi ka eriras loapolon.

⁷Ketiliwori ayong esi ngitunga kang a alope, sodi atoliwor ayong Akuj kus. Iyenunete esi atamar arai ayong Ekapolon Akuj na arai Akuj kus nakalachakinea esi alo Misiri ani iraakatar ngikedalak.

⁸Kayauni ayong esi nakwap nakolong ekongi echikichika atamar ainakini Aburaam, ka Isaka, ta Yakobo. Kainakini ayong esi toliwor akus. Arai ayong Ekapolon Akuj.’ ”

⁹ Tolimok Musa Ngisirael ngakiro nguna, nakaneni towout kesi akiirar ngakiro keng, kainyo ealolongete kesi kotere eger lo aboliare niaronon.

¹⁰Abu Ekapolon Akuj tolimok Musa tama,

¹¹“Kape tolimok ekapolon a Misiri kimiek Ngisirael torotokis anakwap keng.”

¹²Nakaneni tatachak Musa Ekapolon Akuj tama, “Ani kewounito tani Ngisirael akiirar ngakiro kang, ikokini ekapolon a Misiri iirari ai? Kakuruworit ayong ekiruor.”

¹³Todungok Ekapolon Akuj Musa ka Aron tama, “Tolimokisi Ngisirael ka ekapolon a Misiri atamar kadungok ayong esi arikor Ngisirael topudosi alo Misiri.”

¹⁴Reuben lo arai lokookeng a Yakobo lo ekingaren, ayakasi talokookeng nguomwon lu anyaritae Anok, ka Palu, ka Esiron, ta Karimi. Araakasi kesi taapaakech a ngimacharin alu elimokinitae ngirora kech.

¹⁵Ayakasi Simeon talokookeng ngikan-kapei lu anyaritae Yemuel, ka Yamin, ka Oadi, ka Yakin, ka Soaar, ta Chaul lo arai lokookeng a aberu ana arai Akanaanit. Araakasi kesi taapaakech a ngimacharin alu elimokinitae ngirora kech.

¹⁶Ayakasi Lawi talokookeng nguuni lu anyaritae Gerichon, ka Koas, ta Merari. Araakasi kesi taapaakech a ngimacharin alu elimokinitae ngirora kech. Araakasi ngikaru a Lawi lu ayarea amiat apei ka ngitomwon-uni ka ngikan-kaarei.

¹⁷Ayakasi Gerichon talokookeng ngiarei lu anyaritae Libini ka Chimei. Nakaneni ayakasi kesi ngalesea nakaalak.

¹⁸Ayakasi Koas talokookeng nguomwon anyaritae Amuram, ka Ichar, ka Eburon, ta Usiel. Araakasi ngikaru lu ayarea Koas amiat apei ka ngitomwon-uni ka nguuni.

¹⁹ Ayakasi Merari talokookeng ngiarei lu anyaritae Mali ka Muchi. Araakasi kesi ngimacharin a Lawi ka ngalesea kech.

²⁰Kiut Amuram nakaatokeng a apakeng na anyaritae Yokebed. Kidou Yokebed Aron ka Musa. Araakasi ngikaru a Amuram lu ayarea amiat apei ka ngitomwon-uni ka ngikan-kaarei.

²¹Ayakasi Ichar talokookeng nguuni lu anyaritae Kora ka Nepeg, ta Sikiri.

²²Ayakasi Usiel dang talokookeng nguuni lu anyaritae Michael, ka Elisapan, ta Sisiri.

²³Kiut Aron Elicheba, nakookeng a Aminadab, tarai nakaatokeng a Nachon. Kidou Elicheba Nadab, ka Abiu, ka Eleasar, ta Isamar.

²⁴Ayakasi Kora talokookeng nguuni lu anyaritae Asiri, ka Elikana, ta Abiasap. Araakasi kesi taapaakech a ngawiyei a ekitela a Kora.

²⁵Kiut lokookeng a Aron lo anyaritae Eleasar nakookeng a Putiel. Kidou ngesi Pineas. Eraakasi lugu ngikapolok a ngawiyei ka ngadakarin a ekitela a Lawi.

²⁶Aron ka Musa kesi lu alimokini Ekapolon Akuj tama, “Torikosi ngitela a Ngisirael topudosi alo Misiri.”

²⁷Kesi lu alimokinete ekapolon a Misiri atamar talachak Ngisirael.

²⁸Na esuruorea Ekapolon Akuj Musa anakwap a Misiri,

²⁹tolimok tama, “Arai ayong Ekapolon Akuj. Tolimok ekapolon a Misiri ngakiro daang nguna kalimokini ayong iyong.”

³⁰Nakaneni tatachu Musa tama, “Iyeni iyong atamar kakuruworit ayong ekiruor. Ikokini ekapolon a Misiri iirari ngakiro kang ai?”